ތިމާގެ މުއްސަނދި ކަމާއި ފޯރުންތެރިކަން ދައްކަން މީސްމީޑިއާގައި ފޮޓޯ އާއި ވީޑިއޯ ހިއްސާކޮށް އިޝްތިހާރު ކުރުމަކީ މާތް الله އެންގެވި އުސޫލުތަކާއި ޚިލާފު ކަމެއް ކަމުގައި މިއަދުގެ ހުކުރުޚުތުބާގައި ބުނެފިއެވެ.  

ނަފްސުގެ މުއްސަނދި ކަމާއި ގުޅޭ ގޮތުން މިއަދު އިއްވާފައިވާ ޚުތުބާގައި ބުނީ، މުދާ ދެކެ ލޯބިވެ، ދުނިޔަވީ އަރާމުގެ ސާމާނު އެއްކޮށް ގިނަކުރަން އެދުމަކީ އިންސާނާގެ ތަބީއަތުގައި ވާ ކަމެއް ކަމަށެވެ. 

އެހެންނަމަވެސް، އިންސާނާގެ ތަބީއަތުގައިވާ މި ޣަރީޒާގެ ސަބަބުން އޭނާ ހައްގު މަގުން ކައްސާލައި، މާތް الله ހަރާމް ކުރެއްވި މަގުތަކުންނާއި ވަސީލަތްތަކުން މުއްސަނދިކަން އިތުރު ކުރަން މަސައްކަތް ކުރާ ކަމަށް ޚުތުބާގައި ބުނެފައިވެއެވެ. އަދި އޭގެ ސަބަބުން އޭނާ ހެއްދެވި މަގުސަދު އޮޅި، ހުރިހާވެސް ބޭނުމަކީ ދުނިޔެ ހޯދުން ކަމުގައިވާކަމަށާ، ދިރިއުޅުމުގެ މަގުސަދަކީ ވެސް އެއީ ކަމަށްދެކި، އޭނާ ވާދަކޮށް ކުރިއަރައިދާންވެސް ޖެހޭނީ އެކަމުގައި ކަމަށް ދެކޭކަމަށެވެ. 

ކަންމިހެން ހުރި ނަމަވެސް އިސްލާމްދީން ގޮވާލަނީ ދެދުނިޔޭގެ ހަޔާތް ބާއްޖަވެރި ކުރަން ކަމަށާ، އެހެންކަމުން އިންސާނާ އެންމެ ކަންބޮޑުވާ ކަމަކީ ދުނިޔެ ހޯދުން ކަމުގައި ހަދައި އާޚިރަތް ނަގައި ނުލުމަށް އިސްލާމްދީން ގޮވާލާ ކަމަށް ޚުތުބާގައި ހަނދާންކޮށްދީފައިވެއެވެ. 

މީގެ އިތުރުން ޚުތުބާގައި ބުނީ، މުއްސަނދި ކަމަކީ މުދާ ގިނަވުން ނޫން ކަމަށާ އެހެނެއްކަމަކު އެއީ ނަފްސުގެ މުއްސަނދި ކަން ކަމުގައި އަހަރެމެންގެ ރަސޫލާ ޞޢވ ހަދީޘް ކުރައްވާފައިވާ ކަމަށާ ހުރިހާ ޒަމާނެއްގައިވެސް ގަބޫލުކުރަންޖެހޭ އުސޫލަކީ އެއީ ކަމަށެވެ. އަދި ބޭރުފުށުގެ އޮފްދާރުކަމަށް ހެއްލިފައިވާ މި ޒަމާނުގައި އެއީ ވަރަށް ހިކުމަތްތެރި ގަވާއިދެއް ކަމަށްވެސް ޚުތުބާގައި ބުނެފައިވެއެވެ. އެގޮތުން، ރަސޫލާ ޞޢވ އެ ބަސްފުޅުން ގޮވާލަނީ މީސްތަކުންނަށް މުއާމަލާތް ކުރާއިރު ބޭރުފުށަށް ނުބެލުމަށް ކަމަށާ، ތިމާއާއި އަނެކާއާއި އަޅައި ނުކިޔަން ކަމަށެވެ. 

"މިއަދު މީސްތަކުން މީސްމީޑިއާގައި ފަތުރަމުންދާ ފޮޓޯތަކާއި ވީޑިއޯ ކްލިޕް ތަކާއިމެދު ވިސްނާލަމާ ހިނގާށެވެ. ކާއެއްޗެހީގެ ވީޑިއޯ ތަކާއި ފޮޓޯތައް ނަގައި މީސްމީޑިއާގައި ޝާއިޢު ކުރަމުންދެއެވެ. އަދި އަހަރުމެން މިތިބީ މިވެނި ރެސްޓޯރެންޓެއްގައޭ، މިވެނި ރަށެއްގައޭ، ނުވަތަ މިވެނި އަތިރިމައްޗެއްގައޭ ކިޔައި އިޝްތިހާރު ކުރެތެވެ. މިއީ ތިމާގެ މުއްސަނދި ކަމާއި ފޯރުންތެރިކަން ދައްކަން ކުރާ ކަމެއް ކަމުގައި ވާނަމަ މިކަން ވާނީ الله އެންގެވި އުސޫލުތަކާއި ޚިލާފު ކަމެއް ކަމުގައެވެ." ޚުތުބާގައި ބުނެފައިވެއެވެ.