އާރުޑީސީއަށް ދިގު މުއްދަތުން ނުފެށުނު މަސައްކަތް ތިން ދުވަހުން އެމްޓީސީސީން ނިންމައިލުމުން އެނގެނީ އާރުޑީސީއަކީ އުވައިލަންޖެހޭ ކުންފުންޏެއްކަން ކަމަށް ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަޙްމަދު އުޝާމު ވިދާޅުވެއްޖެއެވެ.

އުޝާމް މިފަދައިން ވިދާޅުވެފައި ވަނީ، މި ފެބްރުއަރީ މަހުގެ ނިޔަލަށް އަމީނީ މަގުގެ މަސައްކަތް ނިންމާނެ ކަމަށް އާރްޑީސީން ބުނެފައި ވީނަމަވެސް އެކަން ނުކުރެވި ލަސް ވުމުގެ ސަބަބުން، އެމްޓީސީސީ އަށް އެމަސައްކަތް ހަވާލުކޮށް، އެ ކުންފުނިން އަމީނީމަގުގެ ތާރު އެޅުމުގެ މަސައްކަތް ވަރަށް ހަލުއިކަމާއި އެކު ކުރިއަށް ގެންދަން ފަށާފައިވާތީ އެވެ.

އެގޮތުން އުޝާމް ކުރެއްވި ޓްވީޓެއްގައި ވިދާޅުވީ، އެ ކަމުންވެސް އެނގެނީ އާރްޑީސީ އަކީ އުވާލަންޖެހޭ ކުންފުންޏެއްކަން ކަމަށެވެ.

Advertisement

އަދި އެފަދަ "ބޭކާރު" ކުންފުނިތައް އުވާލުމުން ދައުލަތަށް ލިބޭ ޓެކްސް ފައިސާއިން އެތައް ސަތޭކަ މިލިއަން ރުފިޔާއެއް ސަލާމަތްކުރެވޭނެ ކަމަށާ އެއީ ދައުލަތުގެ ހަރަދުތައް ކުޑަކުރުމަށް މިހާރުވެސް ކުރަންވެއްޖެ ކަމެއް ކަމަށް އުޝާމް ވިދާޅުވި އެވެ. 

އާރުޑީސީއާ ހަވާލުކޮށްގެން ހަދަމުން އަންނަ އަމީނީ މަގުގެ މަސައްކަތް ލަސްވާތީ، މަސައްކަތް އަވަސްކުރުމަށް، އެ މަގުގައި ތާރުއެޅުން އެމްޓީސީސީއާ ހަވާލުކުރީ މިދިޔަ ބުރާސްފަތި ދުވަހު އެވެ. ހުކުރު ދުވަހު އެމްޓީސީސީން އެ މަގުގައި ތާރުއެޅުމުގެ އަމަލީ މަސައްކަތް ފަށައި، އާރުޑީސީން ޕޭވިންގެ މަސައްކަތް ނިންމާފައި އޮތް ފުރަތަމަ ސެގްމަންޓްގައި މިހާރު އޮތީ ތާރުއެޅުމުގެ ކުރިން ލާންޖެހޭ އޭބީސީ ފަށަލަ ވެސް ލައިފަ އެވެ.

އަދި އެމްޓީސީސީގެ ސީއީއޯ އާދަމް އާޒިމް ވަނީ އާރުޑީސީން އެ ކުންފުންޏާ ހަވާލުކުރީ ސްޓެލްކޯ އިމާރާތް ނިމޭ ހިސާބަށް ތާރުއެޅުމުގެ ހުރިހާ މަސައްކަތެއް ކުރުމަށް ކަން ފާހަގަކުރައްވައި އެ މަސައްކަތް އަންނަ ބުދަ ދުވަހަށް އެއްކޮށް ނިންމާލެވެނޭ ކަމަށް ވިދާޅުވެފައެވެ.