އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި ބްރެންޓްފޯޑް އާއި ވާދަކޮށް 1-1 ގެ ނަތީއްޖާއަކުން އެއްވަރުވެ ލީގުގެ އެއްވަނާގައި ލީޑު ފުޅާކުރުމަށް ލިބުނު ފުރުސަތު އާސެނަލް އިން ނަގާލައިފިއެވެ.

މިރޭގެ މެޗުގެ ފުރަތަމަ ހާފުގައި ގިނަވަގުތު ބޯޅަ ގެންގުޅެ އާސެނަލް އިން މެޗު ޑޮމިނޭޓުކުރި ނަމަވެސް މިހާފުގައި ލަނޑުޖަހަން އެންމެ ހުސް ފުރުސަތެއް ލިބުނީ ބްރެންޓްފޯޑްގެ އިގިރޭސި ފޯވާޑް އިވާން ޓޯނީ އަށެވެ. އާސެނަލްގެ ކީއްޕަރު ކައިރިން ނައްޓާލުމަށް ފަހު އޭނާ ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއަށެވެ.

އިވާން ޓޯނީ

ދެވަނަ ހާފުގައި އާސެނަލް އިން އެޓީމުގެ އެޓޭކުތައް އިތުރަށް ވަރުގަދަކުރުމުގެ ނަތީއްޖާއެއްގެ ގޮތުން 62 ވަނަ މިނެޓުގައި އެޓީމުން ލަނޑެއް ކާމިޔާބުކޮށް މެޗުގެ ލީޑު ނެގިއެވެ. މިލަނޑު އެޓީމަށް ކާމިޔާބުކޮށްދިނީ ދެވަނަ ހާފުގައި ބަދަލުކުޅުންތެރިއެއްގެ ގޮތުގައި ކުޅެންނުކުތް ބެލްޖިއަމްގެ މިޑްފީލްޑަރ ލިއަންޑްރޯ ޓްރޮސާޑް އެވެ. މިއީ އެޓީމުގެ އިގިރޭސި ފޯވާޑް ބުކަޔޯ ސަކާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކުރި ލަނޑެކެވެ.

މި ލަނޑާއި އެކު އާސެނަލް މޮޅުވާންދަނިކޮށް ބްރެންޓްފޯޑަށް މެޗުގެ ނަތީއްޖާ އެއްވަރުކޮށްދިނީ މިސީޒަނުގައި މޮޅު ކުޅުމެއް ދައްކަމުން އަންނަ އިގިރޭސި ފޯވާޑް އިވާން ޓޯނީ އެވެ. މިއީ މިސިޒަނުގައި ޕްރެމިއާ ލީގުގައި ކުޅުނު 20 މެޗުގައި އޭނާ ކާމިޔާބުކުރި 14 ވަނަ ލަނޑެވެ. މި ލަނޑާއި އެކު މެޗުގެ ކުޅުން ނިމިގެން ދިޔައީ 1-1 ގެ ނަތީއްޖާއަކުން ދެޓީމު އެއްވަރުވެގެންނެވެ.

މިރޭގެ މެޗު އެއްވަރުވި ނަމަވެސް މިހާރުވެސް އާސެނަލް އޮތީ ހަ ޕޮއިންޓްގެ ލީޑަކާއި އެކު ތާވަލުގެ އެއްވަނައިގައެވެ. ލީގުގައި ކުޅުން 21 މެޗުން އެޓީމަށް 51 ޕޮއިންޓް ލިބިފައިވާއިރު ދެވަނާގައި އޮތް މެންޗެސްޓަރ ސިޓީއަށް 21 މެޗުން ލިބިފައިވަނީ 45 ޕޮއިންޓެވެ. މިރޭގެ މެޗުން ލިބުނު ޕޮއިންޓާއި އެކު ކުޅުނު 22 މެޗުން ބްރެންޓްފޯޑަށް ވަނީ 34 ޕޮއިންޓް ލިބިފައެވެ. އެޓީމު މިވަގުތު އޮތީ ޕްރެމިއާ ލީގު ތާވަލުގެ 8 ވަނައިގައެވެ.