ތުރްކިޔޭ އާއި ސީރިޔާ އަށް މިދިޔަ ހަފްތާގެ ހޯމަދުވަހު އައި ބާރުގަދަ ބިންހެލުން ތަކަކީ މުޅި މި ޤަރުނުގައި ދިމާވި އެންމެ ނުރައްކާތެރި ގުދުރަތީ ކާރިސާ ކަމަށް ވޯލްޑް ހެލްތް އޮގަނައިޒޭޝަން (ޑަބްލިޔުއެޗްއޯ) އިން ބުނެފިއެވެ.

"އަހަރެމެން މިހާރު ދެކެމުން މިދަނީ މި ޤަރުނުގެ ތެރޭގައި ޔޫރަޕަށް އައި އެންމެ ނުރައްކާތެރި ގުދުރަތީ ކާރިސާ، އަދި ވެސް އޭގެ ބާރުގަދަކަން ދެނެގަތުމޖުގެ މަސައްކަތް ކުރިއަށް ހަމަމިދަނީ" ޑަބްލިޔުއެޗްއޯ އިން ޔޫރަޕަށް ކަނޑައަޅައިފައިހުރި ޑިރެކްޓަރ ހާންސް ކުލޫގް ނިއުސް ކޮންފަރެންސެއްގައި ބުނެފައިވެއެވެ.

މި ބިންހެލުންތަކުގެ އަސަރު ސިރީޔާ އާއި ތުރްކިޔޭގެ 7 މިލިއަން ކުޑަ ކުއްޖަކަށް ވަނީ ކޮށްފައިކަމަށް ޔުނިސެފުން ވަނީ ހާމަކޮށްފައެވެ. އެތައް ހާސްކުދިންނެއް ވާނީ މަރުވެފައި ކަމަށް ވެސް ޔުނިސެފުން ވަނީ ބުނެފައެވެ.

"އަދިވެސް ސީދާ އަސަރު ކުރި ކުދިންގެ ޢަދަދެއް ބުނާކަށް ނޭނގޭ، 4.6 މިލިއަން ކުދިން ތުރްކިޔޭގައި ބިންހެލުމުގެ އަސަރުކުރި 10 ޕްރޮވިންސްގައި ދިރިއުޅޭ، ސީރިޔާގައި ބިންހެލުމުގެ އަސަރުކުރި ސަރަހައްދުތަކުގައި 2.5 މިލިއަން ކުދިން ދިރިއުޅޭ،" 

"ގިނަ އާއިލާތަކަކަށް ވަނީ އެމީހުންގެ ގެދޮރުވަނީ ގެއްލިފައި، މިވަގުތު އެމީހުން އެދިރިއުޅެނީ ވަގުތީ ހިޔާ ތަކުގައި، ގަނޑު ވާފަދަ ފިނިކަމާއި، ސްނޯއާއި ވާރޭ އެމީހުންނަށް ޖެހިފައިވާ މުސީބާތް އިތުރުކުރަމުންއެދަނީ" ޔުނިސެޕްގެ ރިޕޯޓުގައި ވެއެވެ.

ސާފު ފެނާއި ރައްކާތެރި ގޮތުގައި ބޭނުން ކުރެވޭނެ ފާޚާނާގެ ނިޒާމެއް ލިބިފައި އޮތުމަކީ މިވަގުތު ހާލުގައި ޖެހިފައި މިތިބަ މީހުންނަށް ސިއްހީ ގޮތުން ދިމާވެދާނެ މުސީބާތަކުން ސަލާމަތަކުރެވޭނެ ކަމެއް ކަމަށްވެސް އެ ރިޕޯޓުގައި ބުނެފައިވެއެވެ.

މިފާއިތުވި ހަފްތާގެ ހޯމަ ދުވަހު އައި ބިންހެލުން ތަކުގައި ތުރްކިޔޭ އިން 31،974 މީހުން މަރުވެފައިވާއިރު ސީރިޔާއިން 5800 މީހުން ވަނީ މަރުވެފައެވެ.