ތިލަފުށިން ބިދޭސީންނަށް ބިން ވިއްކަނީ ނޫން ކަމަށާއި 99 އަހަރަށް ކުއްޔަށް ދެނީ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިއުވާން ވިދާޅުވީ ގާނޫނުއަސާސީގައި ބޭރުގެ އެއްވެސް ފަރާތަކަށް ބިން މިލްކު ނުކުރެވޭނެ ކަމަށް އޮންނަކަމަށާއި ގާނޫނުއަސާސީގަ ވަރަށް ސާފު ސަރީހަ ބަހުން އެކަން ބަޔާން ކުރެވިފައި އޮންނަ ކަމަށެވެ.

އަދި އެޗްޑީސީން ކުރާ އިއުލާންތަކުގައި ވެސް ފާހަގަކޮށްފައިވާނޭހެން ތިލަފުށީގެ ބިންތައް ދިގުމުއްދަތަކަށް ބޭރުގެ ފަރާތްތަކަށް ދެނީ ކުއްޔަށް ކަމަށްވެސް އޭނާ ވިދާޅުވި އެވެ.

Advertisement

މިއާއެކު އޭނާ ވިދާޅުވީ އިދިކޮޅުން ތިލަފުށީގެ ބިން ވިއްކާ ވާހަކަ ދައްކަނީ ސީޔާދީ ބޭނުމެއްގައި ރައްޔިތުންނަށް އޮޅުވާލަން ކަމަށެވެ. 

"ތިޔަބޭފުޅުންނަށް އެނގިވަޑައިގަންނަވާނެ، ވަރަށް ދިގު މުއްދަތަށް، 99 އަހަރަށް، ނުވަތަ 49 އަހަރަށް، 50 އަހަރަށް ކުއްޔަށް ނަގާފައި ހުންނާނެ، ހަމަ ބޭރުގެ އިންވެސްޓަރުން އެއީ. އެ ރިސޯޓު ވިއްކާލަނީކީ ނޫނެއް ނޫންތޯ އެއީކީ. އެ ގޮތަށް ހަމަ ރާއްޖޭގެ ސިނާއީ މަސައްކަތް ކުރާ ރަށަކުން ބިމެއް ކުއްޔަށް ދޫކުރާ ވާހަކަ މި ދައްކަނީ. ސިޔާސީ ބޭނުމަކަށް ބައެއް ބޭފުޅުން އެކަން އޮޅުވާލަން މަސައްކަތް ކުރި ނަމަވެސް، ސިޔާސީ ބައެއް ބޭފުޅުން އެ ވާހަކަ އެ ދައްކަވަނީ. އެ ބޭފުޅުންނަށް އެނގިވަޑައިގަންނަވާނެ ރާއްޖޭގެ ބިމެއް އެ ގޮތަކަށް ބޭރުގެ ފަރާތަކަށް މިލްކެއް ނުކުރެވޭނެ ކަމަށް." މިއުވާން ވިދާޅުވިއެވެ.

މިއުވާން އިތުރަށް ވިދާޅުވީ ތިލަފުށިން ދޫކުރާ ބިންތަކުން 90 އިންސައްތަ ބިންތައް ވިއްކަނީ ދިވެހިންނަށް ކަމަށެވެ. އަދި، ބިދޭސީންނަށް ބިންތައް ކުއްޔަށް ދޫކުރަނީ ކަމަށާއި އެ ބިން ނުވިއްކާނެ ކަމަށް ތަކުރާކޮށް އޭނާ ވިދާޅުވިއެވެ.

ސިނާއީ މަސައްކަތަށް ތިލަފުށިން ބިން ވިއްކާގޮތުގެ އުސޫލު އެޗްޑީސީން އާއްމުކޮށްފައިވާއިރު އެ އުސޫލުގައި ވާގޮތުން ބިދޭސީންނަށް ބިން ކުއްޔަށް ދޫކުރަނީ 99 އަހަރަށެވެ. އަދި ބީލަން ކާމިޔާބު ކުރަނީ ދިވެހި ކުންފުންޏެއް ނަމަ ބިން މިލްކު ކުރެވޭނެ ކަމަށްވެސް ބުނެފައިވެއެވެ. ބީލަން ހުށަހެޅޭ އެންމެ ދަށް އަގަކީ އަކަފޫޓަކަށް 1،700 ރުފިޔާއެވެ