ތުރްކިޔޭ އާއި ސީރިޔާ އަށް އައި ބާރުގަދަ ބިންހެލުން ތަކުގައި ހާލުގައި ޖެހިފައިތިބި މުސްލިމް އަޚުންނާއި އުޚުތުންނަށް އެހީވުމަށް "އެއްއުންމަތެކޭމީ!" ގެ ނަމުގައި ކެމްޕޭނެއް ފަށައިފިއެވެ.

މި ކެމްޕޭނަކީ ރާއްޖޭގެ ދީނީ ޢިލްމުވެރިންނާއި ބައެއް މަދަނީ ޖަމިއްޔާތައް ގުޅިގެން ކުރިއަށްގެންދާ ކެމްޕޭނެކެވެ. މިކެމްޕޭން ފަށައިފައިވަނީ މިއަދު އެވެ. ކެމްޕޭން ފެށިގެން ދިޔައީ ދީނީ ޢިލްމުވެރިންނާއި ކެމްޕޭނުގައި ބައިވެރިވާ ޖަމިއްޔާތަކުގެ ބޭފުޅުން ފެށި ޕްރެސް ކޮންފަރެންސް އަކާއި އެކުގައެވެ.

މިއަދުން ފެށިގެން މިކެމްޕޭން އެކި ޕްލެޓްފޯމްތަކުގައި ކުރިއަށްދާނެއެވެ. ފަންޑު ޖަމާކުރެވެމުންދާނީ އައިއޭސީ އިން އެޖަމިއްޔާގެ އެކައުންޓަށެވެ. ފައިސާ ޖަމާ ކުރެވެމުންދާނީ ފަންޑު ފޮށިތަކުންނާއި އެކައުންޓަށް ޓްރާންސްފަރ ކޮށްގެނެވެ.

ފަންޑު ޖަމާކުރުމަށްޓަކައި މިހާތަނަށް ރޭވިފައިވާ ހަރަކާތް ތަކުގެ ތެރޭގައި ހިމެނެނީ ޓީވީ ފޯރަމް ތަކާއި، ރޭޑިޔޯ ފޯރަމްތަކާއި، މިކަމާއި ގުޅޭ،ހުކުރު ޚުޠުބާ އިއްވުމާއި، ފަންޑު ފޮށި ބެހެއްޓުމާއި، ސޯޝަލް މީޑިއާ ވީޑިއީ އަދި ޕޯސްޓަރު ފަދަ ތަކެތި ބޭނުންކޮށްގެން ހޭލުންތެރިކަން އިތުރުކުރުން ހިމެނެއެވެ.

ފަންޑު ފޮށި ބެހައްޓާއިރު ހުކުރު ނަމާދުގެ ނިމޭ ވަގުތައް ޚާއްސަ ކޮށް ފޮށި ބެހެއްޓޭނެ ކަމަށާއި، މާލޭގައި މީހުން ގިނައިން ޖަމާވާ ބައެއް ސަރަހައްދުތަކުގައި ބަހައްޓާނެއެވެ.

މިކަމުގައި ބައިވެރިވަނީ ދީނީ ޢިލްމުވެރިން، އައިއީސީސީ، މަހަލްދީބް ފައުންޑޭޝަން، އައިއޭސީ، ފަތިސް ލީގް، ޚިދްމަތް ޖަމިއްޔާ، ނަސީހާ، އަލް ޤަލަމް، ޔޫއައިއެސް، ދަރުމަ ފައުންޑޭޝަން، ޒާދުލް ޚައިރް، މަރސިފުލް ސޮސައިޓީ އަދި އެސްއެމްޑީ މާފަރު ޖަމިއްޔާ އެވެ.