މިދިޔަ އަހަރުގެ ޖެނުއަރީ މަހާ އަޅާބަލާއިރު މިއަހަރުގެ ޖެނުއަރީ މަހު އާސަންދައިން ކުރި ހަރަދު ހަތަރު ގުނަ އަށް އިތުރު ވެފައިވާ ކަމަށް ވިދާޅުވެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދެއްކެވި ވާހަކަތަކަށް ރައީސް އޮފީހުގެ ތަރުޖަމާނު މިއުވާން މުހައްމަދު ރައްދު ދެއްވައިފި އެވެ. 

މި މަހުގެ 07 ވަނަ ދުވަހު ރައްޔިތުންގެ މަޖިލީހުގައި ރައީސް ނަޝީދު ވަނީ، ފިނޭންސްއިން ނެރެމުންދާ “ވީކްލީ ފިސްކަލް ޑިވެލޮޕްމެންޓްސްއިން” މިދިޔަ އަހަރުގެ ޖަނަވަރީ މަހުގެ ހަރަދުތަކާއި މި އަހަރުގެ ހަރަދުތަކާއި އަޅާ ބަލާއިރު ބޮޑު ތަފާތެއް ދައްކާކަމަށް ވިދާޅުވެފައެވެ.

އެގޮތުން މިދިޔަ އަހަރު ޖަނަވަރީ މަހުގެ ތެރޭގައި އާސަންދައަށް ހަރަދުކޮށްފައިވަނީ 67.9 މިލިއަން ކަމަށެވެ. އެހެންނަމަވެސް މި އަހަރުގެ ޖަނަވަރީ މަހުގެ ތެރޭގައި 283.4 މިލިއަން ރުފިޔާ ހަރަދުކޮށްފައިވާކަމަށެވެ. ވުމާއެކު، އެ ނަތީޖާ ތަކަށް ބަލާއިރު މި ދިޔަ އަހަރާ، މި އަހަރާއި އަޅާ ބަލާއިރު 4 ގުނައިން ބަލި މީހުން އިތުރުވެފައިވާ ކަމަށް ދައްކާ ކަމަށް އެމަނިކުފާނު ވިދާޅުވި އެވެ. 

Advertisement

"މިދިޔަ އަހަރު ޖަނަވަރީ މަހު (އާސަންދައަށް) 67.9 މިލިއަން ޚަރަދު ކުރެވުނީ. މިއަހަރު ޖަނަވަރީ މަހު 283.4 މިލިއަން ރުފިޔާ އާސަންދަ އަށް ޚަރަދު ކުރެއްވި. އެހެންވީމާ މިދިޔަ އަހަރުގެ ޖަނަވަރީ މަހާއި މި އަހަރުގެ ޖަނަވަރީ މަހާއި އަޅާބަލާއިރު ހަތަރު ގުނައިން ބަލިމީހުން އިތުރުވެގެން ހިނގައްޖެ. ދެން އެއީ އެތެރޭގެ އިންތިޚާބަކާއި ގުޅިގެން އައި ބަދަލެއް ތޯ ނުވަތަ ހަގީގަތުގައި ވެސް ބަލިމީހުން ހަތަރު ގުނައަށް އިތުރުވެގެން ދިޔައީތޯ. މިއީ މި މަޖިލީހުން އަހަން ޖެހޭ ސުވާލެއް"  ރައީސް ނަޝީދު ވިދާޅުވި އެވެ. 

ރައީސް މުހައްމަދު ނަޝީދު އެ ވާހަކަތަކާ ގުޅިގެން ނޫސްވެރިއެއް ކުރެއްވި ސުވާލުތަކަށް ޖަވާބު ދެއްވަމުން މިއުވާން ވިދާޅުވީ، ޖެނުއަރީ މަހުގައި އާސަންދައަށް ކުރި ޚަރަދު ވަކި ބޮޑެއް ނުވާ ކަމަށެވެ. އަދި ފެންނަން ހުރި ނަންބަރުތަކަށް ބަލާއިރު ވެސް އާސަންދައިން އެކި މަސްމަހުގައި ޚަރަދުކޮށްފައި ހުންނާނީ އެކިވަރަށް ކަމަށާއި، އެތެރޭގެ އިންތިޚާބާއި އާސަންދައިގެ ޚަރަދާ ގުޅުވަންވީ ކީއްވެ ކަމެއް ނުވިސްނޭ ކަމަށެވެ.

“އެއްވެސް ކަހަލަ އިންތިހާބަކާ ގުޅިގެން ވަކި އިތުރު ހަރަދެއް ކުރީކީއެއް ނޫން. ނުވަތަ އިންތިހާބަކާ ގުޅިގެން އާސަންދައިން ވަކިން ކޮން ހަރަދެއްތޯ އިތުރަށް ކުރާނީ؟" މިއުވާން ސުވާލު ކުރެއްވިއެވެ.

މީގެ އިތުރުން މިއުވާން ވިދާޅުވީ ވިދާޅުވީ އާސަންދައިން އެ މަހަކު ޚަރަދުކުރަނީ ހަމައެކަނި އެ މަހުގަ ޑޮކްޓަރަށް ދެއްކި މީހުންގެ ބިލުތަކަކަށް ނޫން ކަމަށާ، އޭގެ ކުރީ މަސްމަހުގައި އެކިއެކި ހޮސްޕިޓަލުތަކާ ކްލިނިކްތަކުން ފޮނުވާފަ ހުންނަ ބިލުތަކަށް ފައިސާ ދައްކާ ކަމަށެވެ.

އަދި އާސަންދަ އަކީ މީހުން އަތަށް ފައިސާ ދީގެން ކުރާ ހަރަދެއް ނޫން ކަމަށާ، އާސަންދައިގެ ކަންކަން ހިނގާގޮތް ރައީސް ނަޝީދަށްވެސް ވަރަށް ރަނގަޅަށް އެނގިވަޑައިގަންނަވާނެ ކަމަށެވެ. އަދި އެމަނިކުފާނު އެފަދައިން ވާހަކަ ދެއްކެވީ ކީއްވެ ކަމެއްވެސް އެނގިވަޑައި ނުގަންނަވާ ކަމަށް މިއުވާން ވިދާޅުވިއެވެ.