ތުރްކިޔޭ އާއި ސީރިޔާ އަށް އައި ބާރުގަދަ ބިންހެލުމަށް ފަހު، މެދުކެނޑުމެއްނެތި 7 އަހަރު ހަނގުރާމައިގެ ވިލާގަނޑުގެ ދަށުގައި ތިބި ސީރިޔާ ގެ ރައްޔިތުންގެ ހާލަތު ވަނީ އިތުރަށް ގޯސްވެފައެވެ.

ބިންހެލުމަށް ސީރިޔާގައި ހާލުގައި ޖެހިފައިތިބި މީހުންނާ ހިސާބަށް އެމަޖެންސީ އެއިޑާއި އެކު ދަތުރު ކުރުން ވަނީ ވަރަށް ބޮޑަށް އުނދަގޫވެފައެވެ.

ފުނޑުފުނޑުވެ ހަލާކުވެފައިވާ ޢިމާރާތްތަކުގެ ދަށުން މީހުން ސަލާމަތްކުރުމަށް ބޭނުންކުރާނެ ވަސީލަތްތައް އެހިސާބަށް ފޯރުކޮށްދިނުން ދަތިވެ ތިބި މަދު ރެސްކިޔު ވޯކާސް ދަނީ އެމީހުންގެ ކަށިން ހިތްވަރުނެރެ އަތުން ހިލަތަކާއި ސިމެންތި ތައް އެއްފަރާތްކޮށް މީހުންނާއި ތުއްތު ކުދިން ސަލާމަތް ކުރުމަށް މަސައްކަތް ކުރަމުންނެވެ.

ސީރިޔާގެ ހަނގުރާމަ ވެރިން ތިބި ސަރައްހައްދަށް ވެސް ވަނީ ބިންހެލުމުގެ އަސަރުކޮށްފައެވެ. އެސަރަހައްދުގައި ތިބި މީހުންނަށް އެހީ ފޯރުކޮށްދެވެން އޮތީ ޔޫއެން އިން ތުރިކިޔާއިން ސީރިޔާގެ ހުޅަނގުއުތުރަށް ހަދައިފައިއޮންނަ ބާބް އަލް ހަވާ އޭ ކިޔާ މަގެވެ. ނަމަވެސް ބިންހެލުމާއި އެކު އެމަގުވަނީ ހަލާކުވެފައެވެ. އެހެންކަމުން މިވަގުތައް ބޭނުންވާ އިންސާނީ އެހީ ފޯރުކޮށްދިނުންވެސް ބޮޑު ދައްޗަކަށް ވެފައިވާކަމަށް އިންސާނިޔަތައްޓަކައި މަދަދުދޭ ޖަމިއްޔާތަކުން ވަނީ ހާމަކޮށްފައެވެ.

ޔޫއެންއިން ބުނެފައިވަނީ ބިންހެލުމުގެ ސަބަބުން ވެއްޓިފައިވާ އިމާރާތްތަކުގެ ސަބަބުން ތާށިވެފައިވާ މީހުން ސަލާމަތް ކުރުމަށް ބޭނުންވާ ސާމާނާއި ބޯހިޔާވަހިކަން ގެއްލި ހާލުގައި ޖެހިފައިވާ ފަރާތްތަކަށް މިވަގުތައް ކޮންމެހެން ބޭނުންވާ ސާމާނު ފޯރުކޮށްދިނުމަށް އެކި މަގުތައް ހޯދުމަށް މަސައްކަތް ކުރަމުންދާކަމަށެވެ. ހުއްދަ ލިބިފައިވާ މަގުނޫން އެހެން މަގަކުން އެކަން ކުރާ ނަމަ ސީރިޔާގެ ސަރުކާރާއި އެކު އައު އެއްބަސްވުމެއް ހަދަން ޖެހެއެވެ.

ހުޅަނގުގެ ޤައުމުތަކުން ސީރިޔާގެ ބައްޝާރުލް އަސަދުގެ ސަރުކާރު މެދުވެރިކޮށް ސީރިޔާގެ ހާލުގައި ޖެހިފައި ތިބި ރައްޔިތުންނަށް އެހީ ފޮނުވުމަށް ދަނީ ނޫން ބަސްބުނަމުންނެވެ.

އަންގާރަ ދުވަހު އެމެރިކާއިން ބުނެފައިވަނީ އެގައުމުން މިވަގުތައް ހާލުގައި ޖެހިފައިތިބި ތުރްކިޔޭ އާއި ސީރިޔާގެ ރައްޔިތުނަށް ވެސް އެހީވުމަށް ނިންމައިފައިވާ ކަމަށެވެ. ނަމަވެސް ސީދާ ސީރިޔާގެ ސަރުކާރާއި ވާހަކަދައްކައިގެން މިކަން އަވަހަށް ކުރުމަކީ ދަތިކަމެއް ކަމަށާއި، ޔޫއެން އާއި ގުޅުގެން އެމަސައްކަތް ކުރާނެ ކަމަށެވެ.

ކޮންމެއަކަސް ސީރިޔާގެ ރައްޔިތުން ތިބީ ހިތާމައިގެ މައްޗަށް ހިތާމައިގައެވެ. މިހާތަނަށް ބިންހެލުމުގައު އެޤައުމުން 2530 މީހުން ވަނީ މަރުވެފައެވެ. އެއީ ޔަޤީން ވެފައިވާ ޢަދަދެވެ. ޢިމާރާތް ތަކުގެ ދަށުގައި ތާށިވެފައި އެތައް ބަޔަކު ތިބުމަކީ އެކަށީގެންވާ ކަމެކެވެ. ބިންހެލުމުގެ 40 ގަޑިއިރުވިފަހުންވެސް ބައެއް އިމާރަތްތަކުގެ ދަށުން މީހުން ސަލާމަތް ކޮށްފައިވެއެވެ. އުންމީދަކީ ﷲގެ ރަޙްމަތާއި އެކު ގިނަ ބަޔަކު ދިރިތިއްބައި ސަލާމަތް ކުރެވުމެވެ.