ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު މިހާރު އަމަލުކުރައްވަމުން ދާގޮތުން، ދިވެހި ރައްޔިތަކު ގެއްލުނު ހާދިސާގައި ވެރިކަމަށް ވަޑައިގަތުމުގެ ކުރިން އިދިކޮޅުގައި ހުންނަވާ އެމަނިކުފާނު ކީރިތި ކުރެއްވީ ސިޔާސީ މަންފާއެއް އޮވެގެން ނުވަތަ އެމަނިކުފާނަށް ވޯޓު ހޯއްދެވުމުގެ ބޭނުމުގައިކަން، ޔަގީންވާކަމަށް މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ. 

ޝިޔާމު މިފަދައިން ވިދާޅުވެފައިވަނީ ގެއްލޭ މީހުން ހޯދުމުގެ މަސައްކަތް މިހާރަށްވުރެ ހަރުދަނާކުރުމަށް ގޮވާލާ ރައްޔިތުންގެ މަޖިލީހަށް ހުށައެޅި ކުއްލި މައްސަލަ އެމްޑީޕީ ސުޕަ މެޖޯރިޓީ އޮންނަ ރައްޔިތުންގެ މަޖިލީހުން ބޭރުކުރުމާއި ގުޅިގެން ނުރުހުން ފާޅުކުރައްވާ މަޖިލީހުގައި ވާހަކަދައްކަވަމުން ނެވެ. 

ޝިޔާމު ވިދާޅުވީ އެ މައްސަލަ އަކީ ދިވެހި ރައްޔިތުންތަކެއް ގެއްލިގެން އެކަމުގެ ކަންބޮޑުވުންތަކާއެކު ހުށައެޅި މައްސަލައެއް ކަމަށެވެ.

އެހެން ނަމަވެސް އެ މައްސަލަ ބަލައިގަނެ ވާހަކަ ދައްކާލުމުގެ ފުރުސަތު ދޭންވެސް އެމްޑީޕީ ސުޕްމެޖޯރިޓީއަށް ނުކުރެނުކަމަށް އޭނާ ވިދާޅުވިއެވެ. 

އެކަން ފާހަގަކުރައްވާ ޝިޔާމު ވިދާޅުވީ މަޖިލީހުން އެ މައްސަލަ ބޭރުކޮށްލީ ރައިސް ޞާލިހު އަންގައިގެން ކަަމަށެވެ. 

ދެ ދިވެހިން ގެއްލި ދުވަސްތަކެއް ފާއިތުވަމުންދާއިރު، އެމީސްމީހުންގެ އާއިލާއަށް ފުން ހިތާމައެއް ލިބިފައިވާ މި ދަނޑިވަޅުގައި، ހުށައެޅި އެ މައްސަލަ ބޭރުކޮށްލުމުން ރައީސް ޞާލިހު މީގެކުރިން އިިކޮޅުގައި ހުންނަވާ ރުއީ ކޮންކަމަކާތޯ ސުވާލު އުފެދޭކަމަށް ޝިޔާމު ވިދާޅުވިއެވެ. 

ޝިޔާމުގެ ވާހަކައިގައި އިޝާރާތް ކުރެވީ މިނިވަން ނޫހުގެ ނޫސްވެރިޔާ އަހުމަދު ރިލްވާނު ގެއްލުވާލި ހާދިސާއަށެވެ.  

ރިލުވާނު ގެއްލުވާލި ހާދިސާއާއި ގުޅިގެން، އޭނާއަށް އިންސާފު ހޯދުމަށް ގޮވާލާ ރިލުވާނުގެ އާއިލާއިން މާލޭގައި ކުރިއަށް ގެންދިޔަ ހިނގާލުން ތަކުގެ އިސް ސަފުގައި ރައީސް ޞާލިހު ހުންނެވިއެވެ.

