ތުރްކިޔޭ އާއި ސީރިޔާ އަށް އައި ބާރުގަދަ ބިންހެލުން ތަކަށް 6 ދުވަސް ވެފައި ވާއިރު މަރުވި މީހުންގެ ޢަދަދު 24000 އަށް އަރައިފިއެވެ.

ތުރްކިޔޭ އިން މިހާތަނަށް 20665 މީހުން މަރުވެފައިވާއިރު ސީރިޔާއިން 3500 މީހުން ވަނީ މަރުވެފައެވެ. ޔޫއެން އިން ބުނެފައިވަނީ 5.3 މިލިއަން މީހުން ބިންހެލުމާއި ގުޅިގެން ބޯހިޔާވަހިކަމަށް ބޭނުންޖެހިފައިވާކަމަށެވެ. އަދި 9 މިލިއަން މީހުން ތުރްކިޔޭ އަދި ސީރިޔާގައި ކާބޯތަކެއްޗަށް ބޭނުންޖެހިފައިވާ ކަމަށެވެ.

ސީރިޔާގެ ސަރުކާރުން މިހާރު ވަނީ ބިންހެލުމުގެ ސަބަބުން އެހީއަށް ބޭނުންވެފައި އޮތް ސަރަހައްދުތަކަށް އެއިޑް ގްރޫޕު ތަކަށް ވަނުމަށް ހުއްދަ ދީފައިކަމަށް އެޤައުމުގެ މީޑިއާއިން ވަނީ ބުނެފައެވެ. ތުރުކިޔޭ އިން ބުނެފައިވަނީ ސީރިޔާގައި ބިންހެލުމުގެ ސަބަބުން ހަލާކުވެފައިވާ ސަރަހއްދުތަކަށް ތުރުކީ މަގުން ވަދެވޭނެ އިތުރު ދެ މަދެއް ހޯދުމަށް މަސައްކަތް ކުރަމުންދާ ކަމަށެވެ.

Advertisement

އިންޑޮނޭޝިޔާގެ ރެސްކިޔު ވޯކާސްގެ ޓީމެއް މިހާރު ވަނީ މީހުން ތުރުކީގައި މީހުން ސަލާމަތްކުރުމަށް މަސައްކަތް ކުރަމުންދާ ޓީމުތަކާއި ގުޅުމަށް ފުރައިފައެވެ. ދެ މިލިޓަރީ އެއަރކްރާފްޓުގައި 50 އަށް ވުރެ ސްޓާފުންނާއި 24 ޓަނުގެ އެހީގެ ސާމާނު ހިފައިގެން ޖަކާޓާގައި ހުންނަ އެއަރފޯސްގެ ބޭސް އިން އެޓީމު ވަނީ މިހާރު ދަތުރުފަށައިފައެވެ.

މިޓީމުން އެންމެ ފުރަތަމަ ތުރްކިޔޭގެ ހަޓޭ އޭރިޔާގައި ގެއްލިފައިވާ މީހުން ހޯދުމުގެ މަސައްކަތް ކުރާނެ، އަނިޔާވެފައިތިބި މީހުނަށް އަވަސްފަރުވާ ދިނުމަށްވެސް މަސައްކަތް ކުރާނެ ކަމަށް އިންޑޯނޭޝިޔާގެ ޑިޒާސްޓަރ މެނޭޖްމަންޓުގެ އޮފިޝަލަކު ވިދާޅުވިއެވެ.

ކިޔުބާއިންވެސް ވަނީ ތުރްކިޔޭ އާއި ސީރިޔާގައި ބިންހެލުމުގެ އަސަރުކޮށް އެހީތެރިކަމަށް ބޭނުންވެފައިވާ މީހުނަށް އެހީވުމަށް ހެލްތް ކެއަރ އޮފިޝަލުން ފޮނުވައިފައެވެ.