ދައުރެއްގެ ތެރޭގައި ބިންގަލުން ފެށި ފްލެޓު އިމާރާތެއް ނިންމާ ރައްޔިތުން ބޯހިޔާވަހިކުރާ ފުރަތަމަ އަހަރަށް މި އަހަރު ވެގެންދާނެ ކަމަށް ވިދާޅުވެ ރައީސް އިބްރާހީމް މުހައްމަދު ޞާލިހު ހެއްދެވީ އިތުރުފުޅެއް ކަމަށް މާލެ ސިޓީ ކައުންސިލްގެ މޭޔަރު އަދި ކުރީގެ ހައުސިން މިނިސްޓަރު ޑރ މުހައްމަދު މުއިއްޒު ވިދާޅުވެއްޖެއެވެ. 

އިއްޔެ އޮތް ރައްޔިތުންގެ މަޖިލީހުގެ 2023 ވަނަ އަހަރުގެ ފުރަތަމަ ދައުރުގެ ފުރަތަމަ ޖަލްސާގައި ރިޔާސީ ބަޔާން އިއްވަވަމުން ރައީސް ޞާލިހު ވަނީ، މި އަހަރުގެ ޖޫން މަސް ނިމުމުގެ ކުރިން ބޯހިޔާވަހިކަން ލިބޭ ފަރާތްތަކަށް އެކަމުގެ ލިޔުން ޙަވާލުކުރާނެ ކަމަށާއި، ދައުރެއްގެ ތެރޭގައި ބިންގަލުން ފެށި ފްލެޓް ޢިމާރާތެއް ނިންމާ، ރައްޔިތުން ބޯހިޔާވަހި ކުރާ ފުރަތަމަ އަހަރަށް މި އަހަރު ވެގެންދާނެކަމުގައި ވިދާޅުވެފައެވެ.

އެކަމާއި ގުޅިގެން މުޢިއްޒު ކުރެއްވި ޓްވީޓެއްގައި ވަނީ، އެފަދައިން ވިދާޅުވެ ރައީސް ޞާލިހު އިތުރުފުޅު ހެއްދެވުމަކީ ލަދުވެތިވާންޖެހޭ ކަމެއް ކަމަށެވެ.

Advertisement

"ރައީސް ޔާމީންގެ ސަރުކާރުން، ޗައިނާ މެޝިނަރީ އިންޖިނިއަރިން ކޯޕަރޭޝަންއާ (ސީއެމްއީސީ) 1500 ހައުސިން ޔުނިޓް އަޅަން ހަވާލުކޮށް، އެ މަސައްކަތް ނިންމުމަށްފަހު ހަވާލުވެސް ވަނީ ކޮށްފައި." ޑރ. މުޢިއްޒު ވިދާޅުވިއެވެ.  

ޗައިނާގެ ޗައިނާ މެޝިނަރީ އިންޖިނިއަރިން ކޯޕަރޭޝަންއާ (ސީއެމްއީސީ) ހަވާލުކޮށްގެން ހުޅުމާލޭގައި 704 ހައުސިން ޔުނިޓު، ހިތަދޫގައި 264 ޔުނިޓު، ހުޅުމީދޫގައި 48 ޔުނިޓު، ފުވައްމުލަކުގައި 200 ހައުސިން ޔުނިޓު، ވިލިނގިލީގައި 52 ހައުސިން ޔުނިޓު، ގައްދޫގައި 50 ހައުސިން ޔުނިޓު، ތިނަދޫގައި 120 ހައުސިން ޔުނިޓު އަދި މަޑަވެލީގައި 22 ހައުސިން ޔުނިޓު ރައީސް ޔާމީންގެ ވެރިކަމުގައި ވަނީ އަޅާފައެވެ.

މި މަޝްރޫއުގެ ބިންގާ އަޅާފައިވަނީ 9 ޑިސެމްބަރު 2014ގައި އޭރުގެ ރައީސުލްޖުމްހޫރިއްޔާ ޔާމީން އަބްދުލް ޤައްޔޫމެވެ. އަދި 5 ޑިސެމްބަރު 2017 ގައި މި މަޝްރޫއު ނިންމާ ސަރުކާރާއި ފްލެޓުތައް ހަވާލުކުރިއިރު 2018 ވަނަ އަހަރުގެ ކުރީ ކޮޅު ފްލެޓުތަކުގައި މީހުން ދިރިއުޅެން ވަނީ ފަށާފައެވެ. 3 ކޮޓަރީގެ މި ފްލެޓުތަކަށް އޭރު 15،000 އަށްވުރެ ގިނަ މީހުން ކުރިމަތިލިއެވެ.