ތުރުކިޔޭ އަށާއި ސީރިޔާ އަށް އައި ބިންހެލުން ތަކުގައި ތުރުކިޔޭ ގައި ވެއްޓުނު އިމާރާތެއްގެ ދަށުން ސީރިޔާގެ ރެފިޔުޖީ، ތުއްތު މުޙައްމަދު 45 ގަޑިއިރު ފަހުން ދިރިއޮއްވާ ސަލާމަތްކޮށްފިއެވެ.

މުޙައްމަދު ސަލާމަތްކުރުމަށް މަސައްކަތް ކުރަމުންދިޔަ  ރެސްކިޔު ވޯކަރ ފުރަތަމަ މުޙައްމަދަށް ފެން ދީ، ވާހަކަދައްކައި ހަމަޖެއްސޯތޯ މަސައްކަތް ކުރެއެވެ. އަދި އެކުއްޖާ ވަނީ ވެއްޓިފައިވާ އިމާރާތުގެ ދަށުން ރައްކާތެރިކަމާއި އެކު ނަގައިފައެވެ.

މިކާރިސާގައި ތުރުކިޔޭ އިން މަރުވި މީހުންގެ ޢަދަދު މިހާރު ވަނީ 8574 އަކަށް އަރައިފައެވެ. އަދި ސީރިޔާއިން 2530 މީހުން މަރުވެފައި ވާއިރު ޖުމްލަ ޢަދަދު 11000 މައްޗަށް އަރައިގެން ގޮއްސައެވެ.

ތުރްކިޔޭގެ ރައީސް ރަޖަބް ޠައްޔިބް އުރްދުޣާން މިހާރު ވަނީ ކާރިސާގައި އެންމެ ބޮޑަށް ގެއްލުންވި ސަރަހައްދު ތަކަށް ޒިޔާރަތްކުރައްވައިފައެވެ.

އުރްދުޣާން ވިދާޅުވީ އެންމެ ފުރަތަމަ ދުވަހުން ފެށިގެންވެސް ހާލުގައި ޖެހިފައި ތިބި ފަރާތްތަކަށް ފޯރުކޮށްދޭން ޖެހޭ އެހީ ފޯރުކޮށްދިނުމަށް ދަތިވެފައިވާކަން ދެނެވަޑައިގަންނަވާ ކަމަށާއި ތުރުކިޔޭގެ ރައްޔިތުންގެ ކިބައިން އެދި ވަޑައިގަންނަވަނީ ކެތްތެރިކަން އިސްކުރުމަށް ކަމަށެވެ.

"މަގުތަކާއި އެއަރޕޯޓުތަކުން ދަތުރުކުރުން މިވަނީ ދަތިވެފައި، ނަމަވެސް އެއްދުވަހުން އަނެއް ދުވަހަށް ހުރިހާ ކަމެއްވެސް ދާނީ ރަނގަޅުވަމުން" އުރުދުޣާން ވިދާޅުވިއެވެ.

"ރައްޔިތުން މިވަގުތު އަޑުއަހަންވީ ސަރުކާރުން ދައްކާ ވާހަކަ، އޮތޯރިޓީ ތަކާއި މުޢާމަލާތު ކުރަންވީ، އެތައްބަޔަކު އެމަޖެންސީ އެހީ އާއި ޒަރޫރަތްތައް ނުފުދިގެން ޝަކުވާ ކުރާ ދަނޑިވަޅެއްމީ, ދޮގުވާހަކަތައް އަޑު އެހުމާއި ފެތުރުން ހުއްޓާލަންޖެހޭ" އުރްދުޣާން ވިދާޅުވިއެވެ.

އެއްވެސް ރައްޔިތަކު މަގުމައްޗެއް ނުވާނެ ކަމަށާއި އައު ގެތަށް ބިނާ ކޮށްދެއްވާނެ ކަމަށް އުރްދުޣާން ވިދާޅުވިއެވެ. "މިއީ އެއްބައިވަންތަ ކަން އިސްކުރަންވީ ވަގުތު" އުރްދުޣާން ވިދާޅުވިއެވެ.