ރައީސް އޮފީހުގެ ކޮމިޔުނިކޭޝަނާއި ގުޅޭ ސެކްޝަންގެ އެންމެ އިސްވެރިޔަކަށް ހިސާން ޢަލީ ފަހުމީ އައްޔަނުކޮށްފިއެވެ.
ހިސާން މިދިޔަ އަހަރުގެ އޮގަސްޓް މަހުން ފެށިގެން ހުންނެވީ ރައީސް އޮފީހުގެ ޗީފް ކޮމިއުނިކޭޝަންސް ސްޓްރެޓެޖިސްޓްގެ ޒިންމާއާ ވަގުތީ ގޮތުން ހަވާލުވެގެންނެވެ. އެއީ އޭރު ޗީފް ކޮމިއުނިކޭޝަންސް ސްޓްރެޓެޖިސްޓްގެ މަގާމުގައި ހުންނެވި އިބްރާހިމް ހޫދު ރައީސް އޮފީހުގެ ފޮރިން ރިލޭޝަންސްގެ އެންމެ އިސްބޭފުޅަކަށް ރައީސް ޞާލިޙް އައްޔަން ކުރެއްވުމާ ގުޅިގެންނެވެ.
އެހެންވެ، މިދިޔަ އަހަރުގެ އޮގަސްޓް 1 އިން ފެށިގެން ހިސާން މިހާތަނަށް ގެންދެވީ ރައީސް އޮފީހުގެ ކޮމިއުނިއުނިކޭޝަންސްގެ ބައި ވަގުތީ ގޮތުން ހިންގަވަމުންނެވެ.
ހިސާން މިހާތަނަށް ހުންނެވީ ރައީސް އޮފީހުގެ އަންޑަ ސެކްރެޓަރީގެ މަގާމުގަ އެވެ. ނަމަވެސް ރައީސް އޮފީހުގެ ކޮމިއުނިކޭޝަންސްގެ އެންމެ އިސްވެރިޔާގެ މަގާމަށް ހިސާން މިއަދު އައްޔަން ކުރެއްވީ މަގާމުގެ ކުރިއެރުމަކާއެކު އެވެ. މިހާރު ހިސާންގެ މަގާމަކީ ސެކްރެޓަރީ، ކޮމިއުނިކޭޝަންސް އެވެ.
ރައީސް އޮފީހުން މިއަދު ބުނީ، އެ އޮފީހުގެ ކޮމިއުނިކޭޝަންސް އޮފީސް ހިންގެވުމުގެ ޒިންމާތަކާއި ކޮމިއުނިކޭޝަންސް އޮފީހުގެ އެންމެހައި މަސައްކަތްތައް ބަލަހައްޓަވައި، ވިލަރެސް ކުރައްވާނީ ހިސާންގެ ބެއްލެވުމުގެ ދަށުން ކަމަށެވެ.
ރައީސް އޮފީހުގެ ޕްރެސް ޓީމުގެ އެންމެ އިސްވެރިޔާ ހިސާނަކީ މެލޭޝިޔާގެ ސަންވޭ ކޮލެޖުން 2016 ވަނަ އަހަރު ބެޗެލާސް އޮފް ބިޒްނަސް އިންޓަނޭޝަނަލް ޓްރޭޑް އެންޑް މާކެޓިން ހާސިލް ކުރައްވާފައިވާ ބޭފުޅެކެވެ.
Advertisement
This content is created and paid for by advertisers and does not involve Voice Journalists
