ނަފްސާނީ މައްސަލަތައް ދިމާވަނީ ތަންދޮރު ނުދަންނަ ވެރިން ގައުމުތަކާއި ހަވާލުވުމުން ކަމަށާ އެކަމުގެ ފެންނަން ހުރި މިސާލަކީ ނުވަތަ އައިޑިއަލް ސިމްބަލް އަކީ ރައީސް އިބްރާހިމް މުހައްމަދު ސާލިހް ކަމަށް މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.

ނަފްސާނީ ދުޅަހެޔޮކަން ކަށަވަރުކުރުމަށް ފަރުވާގެ ހަރުދަނާ ނިޒާމެއް ޤާއިމުކުރުމަށް ގޮވައިލާ ރައްޔިތުންގެ މަޖިލީހުގެ ތިމަރަފުށީ ދާއިރާގެ މެންބަރު ރިޔާޒު ހުށަހެޅުއްވި ޤަރާރަށް ބަހުސްކުރައްވަމުން ސައީދުވަނީ ރާއްޖެއަށް ނަފްސާނީ މައްސަލަތައް ކުރިމަތިވަމުންދަނީ ރައީސް ޞާލިހް ފަދަ ވެެރިއެއް ވެރިކަމުގައި ހުންނެވުމުން ކަމަށް ވިދާޅުވެފައެވެ. 

"ނަފްސާނީ މައްސަލަތަކާއި ދިމާވަނީ ތަންދޮރު ނުދަންނަވެރިން ގައުމުތަކާއި ހަވާލު ވީމާ. އިއްޒަތްތެރި ރައީސް. ނަފްސާނީ މައްސަލަތައް ދިމާވަނީ ގައުމުތަކުގެ ބޮޑެތި ބާރު ތަކުންގެ ޕަޕެޓުންގެ ގޮތުގައި ގަބޫލުކޮށްގެން އަންނަ ވެރިން ގައުމުތަކާއި ހަވާލު ވީމާ. އޭގެ އެއް މިސާލަކީ ރައީސް އިބްރާހިމް މުހައްމަދު ޞާލިހު. އެމަނިކުފާނަކީ ގައުމަކަށް ނަފްސާނީ މައްސަލަތައް ދިމާވަނޑ އެންމެ އައިޑިއަލް ސިމްބަލް އެއްގެ ގޮތުގައި އަޅުގަނޑަށް ފެންނަނީ. ހަމަ ރަމްޒެއްގެ ގޮތުގައި އަޅުގަނޑަށް ފެންނަނީ." ސައީދު ވިދާޅުވި އެވެ. 

Advertisement

ސައީދު އެފަދައިން ވިދާޅުވި ސަބަބު އިތުރަށް ތަފްސީލް ކޮށްދެއްވަމުން އޭނާ ވަނީ މި ސަރުކާރުން ބޮޑު އަގުގައި ތިލަމާލެ ބްރިޖު ހެދުމަށް އިންޑިއާގެ އެފްކޮންސް އާއި ހަވާލުކޮށްފައި ވާއިރު، އެ މަސައްކަތް ކުރިއަށް ދާތަން ނުފެންނަ ކަމަށާ، އަދި މަސައްކަތުގެ ފެންވަރުވެސް ދަށްކަމަށެވެ. 

"ކޮޅަށް ޖެހި ތަނބެއް ވިއްޔާ ވެއްޓެނީ. ދެން އެންމެ ރަނގަޅު. ކޮންމެސް ހިސާބަކުން ކޮންމެވެސް ސަރުކާރަކުން އެ ބްރިޖް އެޅީމަ އެނިދާނެތާ. ތިލަފުއްޓާ މިގުޅެނީ ހަމަ ގައިމުވެސް ރައީސް ޔާމީންގެ ސަރުކާރުގެ ވިޝަން އަކީ މާލޭ އިންޓަރނޭޝަނަލް އެއަރޕޯޓް، ނުވަތަ ވެލާނާ އިންޓަރނޭޝަނަލް އެއަރޕޯޓާ ތިލަފުއްޓާ ގުޅުވުން. އެއީ ޕްލޭންއަކީ. ކޮބައިތޯ އޭގެ ބޭނުމަކީ؟ އަޅުގަނޑުމެންގެ ސަރުކާރުން ހެދި ހުރިހާ ދިރާސާއެއްގައިވެސް ދައްކާ އެއް ވާހަކައަކީ ކޮމާޝަލް ބޯޓަކާއި އެއަރޕޯޓަކާ ގުޅުނީމައޭ އެގައުމެއްގެ އިގްތިސާދީ މިއަންނަ ލިންކޭޖް އެންމެ ރަނގަޅަށް ޓްރާންސްޕޯޓްގަ އަންނަ ލިންކޭޖް އޭވިއޭޝަން އާއި ސީ ޓްރާންސްޕޯޓާ ގުޅިގެންދާނީ." ސައީދު ވިދާޅުވި އެވެ.

