ބިންހެލުމަށް ފަހު ޔުނައިޓެޑް ނޭޝަންސް އިން ފޮނުވި އެހީގެ ފުރަތަމަ ގާފިލާ ތުރުކިޔޭ މަގުން ސީރިޔާގެ ހުޅަނގު އުތުރަށް ވަނީ ވަދެފައެވެ.

މި އެހީގެ ގާފިލާގައި 6 ޓްރަކެއް ވަނީ ސީރިޔާ އަށް ވަދެފައެވެ. އެހީގެ ގޮތުގައި ފޮނުވާފައިވާ ތަކެތީގެ ތެރޭގައި ހިމެނެނީ ހިމެނެނީ ބޯހިޔަ ވަހިކުރުމަށް ބޭނުންވާނެ ތަކެއްޗާއި، ރަޖާ އަދި ސާފުތާހިރުވުމަށް ބޭނުންވާ ސާމަނެވެ.

"ހިތް ހަމަޖެހުމެއް ލިބިއްޖެ ސޫރިޔާގެ ހުޅަނގުއުތުރުގައި ހާލުގައި ޖެހިފައި ތިބި މީހުންނާއި ހަމައަށް އަހަރެމެންނަށް އެހީފޯރުކޮށްދެވޭ ގޮތްވީމަ، އެމީހުންގެ ހާލަތު ހަމައަކަށް އެޅެންދެން މިގޮތަށް އެހީތަށް ފޯރުކޮށްދިނުން ކުރިއަށް ގެންދެވޭނެ ކަމަށް އުންމީދު ކުރަނީ" އޯސީއެޗްއޭގެ ހެޑް ސަންޖަނާ ކުއާޒީ ވިދާޅުވިއެވެ.

ކުރިއަށް އޮތް ތަނުގައި ސީރިޔާއަށް ދާން ހުރި އެހީގެ ގާފިލާ ތަކުގައި ކާބޯތަކެއްޗާއި ބޭސްފަރުވާ އަށް ބޭނުންވާ ތަކެތި ފޯރުކޮށްދެވޭނެއެވެ.

ބިންހެލުމަށް ފަހު އެހީއަށް ބޭނުންވާ މިންވަރު މިވަނީ އިތުރަށް ބޮޑުވެފައެވެ. އަދި މިހާތަނަށް ސީރިޔާގެ ހުޅަނގުއުތުރުން މީހުން ސަލާމަތް ކުރުމަށް ބަލައި ފާސްކުރެވިފައިވަނީ ފަސް ތަނެކެވެ.  ބޭނުންކުރާނެ މެޝިނަރީ އާއި ސާމާނު މަދުވުމުގެ ސަބަބުން ހަލާކުވެފައިވާ އިމާރާތްތަކުގެ ދަށުވެފައިވާ މީހުން ސަލާމަތްކުރުމަށް ވަނީ ދަތިވެފައެވެ. ކަރަންޓުނެތުމާއި ތެޔޮ ލިބެން ނެތުމާއި އެކު ފިނި މޫސުމުގެ އަސަރު ކުރަމުންދާލެއް ބޮޑު ކަމުން ރެސްކިޔު ޓީމަށް ވަނީ ބޮޑެތި ގޮންޖެހުންތަކަކާއި ދިމާވެފައެވެ.

ވައިޓް ހެލްމެޓްގެ ވޮލެންޓިއަރެއް ކަމަށްވާ އިސްމާއިލް އަލްޖަޒީރާ އަށް ބުނެފައިވަނީ ރެސްކިޔު ވޯކާސްގެ މަދު ކަމާއި ކަމަށްބޭނުންވާ އާލާތްތައް ނެތުމުން މަސައްކަތަށް ދަތިވެފައިވާކަމަށެވެ.

"އެތައްސަތޭކަ މީހުން އަދިވެސް ވީ ހަލާކުވެފައިވާ އިމާރާތްތަކުގެ ދަށުގައި، އަހަރެމެން އަތުގައި އެމީހުން ސަލާމަތްކުރާނެ އާލާތްތަކެއް ނެތް" އިސްމާއިލް ބުންޏެވެ.

ބިންހެލުންތަކުގެ ކުރިންވެސް ސީރިޔާގެ ހުޅަނގުއުތުރުގައި 4.1 މިލިއަން މީހުން އެހީތެރިކަމަށް ބޭނުންވެފައި ތިއްބެވެ. ގަދަ ފިނީގައި އެމީހުން ބޯހިޔާވަހިކަން ހޯދަމުން ދިޔައީ މަގުތައްމަތީގައި ޓެންޓު ޖަހައިގެނެވެ.