ތުރްކިޔޭ އާއި ސީރިޔާ އަށް އައި ބާރުގަދަ ބިންހެލުން އައިތާ 129 ގަޑިއިރުފަހުން ބިންހެލުން ތަކުގައި ވެއްޓި ހަލާކުވި ތުރކިޔޭގެ ޢިމާރާތެއްގެ ދަށުން 5 މެމްބަރުންގެ އާއިލާއެއް ސަލާމަތްކޮށްފިއެވެ.
ރެސްކިޔު ޓީމުން ސަލާމަތް ކުރި އާއިލާ ތިބީ ބިންހެލުމުގައި ވެއްޓި ހަލާކުވި އެ މީހުންގެ ގޭގެ އިމާރާތުގެ ދަށުގައެވެ.
ރެސްކިޔު ޓީމުން ފުރަތަމަ ސަލާމަތްކުރީ ކުދިންގެ މަންމަ އާއި އެއް އަންހެން ކުއްޖެކެވެ. އެއަށްފަހު ބައްޕަ ސަލާމަތް ކުރުމަށް މަސައްކަތް ކުރުމުން ބައްޕަ ހަސަން އަސްލަން އެދުނީ އޭނާގެ ފިރިހެން ދަރިފުޅާއި އަނެއް އަންހެން ދަރިފުޅު ޒައިނަބް ސަލާމަތް ކޮށްދިނުމަށެވެ.
ކުދިން ސަލާމަތް ކުރުމަށްފަހު ބައްޕަ ހަސަން އަސްލަން ހަލާކުވެފައިވާ އިމާރާތުގެ ކޮންކްރިޓް ތައް ދަށުން ނެގުމާއިއެކު މުޅި ތަން ތަކްބީރުގެ އަޑުން ގުގުމައިގެން ދިޔައެވެ.
ކާރިސާ އަށް 129 ގަޑިއިރަށްފަހު މިއަދު ތުރުކިޔޭގައި 9 މީހަކު ސަލާމަތް ކުރެވުނެވެ. ދިރިތިއްބާ މީހުން ސަލާމަތް ކުރެވިދާނެ ކަމުގެ އުންމީދު ފަނޑުވަމުންދާ މިވަގުތަކީ މޫސުމީ ފިނަކަމާއި ވެސް އިންތިހާއަށް ކުރިމަތިލާން ޖެހިފައިވާ ވަގުތެކެވެ.
ތުރްކިޔޭގެ އަންކާރާގައި ހުރެ އަލްޖަޒީރާ އަށް މައުލޫމާތު ދިން ސިނެމް ކޮސެގުލް ބުނެފައިވަނީ 2 އަހަރުން ދަށުގެ 16 ކުއްޖަކު ބިންހެލުމުގެ އަސަރުއެންމެ ބޮޑަށް ކުރި ތުރްކިޔޭގެ ކަހްރަމަންމަރާންސް އިން ވެރިކަން ކުރާ ސިޓީ އަންކާރާއަށް ބަދަލުކުރެވިފައިވާ ކަމަށެވެ.
މިކުދިންނަކީ ބިންހެލުމުގެ ސަބަބުން އާއިލާތަކާއި ދެތަންވެފައިވާ ކުދިންނެވެ. ބައެއް ކުދިންނަކީ އިމާރާތްތަކުގެ ދަށުން ނެރެވި ފަރުވާ ދެވެމުންދާ ކުދިންނެވެ.
"ހުރިހާ ކުދިންވެސް ވަނީ ދެނެގަނެވިފައި، ނަމަވެސް އޮތޯރިޓީ ތަކަށް އެކުދިންގެ އާއިލާތަކާއި ހަމައަށް ވާސިލް ވެވޭނެ ގޮތެއް ވަނީ ނުވެފައި" ސިނެމް ބުނެފައިވެއެވެ.
"އެކުދިން އެދަނީ އައިސީޔޫ ގައި މަރާއި ހަނގުރާމަ ކުރަމުން، އޮތޯރިޓީ ތަކުން ދަނީ އެކުދިންގެ އާއިލާތައް ހޯދުމަށް މަސައްކަތް ކުރަމުން" އޭނާ ބުންޏެވެ.
ދުވަސް ނުފުރާ ވިހައިފައިވާ ކުދިންނަށް، އެކުދިންގެ ހަށިގަނޑު ފުރިހަމަވެ ބާރު ޖެހެންދެން އައިސީޔޫގައި ފަރުވާދެމުން ދާނެ ކަމަށާއި ދެން ތިބި ކުދިން ސަރުކާރުން ކަނޑައަޅާ ފޯސްޓަރ މައިންނާ ހަވާލުކުރާނެއެވެ.
"ކުދިންތިބީ ރަނގަޅު ހާލެއްގައި، އެއްކުއްޖަކީ 28 ހަފްތާގައި އުފަންވި ކުއްޖެއް، އަނެއް ކުއްޖާއަކީ 33 ހަފްތާގައި އުފަންވި ކުއްޖެއް، ސިއްހަތަށް ލިބެމުއް އަންނަ ކުރިއެރުންތައް ބަލައި އެކުދިން ޑިސްޗާރޖް ކުރެވޭނެ" ތުއްތު ކުދިން ބަދަލު ކުރެވުނު ހޮސްޕިޓަލުގެ ޑޮކްޓަރ ފާރިތް ކުލާލް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