މިއާއެކު ދިވެހި ވިޔަފާރިތަކަށް އޮތް ބިމެއް ތިލަފުށީގައި ނުހިއްކާ އޮތް ފަޅުގައި ކަޑަ ޖަހާލާފައި ލާރިކޮޅެއް ހޯދުމަށް މިސަރުކާރުން ވިއްކަނީ ތިން ކުންފުންޏަކަށް ކަމަށް ސައީދު ވަނީ ވިދާޅުވެފަ އެވެ.

"ލާރިކޮޅެއް ހޯދަނީ ވަކިވަކި ވަޒީރުންނަށްތޯ ނުވަތަ ރައީސް ސާލިހްގެ ކެމްޕޭނަކަށްތޯ މިއެއް އަދި އަޅުގަނޑަކަށް ނޭނގެ. މިހިސާބަށް ކަންތައްތައް ދިޔައިމަ ނަފްސާނީ ވާނެ. ނަފްސާނީ ވާނެ އެއްނޫންތޯ ބޯހިޔާވަހިކަން އަޅުގަނޑުމެން 250 ހެކްޓަރުގެ ބިމެއް ރައީސް ޔާމީންގެ ސަރުކާރުން ހިއްކާފަ ދިނީމަ އެތަނުގައި ގާބުރިއެއް ބައިންދާލަން ނޭނގިގެން އެއުޅެނީ. ނަފްސާނީ ނުވާނެތޯ މިވަރުވީމަ." ސައީދު ވިދާޅުވި އެވެ.

މީގެ އިތުރުން އިންޑިޔާ އާއި އެކުވެފައި ގޮތް ނޭނގޭ އެގްރީމެންޓް ތައް ހާމަ ނުކުރެއްވުމަކީވެސް ރައްޔިތުން ނަފްސާނީ ވާ ކަމެއް ކަމަށް ސައީދު ވިދާޅުވި އެވެ. އެގޮތުން، އުތުރުތިލަފަޅާއި ހައިޑްރޮގްރަފީ އެއްބަސްވުންތަކާއެކު މި ސަރުކާރާއި އިންޑިއާ އާ ދެމެދު ވެފައިވާ އެއްބަސްވުންތައް މިހާތަނަށް ހާމަކުރެވިފައިނުވާ ކަން އޭނާ ފާހަގަކުރެއްވިއެވެ. 

އަދި ހަމައެހެންމެ ފަނޑިޔާރުގެ އެކޭ ތުޅާދޫ ދާއިރާގެ މެމްބަރު ހިސާން ހުސައިން ގެންގުޅުއްވާ މަލާފަތެކޭ އެއްގޮތް ކަމަށް ވިދާޅުވެ ޖޭއެސްސީއަށް ސިޔާސީ ނުފޫޒު އިންތިހާއަށް އޮތް ކަމަށް އޭނާ ވިދާޅުވި އެވެ. އެފަދަ ކަންކަމުގެ ސަބަބުން ރައްޔިތުން ނަފްސާނީ ނުވާނެތޯވެސް އޭނާ ވަނީ ސުވާލު ކުރައްވާފައެވެ. 

ރައްޔިތުންނަށް ދިމާވެފައިމިވާ ހާލަތުން ރައްޔިތުން އަރައިގަތުމަށް އިންސާފުވެރި ވެރިކަމެއް ކުރަން ބޭނުންވާ ކަމަށް ސައީދު ވިދާޅުވިއެވެ.