ޕާކިސްތާނުގައި އިސްލާމްދީނަށް ފުރައްސާރަކޮށް ކީރިތި ޤުރުއާނަށް ބޭއަދަބީކަން ދެއްކި މީހަކު އަންދާލުމަށް އާންމުންގެ ތެރެއިން ބަޔަކު މަސައްކަތް ކޮށްފިއެވެ.

ޕާކިސްތާނުގެ އިރުމަތީ ޕަންޖާބުގައި ގިނަ ޢަދަދެއްގެ މުސްލިމުން ތަކެއް ޕޮލިސްސްޓޭޝަން ކައިރިއަށް އެއްވެ ގަދަކަމުން ޕޮލިސްސްޓޭޝަންގެ އެތެރެއަށް ވަދެގަނެ އެކަންކުރި މީހާ ހުރި ޖަލުގޮޅިން ނެރެގެން ގެންގޮސް އޭނާ އަށް ވަނީ އަނިޔާކޮށްފައެވެ.

ސީނިއަރ ޕޮލިސް އޮފިސަރ ބައްބަރް ސަރަފްރާޒް އަލްޕާ ވިދާޅުވީ ހޮނިހިރު ދުވަހު ވާރިސް ނަމަކަށް ކިޔާ މީހަކު ޕޮލިސް ކަސްޓަޑީ އަށް ގެނެވުނު ކަމަށާއި، އޭނާ ޕޮލިހަށް ގެނެވުނީ ކީރިތި ޤުރުއާން މުސްޙަފެއްގެ ސަފްޙާ ތަކެއްގައި އޭނާ އާއި އޭނާގެ އަނބިމީހާ އަދި ވަޅިއެއްގެ ފޮޓޯތަކެއް ތަތްކޮށް އެހެން މީހުނަށް އެފެންނާނެ ހެން ދައްކައި ހެދުމަށް ފަހު ނަންކާނާ ކިޔާ ޑިސްޓްރިކް އެއްގެ ގަސްގިނަ ސަރަހައްދަކަށް އެއްލާލި ކަމުގެ ތުހުމަތުތަކާއި އެކުގައި ކަމަށެވެ.

އޮފިސަރ ސަރަފްރާޒް ވިދާޅުވެފައިވަނީ ރުޅިވެރިކަން ހާމަކުރަމުންދިޔަ މީހުންގެ ތެރެއިން އެއްބަޔަކު ބޮޑު ހަރުގަނޑެއް ހިފައިގެން އައިސް މުޒާހަރާ ކުރަމުން ދިޔަ މީހުންނަށް ވަދެވޭނެ ހެން ޕޮލިސްސްޓޭޝަންގެ ގޭޓު ހަލާކުކޮށްލި ކަމަށާއި، އެހާ ހިސާބުން އާންމުން ޕޮލިސްސްޓޭޝަނަށް ވަދެގަނެ ތަނަށް ގެއްލުންދީ ވާރިސް ހުރި ޖަލު ގޮޅިން ނެރެގެން ގެންގޮސްފައިވާ ކަމަށެވެ.

"ރުޅިވެރިކަން ފާޅުކުރަމުންދިޔަ އާންމުން ކޮންޓްރޯލް ކުރުމަށް އިތުރު ޕޮލިހުންނަށް އެހިސާބަށް ދެވުނުއިރު ޢާންމުން ވާރިސް އަށް އަނިޔާކޮށް އޭނާ ގައިގައި ރޯކޮށްލުމަށް ދިޔައީ މަސަކަތް ކުރަމުން، ހެޔޮ ވިސްނޭ ބައެއް ރައްޔިތުންނާއި ޕޮލިހުންގެ މަސައްކަތުން ވާރިސް ވަނީ ރޯކޮށްލުމުގެ ކުރިން ސަލާމަތްކުރެވިފައި" ސަރަފްރާޒް ވިދާޅިވިއެވެ.

ޕާކިސްތާނުގެ ޤާނޫނުގައި އޮންނަ ގޮތުން އިސްލާމްދީނަށް ފުރައްސާރަކުރުމަކީ މަރުގެ އަދަބު ދެވޭކަމެކެވެ.