އިޓާލިއަން ލީގުގައި މިރޭ ރަށުން ބޭރުގައި ޓޮރީނޯ އާއި ވާދަކޮށް 1-0 ގެ ނަތީއްޖާއަކުން މޮޅުވެ އެންމެ ފަހުގެ ޗެންޕިއަން އޭސީ މިލާން ތާވަލުގެ ތިން ވަނައަށް ޖެހިލައިފިއެވެ. 

އެންމެ ފަހުން ކުޅުނު 7 މެޗުން މޮޅެއް ހޯދިފައިނުވާ އޭސީ މިލާނަށް މިރޭގެ މެޗުގެ ފުރަތަމަ ހާފުގައި އެދެވޭ ކުޅުމެއް ދެއްކިފައެއް ނުވެއެވެ. މި ހާފުގައި ލަނޑުޖަހަން އެންމެ ރަގަޅު ފުރުސަތެއް ލިބުނީ ޓޮރީނޯގެ ޕެރަގުއާއީ ފޯވާޑް އެންޓޯނިއޯ ސަނަބްރިއާ އަށެވެ. ނަމަވެސް އޭސީ މިލާން ޕެނަލްޓީ އޭރިއާތެރެއިން އޭނާ ފޮނުވާލި ބޯޅަ ގޯލާއި އަމާޒުނުވެ ދަނޑިކައިރިން ދިޔައީ ބޭރަށެވެ. މިހާފުގައި އޭސީ މިލާން އަށް ޓޮރީނޯގެ ގޯލާއި އަމާޒުކޮށް އެންމެ ހަމަލާއެއްވެސް ފޮނުވާލެވިފައެއް ނުވެއެވެ.

އޮލިވިއޭ ޖިރޫޑް

ދެވަނަ ހާފު ފެށިގެންވެސް ގިނަވަގުތު ބޯޅަ ގެންގުޅެ މެޗު ދޮމިނޭޓުކުރީ ޓޮރީނޯ އިންނެވެ. ނަމަވެސް މިހާފުގައި އޭސީ މިލާނުން ރަގަޅު ހަމަލާތަކެއް އުފެއްދިއެވެ. އެގޮތުން ދެވަނަ ހާފުގެ 54 ވަނަ މިނެޓުގައި އެޓީމުން އުފެއްދި ހަމަލާއެއްގައި ރަފޭލް ލެއާއު ފޮނުވާލި ބޯޅަ ޓޮރީނޯގެ ގޯލުކީއްޕަރު މިލިންކޮވިޗް-ސަވިޗް ވަނީ މަތަކޮށްފައެވެ. މި ހާފުގައިވެސް ޓޮރީނޯ ޓީމުން އެންމެ ހުސް ފުރުސަތެއް ލިބުނީ އެންޓޯނިއޯ ސަނަބްރިއާ އަށެވެ. ނަމަވެސް މިފަހަރުވެސް އޭނާ ފޮނުވާލި ބޯޅަ ގޯލާއި އަމާޒުވާގޮތެއްނުވިއެވެ.

މިރޭގެ މެޗުގައި ފެނިގެންދިޔަ ހަމައެކަނި ގޯލް ދެވަނަ ހާފުގެ 62 ވަނަ މިނެޓުގައި އޭސީ މިލާނަށް ކާމިޔާބުކޮށްދިނީ އެޓީމުގެ ތަޖުރިބާކާރު ފޯވާޑް އޮލިވިއޭ ޖިރޫޑް އެވެ. މިއީ އެޓީމުގެ ފްރާންސް ޑިފެންޑަރ ތިއޯ ހެނާންޑޭޒް ތަނަވަސްކޮށްދިން ފުރުސަތެއްގައި ޖިރޫޑް ކާމިޔާބުކޮށްދިން ލަނޑެކެވެ. 

މިރޭގެ މެޗުން ލިބުނު ތިން ޕޮއިންޓައި އެކު 22 މެޗުން 41 ޕޮއިންޓް ހަމަކޮށް ވަގުތީގޮތުން އޭސީ މިލާން ވަނީ ތާވަލުގެ ތިން ވަނައަށް ޖެހިލާފައެވެ. ދެވަނައިގައި އޮތް އިންޓަރ މިލާންއަށް 21 މެޗުން 43 ޕޮއިންޓް ލިބިފައިވާއިރު 4 ވަނައިގައި ރޯމާ އޮތީ 21 މެޗުން 40 ޕޮއިންޓާއެކުގައެވެ. މިރޭގެ މެޗުން ބަލިވި ޓޮރީނޯ އަށް 22 މެޗުން ލިބިފައިވަނީ 30 ޕޮއިންޓާއި އެކު ތާވަލުގެ 7 ވަނައެވެ.