އޭގެ އިތުރުން 2018 ވަނަ އަހަރުގައި އޮތް ރިޔާސީ އިންތިޚާބު ކާމިޔާބުވެއްޖެ ނަމަ ވެރިކަމަށް ހުވާކުރައްވާތާ 24 ގަޑީއިރުގެ ތެރޭގައި ރިލްވާނަށް ވީގޮތް ހޯއްދަވާދެއްވާނެކަމަށް ރައީސް ޞާލިހު އޭރު ރިލުވާނުގެ އާއިލާއަށް ވައުދުވެވަޑައިގެންނެވި އެވެ. 

އެހެން ނަމަވެސް ރައީސް ޞާލިހުގެ އެ ވައުދުފުޅު ވެރިކަމަށް ވަޑައިގަތުމަށްފަހު ފުއްދަވާދެއްވާފައެއް ނުވެއެވެ. 

ރިލްވާނު ގެއްލުނު މައްސަލައިގައި ރައީސް ޞާލިހު އަމަލުކުރައްވާފައިވާ ގޮތަށް އިޝާރާތްކުރައްވާ ޝިޔާމު ވިދާޅުވީ އޭރު ރައީސް ޞާލިހު ކީރިތިކުރެއްވީ ސިޔާސީ މަންފާއެއް ހޯދުމަށްކަމަށް މިހާރު ސާފުވާ ކަމަށެވެ. އަދި އެމަނިކުފާނުގެ މަގްސަދަކީ ރިލްވާނު ގެއްލުވާލި ހާދިސާ ސިޔާސީކޮށް ބަޔަކު ޖަޒުބާތުގައި ޖައްސައިގެން އެމަނިކުފާނަށް ވޯޓު ހޯއްދެވުންކަމަށް ޝިޔާމު ވިދާޅުވި އެވެ.

ވީނުވީއެއް ނޭނގި ގެއްލޭ މީހުން ހޯދުމުގެ މަސައްކަތް ހަރުދަނާކުރުމަށް ގޮވާލާ ރައްޔިތުންގެ މަޖިލީހަށް ހުށައެޅި ކުއްލި މައްސަލައަކީ ފެބްރުއަރީ މަހު އއ. މަތިވެރި ރިވެލި، ހަސަން އަލީ (ހަސަންފުޅުބެ) އާއި، ސ. މަރަދޫ ގަސްކަރަ، މުހައްމަދު އާސިރު އިސްމާއީލް ވީނުވީއެއް ނޭނގި ގެއްލިގެން ރިޕޯޓުކުރިތާ ގިނަ ދުވަސްތަކެއް ފާއިތުވެގެން ދާއިރު އެ މީހުން ހޯދުމަށް ސަރުކާރުން އެކަށީގެންވާ ގޮތެއްގައި މަސައްކަތް ނުކުރާކަން ފާހަގަކޮށް، އެ މަސައްކަތް ހަރުދަނާ ކުރުމަށް ގޮވާލާ ހުށައެޅި މައްސަލައެކެވެ. 

އެ މައްސަލަ މަޖިލީހުން ބޭރުކޮށްލާފައިވާއިރު، ސަރުކާރަށް ތާއީދު ކުރައްވާ ބައެއް މެމްބަރުން ވިދާޅުވީ އެ މައްސަލަ ބޭރުކޮށްލީ އެއީ ސަރުކާރަށް ޖެއްސުންކޮށް، ސަރުކާރަށް ފާޑުކިޔަން ހުށައެޅި މައްސަލައަކަށް ވާތީ ކަމަށެވެ. 

އެހެން ވިދާޅުވެ އެ މައްސަލަ ބޭރުކޮށްލާފައި ވާއިރު، މި ދައުރުގެ މިހާތަނަށް އިދިކޮޅުން ހުށައެޅި އެއްވެސް ކުއްލި މައްސަލައެއް މަޖިލީހުން ބަލައިގެންފައި ނުވެއެވެ.