ހަލާކުވެ ފުނޑުފުނޑުވެފައިވާ އިމާރާތް ތަކުގެ ދަށުން ދެން ފެންނާނީ ހުސް ކަށިތައް ކަމަށް ތުރްކިޔޭގެ އާއިލާތަކުން ބުނެފިއެވެ.
ފާއިތުވި ހަފްތާގައި ތުރްކިޔޭ އަށް އައި ބިންހެލުމުގައި ވެއްޓި ހަލާކުވި އިމާރާތްތަކުގެ ތެރެއިން އެރްދުމް އަވްސަރޯގުލް ގެ ދައްތަ އާއި އޭނާގެ ފިރިމީހާ އަދި އެދެމަފިރިންގެ ދެކުދިން ތިބީ އެމީހުން ދިރިއުޅެމުންދިޔަ އަންޓަކާޔާގެ އެޕާޓްމެންޓް ހިމެނޭ އިމާރާތް ވެއްޓި އޭގެ ދަށުގައި ތާށިވެފައެވެ. އޭރު އެމީހުން ދިރިތިއްބެވެ. އިމާރާތުގެ ދަށުގައި ތިބެ ރެސްކިޔު ޓީމާއި ވާހަކަވެސް ދެއްކިއެވެ.
އޭގެ އެއްދުވަސް ފަހުން އެ ހާލަތުބަދަލުވީ ވެއްޓިފައިވާ އިމާރާތުގެ ދަށުގައި އަލިފާން ރޯވުމުންނެވެ. ޤަބޫލުކުރެވޭ ގޮތުގައި އަލިފާން ރޯވީ ޖަނެރޭޓަރެއްގައެވެ. އެރްދުމް އަކީ ޕްރޮފެޝަނަލް ފަޔަރފައިޓަރެކެވެ. އޭނާގެ އާއިލާ އެ ހާލުގައި ތިބި އިރު އަލިފާންގަނޑު ނިއްވާލާނެ ގޮތެއް ނެތި އެމަންޒަރު ބަލަހައްޓައިގެން ހުރީ ހަދާނެގޮތެއް ނެތިފައެވެ.
އަލިފާންގަނޑު ނިވުމަށްފަހު އެއާއިލާގެ ހަބަރެއް ނުވެއެވެ. ރޯވި އިމާރާތުގެ ތެރެއިން ހޫނު މުޅި ހިސާބަށް ދިޔައީ ފޯރަމުންނެވެ. އޭގެ ފަސްދުވަސް ފަހުން އިމާރާތުގެ ގައުތަށް އެއްފަރާތައް ޖައްސައި ސާފު ކުރަމުންދިޔައިރު އެއިމާރާތުގެ ދަށުން އެއާއިލާގެ އެއްވެސް މެމްބަރެއްގެ އަސަރެއްވެސް ފެނިފައެއް ނުވެއެވެ.
އެރްދުމް އަށް އޭނާގެ ދައްތަގެ އާއިލާއާއި ބައްދަލުވުމުގެ އުންމީދު ވަނީ އެއްކޮށްގެއްލިފައެވެ.
"މިއަދަށް މިވީ 7 ދުވަސް، އަހަރެމެން މިހާރު ބޭނުންވަނީ އާއިލާމީހުންގެ ހަށިގަނޑުތައް، އެކަމަކު އަހަރެމެންނަށް އެއްވެސް އެއްޗެއް އެތަނަކުން ނުފެނޭ، ވެދާނެ އެމީހުން އެނދީކަމަށްވެސް" އެރްދުމް ބުނެފައިވެއެވެ.
މީހުން ހޯދުމުގެ މަސައްކަތް ކުރިއަށް ދަނީ/ ތުރްކިޔޭ
އެއިމާރާތުގައި 80 މީހުން ދިރިއުޅެއެވެ. އަލިފާން ރޯވުމުގެ ކުރިން 21 މީހަކު ވަނީ ސަލާމަތުން ނެރެވިފައެވެ. މަރުވެފައިވާ 12 ހަށިގަނޑެއް ވަނީ ނެރެވިފައެވެ. ބާކީ 47 މީހުން އަދިވެސް ވީނުވީއެއް ނޭނގި ވަނީ ގެއްލިފައެވެ. އިމާރާތުގެ ދަށުން ނެރުނު ހަށިތައް ހުރީ ވަރަށްބޮޑަށް ހަލާކުވެފައެވެ.
