Advertisement

ފަނޑިޔާރުންނަށް ޖެއްސުން ކުރާކަން ފާހަގަކުރައްވާ ސުއޫދުގެ ފާޑުކިޔުން ޖޭއެސްސީއަށް!

11 Feb 2023 | 15:54
ކުރީގެ ބަންޑާރަ ނައިބު ހުސްނުއްސުއޫދު/ ފޮޓޯ: ސަން

ޖުޑިޝަލް ސާވިސް ކޮމިޝަން (ޖޭއެސްސީ) އިން ފަނޑިޔާރުންގެ ސުލޫކީ މައްސަލަތައް ބަލާއިރު ޖެއްސުމުގެ ސުވާލުތައް ފަނޑިޔާރުންނަށް އަމާޒުކުރައްވާކަން ފާހަގަކުރައްވާ ފަނޑިޔާރުންގެ ޖަމިއްޔާގެ ރައީސް ހުސްނުއްސުއޫދު ނުރުހުން ފާޅުކުރައްވައިފި އެވެ. 

ފަނޑިޔާރުންގެ ޖަމްއިއްޔާގެ އަހަރީ ބައްދަލުވުން ނިންމުމަށް ބޭއްވި ޖަލްސާގައި ވާހަކަދައްކަވަމުން ސުއޫދު ވިދާޅުވީ ފަނޑިޔާރުންނާ ގުޅިގެން ސުލޫކީ މައްސަލައެއް ޖޭއެސްސީން ބަލާއިރު ތަހުގީގުކުރައްވާ ބޭފުޅުން ތަބާވެވަޑައިގަންނަވާނެ ސުލޫކީ މިންގަނޑެއް އޮންނަން ޖެހޭ ކަމަށެވެ.

އެހެން ނަމަވެސް ސުލޫކީ މައްސަލަތައް ބެއްލެވުމަށް ފަނޑިޔާރުން ހާޒިރުކުރުމަށްފަހު، އެ މައްސަލައާއި އެއްވެސް ގުޅުމެއް ނެތް އާދައިގެ ސުވާލުތައް ޖޭއެސްސީއިން ކޮށްފައިވާކަމަށް ސުއޫދު ވިދާޅުވި އެވެ. 

Advertisement

"ދާދި ފަހަކުން ވެސް ބަޔަކު ގެނެސްފައި ފަނޑިޔާރުގެ މުވައްޒަފުން ކައިރީ މި އަހަނީ، ފަނޑިޔާރުންގެ ކެއިއިރުގައި ބާކީވި އެތިކޮޅެއް ކަލޭމެންނަށް ނުދެނީހޭ، މިހެނެއް ނޭހޭނެ، ކަލޭމެންނަށް ބާކީވި އެތިކޮޅު ވެސް ނުދީހޭ ކާލީ، އެ ދުވަހު ކީއްވެހޭ ކުކުޅު ނުގެނައީ، ކީއްވެހޭ ބީފް ނުގެނައީ"

ފަނޑިޔާރުންގެ ޖަމިއްޔާގެ ރައީސް ހުސްނުއްސުއޫދު

ސުއޫދު އެ މިސާލު ނަންގަވާފައިވަނީ ގއ.ވޮޑަމުއްލާ މައްސަލާގައި އިދިކޮޅު އިއްތިހާދުގެ ލީޑަރު ރައީސް  ޔާމީނުގެ މައްޗަށް ކުރިމިނަލް ކޯޓުން އިއްވި ފަސް އަހަރުގެ ޖަލު ހުކުމުގެ އިސްތިއުނާފީ މައްސަލަ ސުޕްރީމް ކޯޓުން ނިންމި ދުވަހުގައި ފަނޑިޔާރުންގެ ފަރިއްކޮޅު ފަނޑިޔާރު މަހާޒު ހަމަޖެއްސެވި މައްސަލަ ސުލޫކީ މައްސަލައެއްގެ ގޮތުގައި ޖޭއެސްސީން ބަލަމުންދާއިރު ކުރި ސުވާލުތަކާއި ގުޅިގެންނެވެ. 

ރާއްޖޭގެ ބަންޑާރަ ނައިބުކަންވެސް ކުރައްވާފައިވާ ސުއޫދު ސިފަކުރެއްވީ އެއީ ފަނޑިޔާރުންނަށް "ޖެއްސުން" ކުރުމަށް ކުރާ ސުވާލުތަކެއްގެ ގޮތުގައެވެ. 

"މިއީ ޖެއްސުމަށް ކުރާ ސުވާލުތަކަށް، އަޅުގަނޑުމެންނަށް ޖެއްސުންކުރުމުގެ ނިޔަތުގައި، މާލާމާތް ކުރާ ރާގަށް، ފުރައްސާރަކުރާ ގޮތަށް ސުވާލުކޮށްގެން ނުވާނެ"

ފަނޑިޔާރުންގެ ޖަމިއްޔާގެ ރައީސް ހުސްނުއްސުއޫދު

ހުސްނުއްސުއޫދު ވިދާޅުވީ ސުލޫކީ މައްސަލަތައް ވެސް ގާނޫނުގައި އިތުރަށް މާނަކުރެވި ވަކި އުސޫލުތަކެއް ހިފެހެއްޓެން ޖެހޭކަމަށެވެ. ފަނޑިޔާރުން ޝަރުއީ ގޮތުން ބަލަން ޖެހޭ ކަންކަން ބެއްލެވުމަށްފަހު ނިންމަވާ ނިންމެވުމަކާއި ގުޅިގެން އޭނާގެ ސުލޫކީ މައްސަލައެއް ބެއްލެވިގެން ނުވާނެކަމަށް ސުއޫދު ވިދާޅުވިއެވެ. 

އެއާއެކު ސުއޫދު ވިދާޅުވީ ފަނޑިޔާރުންގެ ސުލޫކީ މައްސަލަ ބެލުމަކީ ސިޔާސީ ކަމަކަށް ހަދައިގެން ނުވާނެކަމަށެވެ. އަދި ދައުރު ބަދަލުވާ ކޮންމެ ފަހަރަކު ފަނޑިޔާރުންނަށް އެކި ގޮތްގޮތަށް ކުރިމަތިވާ ފިއްތުންތައްވެސް ނިމުމަކަށް އަންނަން ޖެހޭކަމަށް އޭނާ ވިދާޅުވި އެވެ. 

Advertisement

ކޮމެންޓް

Advertisement

Advertisement