މި ވެރިކަމުގެ ފުރަތަމަ 100 ދުވަސްތެރޭ ހުޅުވާނެކަމަށް ވައުދުވި ކުޑަގިރި، ދައުރު ނިމެންވާއިރަށް ހުޅުވުނީ ދައުލަތުގެ 4 ކުންފުނި ބަނގުރޫޓުކޮށްލައިގެން ކަމަށް ޕީޕީއެމްގެ ނައިބުރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ. 

ޝިޔާމު މިފަދައިން ވިދާޅުވެފައިވަނީ ކުޑަގިރި ހުޅުވައިގެން ރައްޔިތުންނަށް ލިބޭނެ މާ ބޮޑު ފައިދާއެއް ނެތްކަން ފާހަގަކުރައްވާ ކުރެއްވި ޓްވީޓެއްގަ އެވެ. 

ޝިޔާމު ވިދާޅުވީ ފުރަތަމަ 100 ދުވަހުގެ ވައުދެއް ދައުރު ނިމެންވާއިރަށް ކިރިޔަ ކިރިޔާ ނިންމާލެވުމުން ރައީސް އިބްރާހިމް މުހައްމަދު ޞާލިހުގެ "ސްލޯ ކަން" އެނގިގެން ދާ ކަމަށެވެ. 

އެ މަޝްރޫއު ނިންމަން ދައުލަތުގެ 4 ކުންފުނި ބަނގުރޫޓުކޮށްލާފައި ވާއިރު، ދައުރު ނިމެންވާއިރަށް ކުޑަ ގިރި ހުޅުވާ ދެވުނަސް ރައްޔިތުންނަށް ކުރާނެ ފައިދާއެއް ނެތްކަމަށް ޝިޔާމު ވިދާޅުވިއެވެ. 

އޭނާގެ އެ ޓްވީޓުގައި ވަނީ މި ސަރުކާރުގެ ކުޑަގިރި މަޝްރޫއުއާއި ރައީސް ޔާމީންގެ ޒައާމަތުގައި ނިންމަވާފައިވާ މުހިންމު މަޝްރޫއުތައް އަޅާ ކުޔިއްވާފަ އެވެ. 

ޝިޔާމު ވިދާޅުވީ ރައީސް ޔާމިންގެ ޒައާމަތުގައި ބޮޑު ސަހަރެއް ހިއްކާ 10000 އާއިލާއަށް ބޯހިޔާވަހިކަން ކަށަވަރުކޮށްދީފައި ވާކަމަށެވެ.

ޝިޔާމު އިޝާރާތް ކުރެއްވީ ހުޅުމާލެއިން ބޮޑު ބައެއް ހިއްކާ ހުޅުމާލޭގެ ދެވަނަ ފިޔަވަހީގެ ގޮތުގައި ތަރައްގީ ކުރަން ފައްޓަވާ އެތަނުގައި ހިޔާ މަޝްރޫއުގެ ފަށުން އެޅުއްވި ފްލެޓުތަކަށް ކަމަށް ބެލެވެއެވެ. 

އެމަނިކުފާނުގެ ޒައާމަތުގައި ކޮށްދެއްވާފައިވާ އެފަދަ އަގުހުރި މަސައްކަތްޕުޅުތަކާއި އަޅާބަލާއިރު މި ސަރުކާރަށް ދައުރުގެ ކުރީ ކޮޅުގައި ފުއްދަވާދެއްވާނެކަމަށް ވިދާޅުވި ވައުދުތައްވެސް ފުއްދެނީ ދައުރު ނިމެންވުމުން ކަމަށާއި، އަދި އެ ވައުދުތައް ފުއްދުމަށް ރައްޔިތުންގެ ފައިސާއިން ވަރަށް ބޮޑަށް އިސްރާފު ކުރަމުން ދާކަމަށް ޝިޔާމު އިޝާރާތް ކުރެއްވި އެވެ.