ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވެރިކަމަށް ގެނައުމަށް ވަރަށް ގިނަ އަދި ބުރަ މަސައްކަތްތަކެއް ކުރެއްވި ކަމަށާ އެހެންނަމަވެސް، މިއަދު ސަރުކާރުގެ ތެރެއިން ފެންނަމުން ދަނީ ބާރާއި ނުފޫޒު ބޭނުންކޮށް ކުރިން ދެކޮޅު ހެދި އެތައް ސިފަތަކެއް އަލުން އިޔާދަ ވާ މަންޒަރުކަމަށް މަޖިލީހުގެ އަނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން، ވައްޑެ ވިދާޅުވީ ރާއްޖެއަށް ޑިމޮކްރަޓިކް ނިޒާމެއް އުފަން ކުރީ ދިވެހި އެތައް ރައްޔިތުންނެއްގެ ގުރުބާނީން ކަމަށެވެ.
އޭގެ ކުރިން މަޖިލީހުގައި އޮންނަނީ ސަރުކާރުން ބޭނުން ގޮތަކަށް ނުފޫޒު ފޯރުވޭ ގޮތަށް އޮތް ނިޒާމެއްކަމަށާއި އެ ނިޒާމުގައި މަޖިލީހަށް މެންބަރުން އައްޔަނު ކުރަމުން ދިޔައީ އޭރުގެ ސަރުކާރުންކަމަށް ވަހީދު ވިދާޅުވި އެވެ. އަދި މިއަދު ރައްޔިތުންގެ މަޖިލީހުން ވެސް ފެންނަނީ ހަމަ އެފަދަ ސިފައެއް ކަމަށް ވިދާޅުވެ ވައްޑެ ވަނީ އެކަމާއި މެދު ކަންބޮޑުވުން ފާޅުކުރައްވާފަ އެވެ.
”ދެންމެ އަޅުގަނޑަށް އިހުސާސްވެއްޖެ. އެ ޒަމާނުގެ އެ މަޖިލީހުގެ ސިފައިގައި. މި މަޖިލިސް ހިންގެވުމަށްޓަކައި ރައީސުލްޖުމްހޫރިއްޔާއަށް ތާއީދު ކުރައްވާ ބޭފުޅުން، ރައީސުލްޖުމްހޫރިއްޔާ އަންގަވައިގެން އެބޭފުޅުން އެގޮތަށް މިތަނުގައި ވާހަކަ ދައްކަވާތީ. އަޅުގަނޑު ވަރަށް ބޮޑަށް ކަންބޮޑުވާކަމެއް“ ވައްޑޭ
މުހައްމަދު ވަހީދު
މިއާއެކު ވަހީދު ވިދާޅުވީ 2018 ވަނަ އަހަރުގެ ރިޔާސީ އިންތިހާބު ރައީސް ޞާލިހަށް ކާމިޔާބުކޮށްދިނުމަށް ވަރަށް ބުރަ މަސައްކަތް ކޮށް އެތައް ދުވަހަކު ޖަލަށް ވެސްދާން ޖެހުނު ކަމަަށެވެ. އަދި ރައީސް ސޯލިހަކީ 25 އަހަރު ރައްޔިތުންގެ މަޖިލީހުގައި ހޭދަ ކުރެއްވި، ޕާޓީގެ ޕާލިމަންޓު ގުރޫޕުގެ ލީޑަރަށް ވެސް ވުމާއި އެކު އެމަނިކުފާނާއި މެދު ކުރި އުންމީދުތައް ގަޑުބަޑު ކުރައްވަފާނެކަމަށް ދުވަހަކު ވެސް ހިތަކަށް ނާރާކަމަށްވެސް ވަހީދު ވިދާޅުވި އެވެ.
”މިސްކިތު ގާގަނޑަށް އަރާ ދުއާ ވެސް ކުރިން އަޅުގަނޑުމެން.. އެތައް ދުވަހަކު ޖަލުގައާއި، އެތައް ދުވަހަކު ހާލުގައި އަޅުގަނޑުމެން އުޅުނީމޭ.. ހާދަ އުންމީދަކާއި އެކީގައޭ މި ވެރިކަން ގެންނަން އަޅުގަމޑުމެން މަސައްކަތް ކުރީ“
މުހައްމަދު ވަހީދު
މީގެ އިތުރުން ވަހީދު ވިދާޅުވީ ސަރުކާރާއި ދެކޮޅު ހަދައި ސަރުކާރަށް ފާޑު ނުކިޔޭނެކަމަށް ސަރުކާރަށް ތާއީދު ކުރައްވާ މެންބަރުން ވިދާޅުވަމުންދާ ކަމަށާ، ސަރުކާރާއި އެއްކޮޅު ތޯ ދެކޮޅު ނޫން ތޯ ބަލާފައި ހުށަހެޅޭ ބިލުތައް މަޖިލީހުން ބޭރުކޮށްލުން ސަގާފަތަކަށް ވެއްޖެކަމަށެވެ. އަދި އިދިކޮޅު މައިނޯރިޓީގެ އަޑު މަޖިލީހުން ކަނޑުވާލަން މަސައްކަތް ކުރާތީ ނުހަނު ކަނބޮޑުވާ ކަމަށްވެސް އޭނާ ވިދާޅުވި އެވެ.
ވަހީދު ވިދާޅުވީ މަޖިލީހަށް އިންތިހާބު ވީ ޖަވާބުދާރީ ކުރުވޭނެ ދައުލަތެއް އުފެއްދުމަށް ކަމަށެވެ. ބޭނުން ވީ ނަޒާހަތްތެރި މަޖިލީހެއް ނަމަވެސް ކަން ހިނގަނީ ދިމާ އިދިކޮޅަށްކަމަށާ، ސަރުކާރަށް ފާޑުކިއުން އެއީ ހަސަދަވެރިވުން، ނުވަތަ ޒާތީވުންކަމަށް މިހާރުވެފައި ވާއިރު، އެފަދައިން އެގޮތަށް ނުބުނެވޭނެ ކަމަށްވެސް އޭނާ ވިދާޅުވި އެވެ. އަދި ވެރިންނާއި ވަޒީރުން އަދި މަޖިލީހުގެ މެމްބަރުންނަށް ވެސް ފާޑުކިޔޭނެކަމަށް ވަހީދު ވިދާޅުވި އެވެ.
މިއާއެކު ވަހީދު ވިދާޅުވީ، މިއަދު ވެރިކަމުގައި މިއޮތީ އެމްޑީޕީން ދެކޮޅު ހެދި ހުރިހާ ކަމެއް އުފަންވެފައިކަމަށާއި ދެކޮޅުވި އާއިލީ ވެރިކަން އަލުން އިއާދަވެފައިވާއިރު، އެއީ އެކަމާއި ނުހަނު ކަންބޮޑުވާ ކަމަށް ވަހީދު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
