ތުރްކިޔޭ އާއި ސީރިޔާ އަށް އައި ބާރުގަދަ ބިންހެލުމުގެ އަސަރު ކޮށް ހާލުގައި ޖެހިފައި ތިބި ސީރިޔާގެ ރައްޔިތުން ނަށް ބައިނަލް އަގްވާމީ އެހީ މިވަގުތައް ވަނީ ވަރަށް ބޮޑަށް ބޭނުންވެފައެވެ.
ހުދު ހެލްމެޓްގެ ނަމުން މަޝްހޫރުވެފައިވާ ސީރިޔާގެ ސިވިލް ޑިފެންސް ފޯސް އިން ދަނީ ބިންހެލުމުގެ ސަބަބުން ވެއްޓިފައިވާ އިމާރާތްތަކުގެ ދަށުގައި ތާށިވެފައިވާ މީހުން ސަލާމަތް ކުރުމަށް ކެނޑިނޭޅި މަސައްކަތް ކުރަމުންނެވެ. މަދު އާލަތް ތަކަކާއި އެކު މީހުން ސަލާމަތް ކުރުމުގެ މަސައްކަތް ކުރަމުންދާ ހުދު ހެލްމެޓުން ބުނެފައިވަނީ ބައިނަލް އަޤްވާމީ އެއްވެސް ފަރާތަކުން އެމަރޖެންސީ އެހީއެއް އެހިސާބަށް ފޯރައިފައިނުވާކަމަށެވެ.
"ސީރިޔާގެ އުތުރަށް އެއްވެސް ދިމާއަކުން އެއްވެސް އެހީއެއް ނާދޭ،" ސީރިޔާގެ ސިވިލް ޑިފެންސްގެ ޕޮރޮގްރާމް މެނޭޖަރ ޢަބްދުއްރައްޒާޤް ކެންތަރް ވިދާޅުވިއެވެ.
ސީރިޔާގައި މިވަގުތު މީހުން ސަލާމަތް ކުރަން މަސައްކަތް ކުރަމުންދާ ރެސްކިޔު ޓީމަކީ މީގެ އަހަރުތަކެއް ކުރިން އެކުލަވައިލައިފައިވާ ޓީމެކެވެ. އެންމެ ފުރަތަމަ އައި 7.8 މެގްނެޓިޔުޓްގެ ބިންހެލުމާއި އެކު މި ޓީމު ވަނީ މަސައްކަތް ފަށައިފައެވެ.
"މިސްރުން އައި 20 މީހުންގެ ޓެކްނިކަލް ޓީމެއް އެކަނި މިހިސާބަށް އައިސްފައިވަނީ، ޑޮކްޓަރުން ހިމެނޭހެން އައި މިޓީމާއި އެކު މެޑިކަލް ބައެއް އާލާތްތައް ވަނީ ގެނެއްސައި، އެމީހުން ވަނީ ބާބް އަލް ހަވާ މަގުން"
"ސަރުކާރުގެ ސްޓޭޓްމަންޓުގައި ވާގޮތުން އެހީ ފޯރުކޮށްދޭ ފަރާތްތަކަށްޓަކައި ހުރިހާ މަގުތަކެއް ވަނީ ހުޅުވާލެވިފައި، ބާބް އަލް ހަވާ، ޖަރާބުލުސް އަދި ބާބް އަލް ސަމާހް ވެސް ވަނީ ހުޅުވާލެވިފައި، ސިވިލް ޑިފެންސުން ބުނެފައި ވާ ގޮތުން ބައިނަލްއަޤްވާމީ ވެސް އަދި އެނޫން ވެސް އެއްވެސް އެހީއެއް އަހަރެމެންނާއި ހިސާބަށް އައިސްފައެއް ނުވޭ"
"އަހަރެމެން މިދަނީ މަސައްކަތް ކުރަމުން، ރިޒާވްގައި ހުރި އެމަރޖެންސީ އެއިޑާއި ސީރިޔާގެ އެތެރެން ލިބެން ހުރި އެހީއެއް މި ބޭނުންކުރަމުންދަނީ" އަބްދުއްރައްޒާޤް ވިދާޅުވިއެވެ.
ސީރިޔާގައި ވެއްޓި ފުނޑުފުނޑުވެފައިވާ އިމާރަތްތަކުގެ ދަށުގައި ތާށިވެފައި ތިބި މީހުން ސަލާމަތް ކުރުމަށް މަސައްކަތް ކުރަމުންދާ ވައިޓް ހެލްމެޓްސް އިން އެމީހުން ވަގުތާއި ދެކޮޅަށް ކުރަމުންދާ މަސައްކަތުގައި ބައިނަލް އަޤްވާމީ އެހީތެރިކަމަށް ވަނީ ގޮވައިލައިފައެވެ.
"ބައިނަލްއަޤްވާމީ ރެސްކިޔު ޓީމުތަކުން އަހަރެމެން މިތިބަ ހިސާބުތަކަށް އަންނަންޖެހޭ"
"ކޮންމެ ސިކުންތަކު މީހަކު މިދަނީ މަރުވަމުން، އަހަރެމެން މިތިބީ ވަގުތާ ދެކޮޅަށް ކުރާ ރޭހެއް ގައި ކަހަލަ، ބައިނަލްއަޤްވާމީ ފަރާތްތަކަށް މިގޮވާލަނީ ހާލުގައި ޖެހިފައި ތިބި މީހުނަށް އެހީވުމުގެ ވާޖިބު އަދާކުރުމަށް" ސީރިޔާގެ ސިވިލް ޑިފެންސްގެ ސްޕޯކްސްޕާސަން މުހައްމަދް ޝިބިއްލީ ވިދާޅުވިއެވެ.
ބިންހެލުން ތަކުގައި ސީރިޔާގެ 250 ސްކޫލަށް ވަނީ ގެއްލުންތައް ލިބިފައެވެ. ގެއްލުން ލިބުނު ސްކޫލްތައް ހުރީ އެލެއްޕޯ، ލައްޓާކިއާ، ތަރްތޫސް، ހަމާ އަދި އިދްލިބް އަދި ތައްބާ ގައެވެ. ހަލާކުވެފައި ހުރިނަމަވެސް 126 ސްކޫލެއް ވަގުތީ ހިޔާގެ ގޮތުގައި މިވަގުތު ދަނީ ބޭނުން ކުރެވެމުންކަމަށް ސީރިޔާ ގެ އެޑިޔުކޭޝަން މިނިސްޓަރ ދަރެމް ތައްބާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
