ކ ކުޑަގިރީ ފަޅުގައި ތަރައްޤީ ކޮށްފައިވާ ޕިކްނިކް އައިލެންޑް އަށް ދާ ފެރީ ޓިކެޓްގެ އަގަކީ ކޮޅަކަށް 25 ރުފިޔާ ކަމުގައި ހަމަޖައްސައިފިއެވެ.

ފެރީގެ އަގަކީ ކޮޅަކަށް 25 ރުފިޔާ އަދި ރަށަށް އެތެރެވާނަމަ 50 ރުފިޔާ ދައްކަން ޖެހޭ ގޮތަށް ވަނީ ހަމަޖައްސައިފައެވެ.

މިއަގުތައް މިގޮތައް ހަމަޖައްސައިފައިވާ ކަން ހާމަކުރައްވާފައިވަނީ ނައިބް ރައީސް ފައިސަލް ނަސީމެވެ. ނައިބްރައީސް ފައިސަލް ވަނީ މިއަދު ކުޑަގިރި ހުޅުވުމުގެ އެންމެ ފަހުގެ ތައްޔާރީތައް ބައްލަވާލެއްވުމަށް އެ ރަށަށް ވަޑައިގެންފައެވެ.

ނައިބް ރައީސް ވިދާޅުވީ ކުޑަގިރި ފެރީގެ އަގަކީ 25 ރުފިޔާ އެވެ. އަދި ރަށަށް އެތެރެވާން އެންޓްރެންސް ފީ ގެ ގޮތުގައި 50 ރުފިޔާ ނަގާނެ އެވެ. ނަމަވެސް އެއީ އާންމު ދުވަސްތަކުގައި ދަތުރު ދާނަމަ އެވެ. އާދިއްތަ އިން ބުރާސްފައްޗަށް ދިވެހީންނާއި ބިދޭސީންނަށްވެސް ދަތުރު ދެވޭނެ ކަމަށް ފައިސަލް ވިދާޅުވިއެވެ.

ހަފްތާ ބަންދާއި ސަރުކާރު ބަންދު ދުވަސް ތަކުގައި ހިލޭ ދަތުރުކުރެވޭނެ ކަމަށާއި އަދި ހަފްތާ ބަންދާއި ސަރުކާރު ބަންދު ދުވަސްތައް ޚާއްސަ ކުރެވިފައިވަނީ ދިވެހިންނަށް ކަމަށެވެ.

ހަފްތާ ބަންދާއި ސަރުކާރު ބަންދު ދުވަސް ތަކުގައި ހިލޭ ދަތުރުކުރެވޭއިރު އެހެންދުވަސް ތަކުގައި ކޮޅަކަށް 25 ރުފިޔާ ނަގާނެއެވެ. 12 އަހަރުން މަތީގެ މީހުން ކުޑަގިރި އަށް އެތެރެވާން 50 ރުފިޔާ ދައްކަން ޖެހޭއިރު 12 އަހަރުން ދަށުގެ ކުދިންނަށް ދައްކަން ޖެހެނީ އަގުގެ އެއްބައެވެ. ހަފްތާ ބަންދާއި ސަރުކާރު ބަންދު ދިވެހިންނަށް ޚާއްސަ ކުރެވިފައިވާއިރު 600 އެއްހާ މީހުންނަށް އެރަށް ބޭނުންކުރެވޭނެއެވެ.

އެމްޓީސީސީއާ ހަވާލުކޮށްގެން ކުޑަގިރި ތަރައްގީ ކުރުމުގެ މަސައްކަތް ފެށީ މިދިޔަ އަހަރު އެވެ. މިއީ 41.4 މިލިއަން ރުފިޔާގެ މަސައްކަތެކެވެ. ކުޑަގިރި މި މަހު ހުޅުވަން އެންމެ ފަހުގެ ތައްޔާރީތައް ދަނީ ވަމުންނެވެ. ކުޑަގިރިއަށް ދަތުރު ދެވޭނީ ކުރީބައިގައި ބުކް ކުރުމަށް ފަހު އެވެ.  

މަސައްކަތް މުޅީން ނިންމާ އެ ރަށް މިދިޔަ މިނިވަން ދުވަހަށް ހުޅުވަން ސަރުކާރުން މަސައްކަތް ކުރި ނަމަވެސް އެ ތާރީހަށް މަސައްކަތް ނިމިފައި ނުވާތީ ހުޅުވާނެ ތާރީޚް ފަސްކުރިއެވެ. އޭގެ ފަހުން މިދިޔަ ނޮވެންބަރަށް ހުޅުވާނެ ކަމަށް ބުނި ނަމަވެސް އެތާރީޚުންވެސް ފަސްވެގެން ވަނީ ގޮސްފައެވެ. ނަމަވެސް މިހާރު އޮތީ ހުރިހާ މަސައްކަތެއް ނިމި ހުޅުވަން މުޅީން ތައްޔާރު ވެފައެވެ.