ވިލިމާލޭގައި ހުންނަ ސިނަމާލެ 4 ގެ ފްލެޓްތަކުގެ ޖޫރިމަނާ މަޢާފްކޮށްދީ އެތަންތަން އަމިއްލަ ކުރެވޭ ގޮތް މާލޭ ސިޓީ ކައުންސިލުން ހަދައިފިއެވެ.

ވިލިމާލޭ ފްލެޓްތައް އަމިއްލަކުރެވޭނެ ގޮތް ހަމަޖެއްސީ އެކަމަށް އެދި ބައެއް ފަރާތްތަކުން ހުށަހެޅުމާ ގުޅިގެން މާލޭ ސިޓީ ކައުންސިލްގެ 4 ވަނަ ދައުރުގެ ކައުންސިލްގެ ބައްދަލުވުމެއްގައި މަޝްވަރާކޮށް އެގޮތަށް ހަމަޖެއްސުމަށް ފާސްކޮށްގެންނެވެ. މި ނިންމުމާގުޅިގެން ފްލެޓް އަމިއްލަ ކުރެވެނީ ފްލެޓަށް ދައްކަން ޖެހޭ ފައިސާ ދައްކާ ޚަލާސްކުރުމުންނެވެ.

ފްލެޓް ޖޫރިމަނާ މަޢާފްވެފައިވުމާއެކު އަމިއްލަކުރުމާބެހޭ އެއްބަސްވުންތަކުގައި ސޮއިކުރުމުގެ ދައުވަތު ފްލެޓްތަކުގެ ވެރިފަރާތްތަކަށް ސިޓީ ކައުންސިލުން ދިނީ ކުރިން އޮތް އެއްބަސްވުމަށް މައިގަނޑު ދެ ބަދަލެއް ގެނައުމަށްފަހު އަލުން އެއްބަސްވުމެއްގައި ސޮއިކުރުމުން އަމިއްލަ ވާގޮތަށެވެ. އެއްބަސްވުމަށް ގެނެވުނު މައިގަނޑު ދެ ބަދަލަކީ ފްލެޓްގެ ޖުމްލަ އަގު ދެއްކުމުން ފްލެޓް މިލްކުކުރެވޭ ބަދަލާއި އަދި ޖޫރިމަނާ ފައިސާ މައާފްކުރުމުގެ ބަދަލެވެ. މިގޮތަށް ދައުވަތު ދިނުމުން ވިލިމާލޭގެ ފްލެޓްތަކުގެ ވެރިންގެ ތެރެއިން ގިނަ ޢަދެއްގެ ބަޔަކު މިހާތަނަށް ވަނީ ފްލެޓް މިލްކުކުރެވޭ އެއްބަސްވުމުގައި ސޮއިކޮށްފައެވެ. މިހާތަނަށް ސޮއިނުކުރެވޭ ފަރާތްތަކުންވެސް ސިޓީ ކައުންސިލާ ވާހަކަދެއްކުމުން ސޮއިކުރުމުގެ އިންތިޒާމް ހަމަޖައްސައިދޭގޮތަށް ވަނީ ހަމަޖެހިފައެވެ.

Advertisement

އެއްބަސްވުންތަކުގައި ސޮއިކުރުމުގެ މަރުހަލާގައި ވެރިފަރާތްތަކުން ހުށަހެޅި ބައެއް އިސްލާހްތަކުގެތެރެއިން ޤާނޫނީ ގޮތުން ހުރަހެއްނެތް އިސްލާހްތައް އެއްބަސްވުންތަކަށް ގެނެސްދީފައިވާނެއެވެ. އަދި ސިޓީ ކައުންސިލުން އެންގި ގަޑިތަކުގައި ސޮއިކުރަން ވަޑައިނުގެންނެވުނު ފަރާތްތަކަށް އިތުރު ފުރުޞަތުތައްވެސް ދީފައިވާނެއެވެ. އަދި މިހާރުވެސް ފުރުޞަތު ވަނީ ހުޅުވިފައެވެ. ފްލެޓްތަކުގެ އެއްބަސްވުންތައް ކުރިން ހަދާފައިވާގޮތުން މިލްކުރެވޭނެ ގޮތެއް ނެތުމާއެކު މިހާތަނަށް ފައިސާ ދައްކާ ޚަލާސްކުރި ފަރާތްތަކުންވެސް މިލްކުކުރެއްވުމަށް މި އެއްބަސްވުމުގައި ސޮއިކުރަންޖެހެއެވެ.

މާލޭގައި ބިނާކޮށްފައިވާ ފްލެޓްތަކުގެތެރެއިން ސިޓީ ކައުންސިލުން ބަލަހައްޓާ ސިނަމާލޭ އަދި މާލޭ ހިޔާ ފްލެޓްތައް މި އުސޫލުން މިލްކުކުރުމާއި ޖުރުމަނާ މަޢާފްކުރުމުގެ މަސައްކަތް މިހާރު ސިޓީ ކައުންސިލުން ވަނީ ފަށާފައެވެ. މި ފަރާތްތަކުގެ އެއްބަސްވުންތަކުގައި ސޮއިކުރުމަށްވެސް ކުރިއަށް އޮތްތާންގައި ދައުވަތު ދެވޭނެއެވެ.