ތުރްކިޔޭ އާއި ސީރިޔާ އަށް އައި ބާރުގަދަ ބިންހެލުން ތައް އައިތާ 9 ދުވަސް ވެފައިވާއިރު ރެސްކިޔު ޓީމުތަކުން ދިރިހުރި މީހަކު ފެނޭތޯ ކުރަމުންދާ މަސައްކަތް އަދިވެސް ދަނީ ކުރަމުންނެވެ.

ގިނަބަޔަކު އިތުރު މީހަކު ދިރިހުއްޓާ ފެނިދާނެ ކަމަށް އުއްމީދު ކަނޑާލައިފައިވިޔަސް އަދިވެސް ރެސްކިޔު ވޯކާސް ދަނީ ފަނޑު އުއްމީދާއި އެކުވެސް މަސައްކަތް ކުރިއަށް ގެންދަމުންނެވެ.

އެކިއެކި ޤައުމުތަކުގެ 74 ރެސްކިޔު ވޯކަރުންގެ  ޓީމެއް ތުރްކިޔޭ އަށް އައިސް މީހުން ސަލާމަތްކުރުމުގެ މަސައްކަތް ކުރަމުންއެބަދެއެވެ.

Advertisement

ކާރިސާ އަށް ގިނަ ދުވަސްވެ ދިރިތިބީ މީހުން ފެނިދާނެ ކަމުގެ އުއްމީދު ކުޑަ ވެފައި ވަނިކޮށް ކާރިސާއަށް 222 ގަޑި އިރުވީފަހުން 42 އަހަރުގެ އަންހެނަކު ވަނީ ވެއްޓުނު އިމާރާތެއްގެ ކޮންކްރިޓްތަކުގެ ދަށުން ނަގައިފައެވެ.

ކާރިސާގައި މަރުވި މީހުންގެ ޢަދަދު އަންނަނީ މަތިވަމުންނެވެ. ތުރްކިޔޭ އިން 35،418 މީހުން މަރުވެފައިވާއިރު ސީރިޔާ އިން 5،800 މީހުން ވަނީ މަރުވެފައެވެ. ޖުމްލަ 41،000 މީހުން މަރިވެފައިވާ ކަން ޔަޤީން ކުރެވިފައިވާއިރު އަދިވެސް އިމާރާތްތަކުގެ ގައުތަކުގެ ދަށުން ނުފެނި ނުނެގި ވާވެސް ކިތަންމެ މީހެއް ވެއެވެ.

ތުރްކިޔޭގެ އަންކާރާ ގައި ހުރި އަލްޖަޒީރާގެ ރިޕޯޓަރު ސިނެމް ކޮސެގުލް ބުނީ ބިންހެލުން ތަކުގައި ބޯހިޔާވަހިކަން ގެއްލިފައިވާ މީހުނަށް ވަގުތީ ބޯހިޔާވަހިކަން ފޯރުކޮށްދިނުމަށްޓަކައި ޓެންޓް ތައްޔާރުކުރުމުގެ މަސައްކަތް ތުރްކިޔޭ އެކި ކަންކޮޅު ތަކުގައި ކުރިއަށްދާކަމަށެވެ.

"އަހަރެން މިހާރު މިހިރީ ތުރްކިޔޭގެ ރެޑްކްރޮސެންޓުން ޓެންޓް ފެހުމުގެ މަސައްކަތް ކުރަމުންދާ ސެންޓަރުގަ، މިތަނުގައި މަސައްކަތް ކުރަމުންދާ މީހުން ވަރަށް ބުރަކޮށް މަސައްކަތް ކުރަމުން މިދަނީ، ބިންހެލުން އައި ސަރަހައްދަށް ޓެންޓުތައް ފޯރުކޮށްދިނުމަށް ތުރްކުޔޭގެ ޑިޒާސްޓަރ މެނޭޖްމަންޓާއި ހަވާލުކުރެވޭނެ" ރިޕޯޓަރު ސިނެމް ބުނެފައިވެއެވެ.

އެސެންޓަރުގައި 24 ގަޑިއިރު 3 ޝިފްޓަށް ބަހާލައިގެން 550 މީހުން މަސައްކަތް ކުރަމުންދާކަމަށް އޭނާ ބުންޏެވެ.

ތުރްކިޔޭގައި ބިންހެލުން އައިސްގެން ހަލާކުވި ސިޓީތައް އަލުން އިމާރާތް ކުރުމުގެ މަސައްކަތް ދެތިން ހަފްތާއެއްގެ ފަހުން ފަށާނެ ކަމަށް ރައީސް ރަޖަބް ޠައްޔިބް އުރްދުޣާން ވަނީ ވިދާޅުވެފައެވެ.