ތުރުކިޔޭ އާއި ސީރިޔާ އަށް އައި ބާރުގަދަ ބިންހެލުން ތަކުގެ ސަބަބުން މަރުވި މީހުންގެ ޢަދަދު 16000 އަށް ވަނީ އަރައިފައެވެ.

މީގެތެރެއިން 12873 މީހުންނަކީ ތުރްކިޔޭ އިން މަރުވި މީހުންނެވެ. 3162 މީހުންނަކީ ސީރިޔާ މީހުންނެވެ. ދިރިތިބި މީހުން ފެންނާނެ ކަމަށް ރެސްކިޔު ވޯކާސް ކުރަމުންދާ އުންމީދު ދަނީ ކުޑަވަމުންނެވެ. ތުރުކީގެ އިރުދެކުނުގެ މީހުންނާއި ސީރިޔާގެ ހުޅަނގުއުތުރުގައި ތިބި މީހުން ދަނީ ރެސްކިޔު ޓީމް ތަކާއި އެމަޖެންސީ އެއިޑް ލިބެމުންދާލެއް ލަސް ކަމުގެ ޝަކުވާ ކުރަމުންނެވެ.

ނަމަވެސް ގަނޑުވާފަދަ ފިނި ކަމުގައި ވެސް ރެސްކިޔު ވޯކަރުން ދަނީ ވެއްޓިފައިވާ އިމާރާތްތަކުގެ ދަށުން ދިރިތިބި މީހުން ފެނޭތޯ އާއި ފެންނަ މީހުން ސަލާމަތް ކުރުމަށް މަސައްކަތްކުރަމުންނެވެ. ހާދިސާ ހިނގިތާ މިހާރު ހަތަރު ދުވަސް ވެފައިވާއިރު ރެސްކިޔު ވޯކާސްގެ މަސައްކަތް ހުއްޓައެއް ނުލައެވެ.

Advertisement

ތުރުކިޔޭ އިން ބިންހެލުމުގެ އަސަރު އެންމެ ބޮޑަށް ކުރި ކަހްރަމަންމަރާންސް ގައި ހުރި އަލްޖަޒީރާގެ ރިޕޯޓަރު ބުނެފައިވަނީ "މީގެ އެއްގަޑިއިރުގެ ކުރިން އިމާރާތް ތަކުގެ ދަށުން ދެ ހަށިގަނޑު އެނެގީ،" މިހެނެވެ.

"ރެސްކިޔު ޓީމް ތަކުން މަރުވެފައިވާ ހަށިގަނޑުތައް އިމާރާތްތަކުގެ ދަށުންނަގައި ނެރެނީ ރަޖާ ތަކަށް ލައި ފޮރުވައިގެން، އެމަންޒަރުތައް އާއިލާގެ މީހުންނަށް ނުފެންނާނެ ހެން، މިތާގެ މީސްތަކުން ތިބީ ހިތާމައިގައި، ފިކުރުބޮޑުވުންތަކާއި ހިތާމައިގެ އިހްސާސްތައް އުތުރި އަރާ ހާލު، ފާއިތުވި 24 ގަޑި އިރުތެރޭގައި ދިރިހުރި އެއްވެސް މީހަކު އިމާރާތްތަކުގެ ދަށުން ނެރެވިފައެއް ނުވޭ" ވެއްޓިފައިވާ އިމާރާތް ތަކުގެ ކުރިމަތީގައި ހުރެ އޭނާ ކިޔައިދިނެވެ.