2023 ފެބްރުއަރީ 10 ން 12 އަށް ކަޒަކިސްތާނުގެ ވެރިރަށް އަސްތާނާގައި، ކުރިއަށްދާ 10 ވަނަ އޭޝިއަން އެތުލެޓިކްސް އިންޑޯ ޗެމްޕިއަންޝިޕް ވާދަކުރަމުންދާ ރާއްޖޭ އަންހެން ދެ އެތްލީޓުން ވެސް 60 މީޓަރުގެ ދުވުމުން ޤައުމީ ރެކޯޑް ހަދައިފިއެވެ.

މިއަދު ހަވީރު ކުރިއަށްދިޔަ 60 މީޓަރ ދުވުމުގައި ފުރަތަމަ ޤައުމީ ރެކޯޑް ހެދީ ހީޓް ދޭއްގައި ދުވެގެން އަހުނާ ނިޒާރު އެވެ. އޭނާ ރޭސް ނިންމީ 7.89 ސިކުންތުންނެވެ. ކުރިން މިރެކޯޑް އޮންނަނީ ޖައުނާ އަބްދުالله ނާފިޒް އަތުގައެވެ. ޖައުނާ 60 މީޓަރ ދުވުމުން ޤައުމީ ރެކޯޑް ހެދީ ޤަތަރުގެ ވެރިރަށް ދޯހާގައި 2008 ވަނަ އަހަރު ބޭއްވުނު އޭޝިއަން ޗެންޕިއަންޝިޕުގައި 8.30 ސިކުންތުން ދުވެގެންނެވެ.

މަކިޓާ ޖޫނިއާ އެތުލެޓިކްސް ޗެމްޕިއަންޝިޕް 2022 ގެ އެންމެ މޮޅު އަންހެން އެތުލީޓް އަހުނާ ނިޒާރު

އަހުނާ 60 މީޓަރ ދުވުމުން ރެކޯޑް ހެދިތާ ކުޑައިރުކޮޅެއް ފަހުން މަރްޔަމް ރޫޔާ ޢަލީ އެ ރެކޯޑް މުގުރާލާފައެވެ. މިއަދު ހަވީރު ކުރިއަށްދިޔަ 60 މީޓަރ ދުވުމުގެ ހީޓް ތިނެއްގައި ވާދަކޮށް ރޫޔާ ރެކޯޑް ހެދީ 7.66 ސިކުންތުން ރޭސް ނިންމައިގެންނެވެ.

އަހުނާ ވަނީ މިދިޔަ އަހަރު ތިނަދޫގައި ބޭއްވުނު މަކިޓާ ޖޫނިއާ އެތުލެޓިކްސް ޗެމްޕިއަންޝިޕްގެ އެންމެ މޮޅު އަންހެން އެތުލީޓުގެ މަގާމު ހޯދާފައެވެ. އަދި އެ މުބާރާތުގައި އަހުނާ ވަނީ ތިން ރަން މެޑަލް ހޯދުމުގެ އިތުރުން ތިން މީޓް ރެކޯޑް ހަދައިފަ އެވެ. އަހުނާ ރަން މެޑަލް ހޯދީ 17 އަހަރުން ދަށުގެ 100 މީޓަރާއި 200 މީޓަރު ދުވުމުގެ އިތުރުން ލޯންގް ޖަމްޕް އިވެންޓުންނެެވެ.

ރޫޔާ އަކީ މިދިޔަ އަހަރު ފަހުކޮޅު ބޭއްވުނު ޤައުމީ ގްރޯން ޕްރީގެ އެންމެ މޮޅު އަންހެން އެތްލީޓެވެ. އެނާ ވަނީ އެ މުބާރާތުގައި އަންހެނުންގެ 100 މީޓަރު ދުވުމާއި ލޯންގް ޖަމްޕުން ރަން މެޑަލް ހޯދުމުގެ އިތުރުން، ލޯންގް ޖަމްޕް އިވެންޓުން ގައުމީ ރެކޯޑް ހަދާފައެވެ. ރޫޔާ، ލޯންގް ޖަމްޕުން ގައުމީ ރެކޯޑް މުގުރާލީ، 5.19 މީޓަރު ދުރަށް ފުންމައިގެންނެވެ. ކުރިން ލޯންގް ޖަމްޕުގެ ރެކޯޑް އޮތީ، 2019 ވަނަ އަހަރު، 4.99 މީޓަރު ދުރަށް ފުއްމައިގެން ރެކޯޑް ހެދި ނޫރާ އަބްދުލް ހަމީދު އަތުގަ އެވެ.