ތުރްކިޔޭ އާއި ސީރިޔާ އަށް މީގެ ހަފްތާއެއް ކުރިން އައި ބިންހެލުންތަކުގައި ވެއްޓި ހަލާކުވެފައިވާ އިމާރާތްތަކުގެ ގާތަކުގެ ދަށުން އަދިވެސް މީހުން ސަލާމަތްކޮށްދިނުމަށް އެދި ގޮވާ އަޑު އިވޭ ކަމަށް ރެސްކިޔު ޓީމުތަކުން ބުނެފިއެވެ.

ތުރްކިޔޭގެ ކަހްރަމަންމަރާސް ގައި މީހުން ސަލާމަތް މަސައްކަތްކުރަމުން ދިޔަ ޓީމުން އިމާރާތެއްގެ ދަށުގައި ތާށިވެފައި ތިބި ތިން ބެއިން ސަލާމަތް ކޮށްދިނުމަށް އެދި ގޮވާ އަޑު އިވި އެތިންބެއިން ސަލާމަތް ކުރުމަށް މަސައްކަތް ކޮށްފައިވާ ކަމަށް ސީއެންއެންގައި ރިޕޯޓް ކޮށްފައިވެއެވެ.

ހަމަ އެސަރަހައްދުގައި އެއާއި ތަންކޮޅެއް ދުރުގައި ވެއްޓިފައި އޮތް އިމާރާތެއްގެ ދަށުން 35 އަހަރުގެ އަންހެނަކު ވަނީ ސަލާމަތުން ނެރެފައިވެއެވެ. ޤަބޫލު ކުރެވޭ ގޮތުގައި އެއަންހެން މީހާ އެތަނުގައި ތާށިވެފައި އޮންނަތާ 205 ގަޑިއިރުވެދާނެއެވެ.

އަދި 17 އަހަރުގެ، އެއްމާބަނޑު ދެބެންކަމަށްވާ މުޙައްމަދާއި އީނާސް އަދި އެދެކުދިންގެ 21 އަހަރުގެ ބޭބެ ޢަބްދުލްބާކީ ވެސް ވަނީ އިމާރާތެއްގެ ދަށުން ސަލާމަތުން ނެރެފައިވެއެވެ. އަދި އަދްޔަމާން ޕްރޮވިންސްގެ އިމާރާތެއްގެ ދަށުން 18 އަހަރުގެ އެހެން ޒުވާނަކުވެސް ވަނީ ދިރިހުއްޓައި ސަލާމަތްކޮށްފައެވެ.

ކާރިސާއަށް އަށް ދުވަސް ވެފައި ވާއިރު 37،800 މީހުން ވަނީ ދެޤައުމުން މަރުވެފައެވެ. މީހުން ސަލާމަތް ކުރެވޭ ވަރު މަދުވެ އާއިލާތަކުގެ އުއްމީދު ދަނީ ފަނޑުވަމުންނެވެ.

ބިންހެލުމުގައި އަނިޔާވި މީހެއް އިތުރު ފަރުވާއަށް އިސްތަންބޫލަށް ގެންދަނީ

ރެސްކިޔު އޮޕަރޭޝަންތައް މަދުވެ ސަލާމަތްވި މީހުންނަށް ރައްކާތެރިކަމާއި ސަލާމަތް ތެރިކަން ހޯދައިދިނުމުން އެއިޑް ޓީމްތަކުން ދަނީ މިހާރު މަސައްކަތް ކުރަމުންނެވެ. އެއިޑް ޓީމްތަކުން މިމަސައްކަތް ފެށުމާއި އެކު ޔޫއެން އިން ވަނީ ތުރްކިޔޭ އިން ސީރިޔާ އަށް ވަދެވެން އޮތް ދެމަގުން ސީރިޔާއަށް އެއިޑްގެ ސާމާނު ހިފައިގެން ދަތުރުފަށައިފައެވެ.

ޔޫއެން އިން ވަނީ ސޫރިޔާގެ ރައީސް ބައްޝާރުލް އަސަދަށް މަރުހަބާ ކިޔައިފައެވެ. އެއީ ސީރިޔާގައި ހާލުގައި ޖެހިފައިތިބި މީހުންނަށް އެހީ ގެންދިޔުމަށް 3 މަހުގެ މުއްދަތައް ތުރްކިޔޭ އިން ސީރިޔާއަށް ވަދެވެން އޮންނަ ބާބް އަލް ސަލާމް އަދި އަލް ރައީ ހުޅުވާލުމުންނެވެ.