އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި ވާދަވެރި އެވަޓަން 2-0 ގެ ނަތީއްޖާއަކުން ބަލިކޮށް ލިވަޕޫލް އިން ލީގު ތާވަލުގެ 9 ވަނައަށް ކުރިއަށް ޖެހިލައިފިއެވެ. 

މިސީޒަނުގައި ލިވަޕޫލްގެ ގިނަ ކުޅުންތެރިންގެ ފޯމު ދަށްވެ، އެޓީމުގެ ފަރާތުން ދަށް ނަތީއްޖާތަކެއް ފެނިގެން ގޮސްފައިވާއިރު، ލީގުގައި އެންމެ ފަހުން ކުޅުނު ތިން މެޗުން އެޓީމަށް މޮޅެއް ހޯދިފައެއްނުވެއެވެ. ނަމަވެސް މިރޭގެ މެޗުގައި ލިވަޕޫލުގެ ފަރާތުން ރަގަޅު ކުޅުމެއް ފެނިގެން ގޮސްފައިވެއެވެ. 

މިރޭގެ މެޗުގެ ފުރަތަމަ ހާފުގައި ލިވަޕޫލުން ގިނަވަގުތު ބޯޅަ ގެންގުޅެ މެޗު ޑޮމިނޭޓުކުރި ނަމަވެސް، އެންމެ ފުރަތަމަ ނުރައްކާތެރި ހަމަލާއެއް ފެނިގެން ދިޔައީ އެވަޓަންގެ ފަރާތުންނެވެ. ފުރަތަމަ ހާފުގެ 36 ވަނަ މިނެޓުގައި ކޯނަރަކުން ލިވަޕޫލުގެ ގޯލް ކުރިމަށްޗަށް ހުރަސްވި ބޯޅައެއް އެވަޓަންގެ އިގިރޭސި ޑިފެންޑަރ ޖޭމްސް ޓާކޮވްސްކީ ބޮލުން ފޮނުވާލުމުން އަމާޒުވީ ގޯލުގެ އަރިމަތީ ދަނޑިއަށެވެ.

ލިވަޕޫލުން މިރޭގެ މެޗުގައި ލީޑުނެގީ ފުރަތަމަ ހާފުގެ 36 ވަނަ މިނެޓުގައި އުރުގުއާއީގެ ފޯވާޑް ޑާވިން ނުނޭޒް ތަނަވަސްކޮށްދިން ފުރުސަތެއްގައި އެޓީމުގެ މިސްރު ފޯވާޑް މުހައްމަދު ސަލާހް ކާމިޔާބުކޮށްދިން ލަނޑުންނެވެ. ލިވަޕޫލްގެ ދެވަނަ ލަނޑު ދެވަނަ ހާފު ފެށިގެން ހަތަރު ވަނަ މިނެޓުގައި ކާމިޔާބުކޮށްދިނީ ނެދަލޭންޑްސްގެ ފޯވާޑް ކޯޑީ ގައްޕޯ އެވެ. މިއީ ޖެނުއަރީ ޓްރާންސްފާ މާކެޓުގައި އެޓީމާއި ގުޅުނުފަހުން އޭނާ ލިވަޕޫލަށް ކާމިޔާބުކޮށްދިން ފުރަތަމަ ލަނޑެވެ.

މިރޭގެ މެޗުން ލިބުނު ތިން ޕޮއިންޓާއި އެކު 21 މެޗުން 32 ޕޮއިންޓް ހަމަކޮށް ލިވަޕޫލް ވަނީ ތާވަލުގެ 9 ވަނައަށް ކުރިއަށް ޖެހުލާފައެވެ. އަދި މިރޭގެ މެޗުން ބަލިވި އެވަޓަން 22 މެޗު ކުޅެފައިވާއިރު އެޓީމަށް ލިބިފައިވަނީ 18 ޕޮއިންޓާއި އެކު ތާވަލުގެ 18 ވަނައެވެ.