މަޖީދީމަގުގައި ހަރުކުރި ފަޔާ ހައިޑްރެންޓުތައް ހަރުކުރިތާ ދެއަހަރު ވީއިރުވެސް އަދިވެސް ބޭނުން ކުރެވޭނެ ހާލަތަށް ނާންނަކަން ހާމަވެއްޖެއެވެ.

މިކަން ހާމަކޮށްފައިވަނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ދައުލަތުގެ އިދާރާތަކުން މައުލޫމާތު ހޯދުމަށް މަސައްކަތްކުރާ އެކްޓިވިސްޓު އައިމަން ލަތީފް (ޕިކޯ) އެދިގެން ޑިފެންސް މިނިސްޓްރީން ދިން މައުލޫމާތުންވެ.

އެމައުލޫމާތުން އެނގޭ ގޮތުގައި ދެ އަހަރު ވެގެންދިޔައިރު ވެސް އެ ސިސްޓަމް ބޭނުންކުރެވޭ ހާލަތަށް ގެނެވިފައެއް ނުވެ އެވެ.

Advertisement

އެގޮތުން، އެމްޑަބްލައުއެސްސީގެ މައި ފެން ހޮޅިއާ އެ ސިސްޓަމް ގުޅާލުމުގެ ފުރަތަމަ ކަނެކްޝަން ނިމިފައިވާ ކަމަށް ޑިފެންސުން ބުނެފައިވެ އެވެ.

"ދެވަނަ ކަނެކްޝަންގެ މަސައްކަތްތައް ނިމުމުން ފަޔާ ހައިޑްރަންޓުތައް ބޭނުންކުރަން ފެށުމުގެ ކުރިން ކުރަން ޖެހޭ ޓެސްޓިން ފޭސްގެ މަސައްކަތްތައް އެމްޑަބްލިއުއެސްސީއާ ގުޅިގެން ކުރިއަށް ގެންދިޔުމަށް ހަމަޖެހިފައިވޭ،" ޑިފެންސުން ބުނެފައިވެ އެވެ.

އަދި، ޓެސްޓިންގެ މަސައްކަތްތައް ނިމުމާ އެކު "ކައިރި މުސްތަގުބަލެއްގައި" އެ ސިސްޓަމް ބޭނުންކުރަން ފެށޭނެ ކަމަށް ބުނެފައިވެ އެވެ.

ފަޔާ ހައިޑްރަންޓުތައް ހަރުކުރުމުގެ މަސައްކަތް ފެށީ 2020 ވަނަ އަހަރުގެ ތެރޭގައެވެ. މި މަސައްކަތް ކުރިއަށްގެންދިޔައީ އެމްއެންޑީއެފްގެ ފަޔާ އެންޑް ރެސްކިއު ސާވިސަސް އިންނެވެ. މާލޭގައި ރޯވާ އަލިފާންގަނޑުތައް ފަސޭހަކަމާ އެކު ކޮންޓްރޯލް ކުރުމަށް މަޖީދީ މަގުގައި 12 ފަޔާ ހައިޑްރަންޓު ބަހައްޓާފައިވެ އެވެ. އެއީ، އެމްޑަބްލިއުއެސްސީ އަދި ޕްލޭނިން މިނިސްޓްރީއާ ގުޅިގެން ކުރިއަށްގެންދިޔަ މަސައްކަތެކެވެ.