އިގިރޭސި ޕްރެމިއާ ލީގުގައި މިއަދު ހަވީރު ޗެލްސީ އާއި ވެސްޓް ހޭމް ވަދަކުރި މެޗު 1-1 ގެ ނަތީއްޖާއަކުން އެއްވަރުވެގެން ނިމިއްޖެއެވެ. މިއީ ލީގުގައި ޗެލްސީ އެންމެ ފަހުން ކުޅުނު 5 މެޗުގެ ތެރެއިން ޖެހިޖެހިގެން އެއްވަރުވި ތިން ވަނަ މެޗެއެވެ.

ވެސްޓް ހޭމް ދަނޑުގައި ކުޅުނު މި މެޗުގައި ފުރަތަމަ ލަނޑުޖަހައި ލީޑުހޯދީ ޗެލްސީ އިންނެވެ. މި ލަނޑު ފުރަތަމަ ހާފުގެ 16 ވަނަ މިނެޓުގައި އެޓީމަށް ކާމިޔާބުކޮށްދިނީ ނިމިދިޔަ ޖެނުއަރީ ޓްރާންސްފާ މާކެޓުގައި ސްޕެއިންގެ އެތްލެޓިކޯ މެޑްރިޑުން، ލޯނު އެއްބަސްވުމެއްގެ ދަށުން މި ސީޒަނުގެ ނިޔަލަށް އެޓީމާއި ގުޅުނު ޕޯޗުގަލްގެ ފޯވާޑް ޖޮއާއޯ ފެލިކްސް އެވެ.

އެމަރސަން ވެސްޓް ހޭމްގެ ގޯލް ކާމިޔާބުކޮށްދެނީ

މިއީ ޗެލްސީއަށް ކުޅުނު ފުރަތަަ މެޗުގައި ދެއްކި ރާތް ކާޑުގެ ސަސްޕެންޝަނަށް ފަހު ފިލިކްސް ކުޅުނު ފުރަތަމަ މެޗެވެ. އަދި މި ލަނޑު ޖެހުމަށް ފުރުސަތު ތަނަވަސްކޮށްދިނީ ރެކޯޑް ޓްރާންސްފާ ފީއެއްގައި ޖެނުއަރީ މަހު އެޓީމާއި ގުޅުނު އާޖެންޓީނާގެ ޒުވާން މިޑްފީލްޑަރ އެންޒޯ ފެނާންޑޭޒް އެވެ. 

މެޗުގެ ފުރަތަމަ ހާފުގައި ގިނަވަގުތު ބޯޅަ ގެންގުޅެ ޗެލްސީ އިން މެޗު ޑޮމިނޭޓުކުރި ނަމަވެސް ހާފު ނިމުމުގެ ކުރިން ވެސްޓް ހޭމް އިން ލަނޑެއް ކާމިޔާބުކޮށް މެޗުގެ ނަތީއްޖާ އެއްވަރުކުރިއެވެ. މި ލަނޑު އެޓީމަށް ކާމިޔާބުކޮށްދިނީ ކުރިން ޗެލްސީ އަށް ކުޅުނު އިޓަލީގެ ޑިފެންޑަރ އެމަރސަން އެވެ. މިއީ އެޓީމުގެ އިގިރޭސި ޖެރޮޑް ބޯވެން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަމަ ހާފުގެ ކުޅުން ނިމިގެން ދިޔައީ 1-1 ގެ ނަތީއްޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައިވެސް ގިނަވަގުތު ބޯޅަ ގެންގުޅެ މެޗު ޑޮމިނޭޓުކުރީ ޗެލްސީ އިންނެވެ. ނަމަވެސް މިހާފުގައި ދެ ޓީމުންކުރެ އެއްވެސް ޓީމަކަށް އިދިކޮޅު ޓީމުގެ ގޯލާއި އަމާޒުކޮށް ނުރައްކާތެރި ހަމަލާއެއް ފޮނުވާލެވިފައެއްނުވެއެވެ. 

މިރޭގެ މެޗުން ލިބުނު ޕޮއިންޓާއި އެކު 22 މެޗުން 31 ޕޮއިންޓް ހަމަކޮށް، ލީގު ތާވަލުގައި ޗެލްސީ މިވަގުތު އޮތީ 9 ވަނައިގައެވެ. 22 މެޗު ކުޅެގެން ލިބުނު 20 ޕޮއިންޓާއި އެކު ވެސްޓް ހޭމް މިވަގުތު އޮތީ ތާވަލުގެ 16 ވަނައިގައެވެ.