"ބައެއް އާއިލާތަކުން ގެންދިޔައީ،އެމީހުންގެ ތިމާގެ މީހުންގެ ކަށިތައް އެކަނި" އެރްދުމް ބުންޏެވެ.
10 އަހަރަށްވުރެ ގިނަ ދުވަސްވީ އިމާރާތްތައް ނުވެއްޓި ހުރިއިރު 10 އަހަރު ވީ އިމާރާތެއް ވެއްޓި ފުނޑުފުނޑުވުމުން އެ އިމާރާތުގައި ދިރިއުޅޭ އާއިލާތަކާއި ރެސްކިޔުވޯކާސް ތިބީ އެކަމުގެ ހިތްހަމަނުޖެހުން މަތީގައެވެ. އިމާރާތް ކުރި ކޮންސްޓްރަކްޝަން ކުންފުނިތަކުން ވަނީ މަކަރު ހަދައި އޮޅުވާލާފައި ކަމަށް އެފަރާތްތަކުން ދަނީ ބުނަމުންނެވެ. ރެސްކިޔުވޯކާސް ދަނީ ހެކީގެ ގޮތުގައި އިމާރާތުން ވެރިފައިވާ ތަނބުގެ ބައިތައް ނަގަމުންނެވެ.
ސަރުކާރުގެ ފަރާތުން އެހީތެރިކަން ލިބޭ މިންވަރު ކުޑަވެ، ރެސްކިޔުވޯކާސް ތިބީ ހިތްހަމަނުޖެހިފައެވެ. ސެރްހަތް ޑޭޑޭ ނަމަކަށް ކިޔާ ރެސްކިޔު ވޯކަރަކު ވެސް ވަނީ އޭނާގެ އާއިލާ ހޯދުމަށް މަސައްކަތް ކުރަމުންނެވެ. އޭނާ އަށް ވެސް އިމާރާތުގެ ތެރެއިން ނެރުނު ހަށިތަކުގެ ތެރެއިން ވަކިކުރަން އެނގިފައިވައިވަނީ އޭނާގެ ބައްޕަ އެކަންޏެވެ.
"ހަފްތާއެއް ވަންދެން އެއްވެސް އެހީތެރިކަމެއް ނެތި މިމަސައްކަތް ކުރީ، އެކަށީގެންވާ ރަނގަޅު ސާމާނާއި އެކު މަސައްކަތް ކުރެވުނު ނަމަ 40 ހަކަށް 50 ހަކަށް މީހުން ސަލާމަތް ކުރެވުނިސް" ސެރްހަތް ބުނެފައިވެއެވެ.
މި ބިންހެލުން ތަކުގެ ސަބަބުން މަރުވި މީހުންގެ ޢަދަދު 30000 މައްޗައް އަރައިގެން ގޮސްފައިވާއިރު އެތައް އިމާރާތެއް ވަނީ ވެއްޓި ހަލާކުވެފައެވެ. ހަލާކުނުވެ ކޮއްޅަށް ހުރި އިމާރާތެއް ނަމަ ހުރީ ރެނދުލައި މީހުން ވަދެ ނުކުތުމަށް ނުރައްކާވާ ހިސާބުގައެވެ.
އިމާރާތްތަކުގެ ވެއްޓިފައިވާ ފާރުތަކުގެ ތެރެއިން ވީރާނާކަން ދަނީ ފެންނަމުންނެވެ. ހަލާކުވެފައިވާ ފަރުނީޗަރުތަކާއި، އެކިދިމަދިމާއިން ނުކުމެ ފައި ހުރި ދަނގަޑު ތަކާއި ވެރިފައިވާ ކޮންކްރިޓް ތަކެވެ. ބައެއް ފާރުތަކުން ފެންނަން ހުރި ހިނިތުންވެފައިވާ މޫނުތަކާއި އެކު ނެގިފައިވާ އާއިލީ ފޮޓޯތަކެވެ. އެތައް މަސައްކަތަކުން އާބާދު ކުރި ދިރިއުޅުން ކުޑަ ހިނދުކޮޅެއްގެ ތެރޭގައި ފުނޑުފުނޑުވި މަންޒަރުން އެލޯތައް ވަނީ ތެންމާލައިފައެވެ.
Advertisement
This content is created and paid for by advertisers and does not involve Voice Journalists
