ތުރްކިޔޭ ސީރިޔާ ބިންހެލުން: ގެއްލުންވި ސަރަހައްދު ތަކަށް ރައީސް އުރްދުޣާން ޒިޔާރަތް ކުރައްވަނީ
ތުރްކިޔޭ އާއި ސީރިޔާ އަށް ވަރުގަދަ ބިންހެލުންތަކަށް ފަހު ތުރްކިޔޭ ރައީސް ރަޖަބް ޠައްޔިބު އުރްދުޣާން ތުރްކިޔޭގެ ބިންހެލުން އައި ސަރަހައްދަށް ޒިޔާރަތް ކުރައްވަން ނިންމަވައިފިއެވެ.
އެގޮތުން އިރްދުޣާން ޒިޔާރަތް ކުރައްވާނީ ބިންހެލުމުގެ އަސަރުކުރި 10 ޕްރޮވިންސްގެ ތެރެއިން އެންމެ ބޮޑަށް އަސަރުކޮށްފައިވާ ސަރަހައްދު ތަކަށެވެ.
މި ކާރިސާގައި ތުރްކިޔޭ އިން މަރުވި މީހުންގެ ޢަދަދު މިހާރު ވަނީ 7108 އަކަށް އަރައިފައެވެ. ތުރްކިޔޭގައި މިހާރު އޮތީ 3 މަސް ދުވަހަށް ދެމިގެންދާނެހެން ކުއްލި ނުރައްކަލުގެ ހާލަތު އިއްލާނު ކޮށްފައެވެ.
ސުންނާފަތިވެ ހަލާކުވެފައިވާ އިމާރާތްތަކުގެ ދަށުން މީހުން ސަލާމަތް ކުރުމަށް 12،000 ރެސްކިޔު ވޯކާސް ދަނީ މަސައްކަތް ކުރަމުންނެވެ. ދުނިޔޭގެ އެކި ޤައުމުތަކުންވެސް މީހުން ސަލާމަތް ކުރުމަށް ރެސްކިޔު ޓީމުތައް ފޮނުވައިދޭނެ ކަމަށް ވަނީ ބުނެފައެވެ. މިއަދުގެ ހެނދުނުގެ ވަގުތެއްގައި ޗައިނާގެ ރެސްކިޔު ޓީމް ވަނީ ތުރްކިޔޭގެ އަދާނާ އެއަރޕޯޓަށް ޖައްސައިފައެވެ.
އެގޮތުން ވަރުގަދަ 82 ރެސްކިޔު ޓީމަކާއި ރެސްކިޔު ޑޯގްސް އަދި 20 ޓަނުގެ އެމަރޖެންސީ އެއިޑްގެ ތަކެތި ވަނީ ފޮނުވައިފައެވެ. އޭގެ ތެރޭގައި ބޭހާއި މީހުން ސަލާމަތް ކުރުމަށް ބޭނުންވާ ތަކެތި ހިމެނެއެވެ. މީގެ އިތުރުން ޗައިނާއިން ވަނީ 40 މިލިއަން ޑޮލަރުގެ އެމެޖެންސީ އެއިޑް ތުރްކިޔޭ އަށް ދޭނެކަމަށް ބުނެފައެވެ.
Advertisement
This content is created and paid for by advertisers and does not involve Voice Journalists