މި ފާއިތުވި ހަފްތާގެ ހޯމަ ދުވަހު ތުރްކިޔޭ އާއި ސީރިޔާ އަށް އައި ބާރުގަދަ ބިންހެލުން ތަކުގައި ދެޤައުމުން މަރުވި މީހުންގެ ޢަދަދު މިހާރު ވަނީ 29000 އަށް އަރައިފައެވެ.

ސަލާމަތުން ގިނަ ބަޔަކު ފެނިދާނެ ކަމަށް ކުރަމުންދާ އުންމީދު ފަނޑުވި ނަމަވެސް ރެސްކިޔު ވޯކާސް ދަނީ ވެއްޓިފައިވާ އިމާރާތް ތަކުގެ ދަށުން މީހުން ސަލާމަތުން ނެރެވޭތޯ މަސައްކަތް ކުރަމުންނެވެ. ކާރިސާއަށް ފަސްދުވަސް ފާއިތުވި ފަހުންވެސް ބައެއް މީހުން ވަނީ ސަލާމަތުން ނެރެވިފައެވެ.

ތުރްކިޔޭ އިން މިހާތަނަށް 24700 މީހުން މަރުވެފައިވާއިރު ސީރިޔާގެ 3500 މީހުން ވަނީ މަރުވެފައެވެ.

ބިންހެލުން ތަކުގެ އަސަރު ކުރި ސަރަހައްދެއްގައި ހުރި އަލްޖަޒީރާގެ ރިޕޯޓަރު

ބަރްނަޑް ސްމިތް ބުނެފައިވަނީ ހަލާކުވެފައިވާ އިމާރާތް ތައް ހުރި ސަރަހައްދު ތަކުން ފެންނަނީ މާޔޫސްކަން ކަމަށާއި ނަމަވެސް އަދިވެސް އުންމީދު ކަނޑައިނުލާކަމަށެވެ.

"އަހަރެމެން މިހާރު މިތިބީ ކާރިސާ ހިނގިތާ 135 ގަޑިއިރު ވޭތުކޮށްފައި، އަދިވެސް އުންމީދު އެބެއް، 132 އަށް ވީ ގަޑިއިރުތެރޭގައި ތުއްތު ކުއްޖަކު ސަލާމަތް ކުރެވުނު، އޭގެ ގަޑިއިރުތަކެއް ކުރިން ދެމަފިރިޔަކުވެސް، އަންހެންމީހާވެސް ފިރިހެން މީހާވެސް ހަމަ ދިރިތިއްބަ" ސްމިތް ކިޔައިދިނެވެ.

ސްމިތް އިތުރަށް ބުނީ ތުރްކިޔޭގެ ސަރުކާރުން ކުރިއަށް އޮތް 24 ގަޑިއިރުތެރޭގައި އެއަރޕޯޓުތައް ހުޅުވާނެކަން އިއްލާނުކޮށްފައިވާކަމަށެވެ.

"އެއަރޕޯޓުގެ ރަންވޭއަށް ވަނީ ވަރަށް ބޮޑަށް ގެއްލުން ލިބިފައި، ހަލާކުވެފައިވާ ތަންތަނުގއި ތާރު އެޅުމުގެ މަސައްކަތް ކުރާނެ ކަމަށް، އެއަރޕޯޓު ހުޅުވުމަކީ މިވަގުތައް ވަރަށް މުހިންމު ކަމެއް، އެހީ ހިފައިގެން އަންނަ ފަރާތްތަކަށް ފަސޭހަ ކަމާއި އެކު މިތަނަށް ވާސިލް ވެވޭނީ އޭރުން" ސްމިތް ކިޔައިދިނެވެ.

މީގެ އިތުރުން އިރުދެކުނު ތުރްކިޔޭގެ ހަޓޭ ޕްރޮވިންސް ގައި ބިންހެލުމުގެ ސަބަބުން ހަލާކުވެފައިވާ އިމާރަތްތަކުގެ ދަށުން ހާދިސާއަށް ހަފްތާއެއްހާ ދުވަސް ފަހުން ވަނީ 6 މަހުގެ ތުއްތު ކުއްޖަކު ސަލާމަތުން ނަގައިފައެވެ. އަދި ހާދިސާ އަށް 140 ގަޑި އިރުފަހުން ގަޒިއަންޓިޕްގެ ހަލާކުވެފައިހުރި އިމާރާތްތަކުގެ ދަށުން  13 އަހަރުގެ އަސްމާ ސުލްޠާން ވަނީ ސަލާމަތްކޮށްފައެވެ.

ސަލާމަތުން މީހުން ނެރެވޭނެ ކަމުގެ އުންމީދު ފަނޑުވަމުން ދިޔަ ނަމަވެސް ތުރްކިޔޭ އާއި ސީރިޔާގެ މީސްތަކުން އަދިވެސް އުންމީދު މުޅިއެކުން ކަނޑައެއް ނުލައެވެ.