2023 ގެ ކްލަބް ވޯލްޑް ކަޕް ސަޢުދީޢަރަބިއްޔާގައި ބޭއްވުމަށް ފީފާއިން ކަނޑައަޅައިފިއެވެ.
މިމުބާރާތް ފެށުމަށް ހަމަޖެހިފައވަނީ ޑިސެމްބަރު މަހުގެ 22 ވަނަ ދުވަހުއެވެ. ސަޢުދީޢަރަބިއްޔާގައި މިމުބާރާތް ބޭއްވުމަށް ނިންމާފައިވަނީ އަންގާރަ ދުވަހު ބޭއްވި ފީފާގެ ކައުންސިލް މީޓިންގައެވެ.
"މިއީ އަހަރެމެންނަށް ލިބުނު ވަރަށްބޮޑު ފަޚުރެއް، އަހަރެމެންމިތިބީ ދުނިޔޭގެ އެންމެ މަޝްހޫރު ފުޓުބޯޅަ ކުލަބު ތަކާއި އެޓީމު ތަކުގެ ސަޕޯޓާރުންނަށް އުފަލާއި އެކު މަރުހަބާ ކިޔުމަށް ތައްޔާރުވެގެން" ސަޢުދީ ޢަރަބިއްޔާގެ ސްޕޯޓްސް މިނިސްޓަރ ވަލީ އަހުދު ޢަބްދުލްޢަޒީޒް ބިން ތުރްކީ އަލް ފައިސަލް ވިދާޅުވިއެވެ.
ޓީމު ތަކުގެ ފޭނުންނަށް ސަޢުދީޢަރަބިއްޔާ އަކީ ކިހާވަރެގެ މެހެމާންދާރީއެއް ދޭ ބަޔެއެއްކަން ވަރަށް އަވަހަށް ފެންނާނެ ކަމަށާއި، ކުޅިވަރަށް އޮތް ލޯތްބާއި ކުޅިވަރުގައި ސަޢުދީ ކުރިއަރަމުންދާ މިންވަރުވެސް ފެންނާނެކަމަށް ވަލީއަހުދު ޢަބްދުލް ޢަޒީޒް ވިދާޅުވިއެވެ.
"މިއަދަކީ މިއީ އަހަރެމެންގެ ގައުމުގައި ފުޓްބޯޅަ ކުރިއެރުވުމަށް އެޅޭ ވަރަށް މުހިންމު ފިޔަވަޅެއް އެޅޭ ދުވަހެއް، އަހަންނަށް ޤަބޫލު ކުރެވޭ ގޮތުގައި މިކަމުގެ ސަބަބުން މިކަމުގެ ތެރޭގައި މިއުޅޭ އެންމެންނަށްވެސް ކުރިއެރުން ލިބިގެންދާނެ" ސްޕޯޓްސް މިނިސްޓަރ ވިދާޅުވިއެވެ.
"ފުޓުބޯޅަ އަކީ ސަޢުދީޢަރަބިއްޔާގެ ގިނަ ބަޔަކު ލޯބި ކުރާ ކުޅިވަރެއް، ގައުމުގެ އެކި ކަންކޮޅުތަކުގައި އެއަށް ލޯބި ކުރާ މީހުން އެބަތިބި، 80 ޕަސެންޓް މީހުންނަކީ ފުޓުބޯޅަ ކުޅެ، ބަލައި އަދި ފޮލޯ ކުރާ މީހުން" ވަލީ އަހުދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
