މި ހަފްތާގެ ބުދަ ދުވަހުގެ ނިޔަލަށް އަމީނީ މަގު އިރުން ސްޓެލްކޯ އިމަރާތާއި ހަމަޔަށް ތާރު އަޅާ ނިންމޭނެކަމަށް އެމްޓީސީސީއިން ބުނެފި އެވެ. 

އެމްޓީސީސީގެ ސީއީއޯ  އާޒިމް "ވޮއިސް" އަށް ދެއްވި އިންޓާވިއުއެއްގައި ވިދާޅުވީ އެމްޓީސީސީއާއި ހަވާލުކޮށްފައިވަނީ އަމީނީ މަގު އިރުން ސްޓެލްކޯ އިމްރާތާއި ހަމަޔަށް ތާރު އެޅުމަށް ކަމަށެވެ.

އެ މަސައްކަތް ބާރު ސްޕީޑުގައި ކުރިއަށް ދާ ކަމަށާއި، 3 ދުވަސް ތެރޭ އަމީނީ މަގުގައި ތާރު އަޅަން އެމްޓީސީސީއާއި ހަވާލުކުރި ހިސާބަށް މަސައްކަތް ނިންމާލެވޭނެކަމަށް އާޒިމް ވިދާޅުވި އެވެ. 

Advertisement

މާލޭ ސިޓީ ކައުންސިލްގެ އަތުން އަމީނީ މަގު ހެދުމުގެ މަސައްކަތް އަތުލާ ޕްލޭނިން މިނިސްޓްރީ މެދުވެރިކޮށް އާރުޑީސީއާއި ހަވާލުކޮށްފައިވަނީ 7 މަސް ތެރޭ އެ މަސައްކަތް ނިންމުމަށެވެ. 

އެ މަސައްކަތާއި ހަވާލުވަމުން އާރުޑީސީގެ މެނޭޖިން ޑިރެކްޓަރު މޫސާ އަލިމަނިކު (މުކޭ) ވިދާޅުވީ މާލޭ ސިޓީގެ މޭޔަރު ޑރ މުއިއްޒަށް 7 އަހަރު ދުވަސްތެރޭ ނެހެދުނު އަމީނީ މަގު 7 މަސްތެރޭ ނިންމާލައްވާނެ ކަަމަށެވެ.

އެގޮތުން ފެބްރުއަރީ މަހުގެ ނިޔަލަށް އަމީނީ މަގުގައި ތާރުއަޅާ އެ މަގު އާންމުންނަށް ހުޅުވަން ޖެހެއެވެ. އެހެން ނަމަވެސް، އެ ތާރީހަށް އަމީނީ މަގުގެ މަސައްކަތް ނުނިމި ދިގުލައިގެން ދިއުމާއި ގުޅިގެން މަސައްކަތް ނިންމަން މިހާރު ވަނީ އިތުރު މުއްދަތެއް ދީފަ އެވެ. 

އޭގެ އިތުރުން އަމީނީ މަގުގެ މަސައްކަތް ލަސްވަމުން ދިއުމާއި ގުޅިގެން އެ މަސައްކަތް އަވަސް ކުރުމަށް އެމްޓީސީސީއާއި ވަނީ ހަވާލުކޮށްފަ އެވެ. އެމްޓީސީސީއާއި ހަވާލުކުރީ ތާރު އެޅުމުގެ މަސައްކަތެވެ. 

ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ އަމީނީ މަގުގައި ތާރު އެޅުމުގެ މަސައްކަތް އެމްޓީސީސީއާއި ހަވާލުކުރީ އަމީނީމަގުގައި ތާރުއެޅުން ލަސްވެ، އާންމުންނަށް ތަކުލީފުތަކެއް އުފުލަން ޖެހިފައިވާތީ، އެ މައްސަލައަށް އަވަސް ހައްލެއް ކަމަށެވެ. 

ތާރުއެޅުން އެމްޓީސީސީއާ ހަވާލުކުރީ އެ ކަމަށްޓަކައި އާރުޑީސީން ރާއްޖެ ގެނެސްފައިވާ މެޝިން ބަހައްޓާނެ ޖާގަ ހަމަނުޖެހި ދުވަސްތަކެއް ވާތީކަންވެސް އަކްރަމް ފާހަގަކުރެއްވި އެވެ.