އިގިރޭސި ޕްރެމިއާ ލީގުގައި މިރޭ ރަށުން ބޭރުގައި އާސެނަލް އާއި ވާދަކުރި މެޗު 3-1 ގެ ނަތީއްޖާއަކުން މެންޗެސްޓަރ ސިޓީ ކާމިޔާބުކޮށްފިއެވެ.

މިރޭގެ މެޗުގެ ފުރަތަމަ ހާފުގައި ގިނަވަގުތު ބޯޅަގެންގުޅެ މެޗު ޑޮމިނޭޓުކުރީ އާސެނަލް އިންނެވެ. ނަމަވެސް މި މެޗުގައި ފުރަތަމަ ލަނޑުޖަހައި ލީޑު ހޯދީ މެންޗެސްޓަރ ސިޓީ އިންނެވެ. މި ލަނޑު ފުރަތަމަ ހާފުގެ 24 ވަނަ މިނެޓުގައި އެޓީމަށް ކާމިޔާބުކޮށްދިނީ ބެލްޖިއަމްގެ މިޑްފީލްޑަރ ކެވިން ޑި ބްރޭނާ އެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ފުރަތަމަ ހާފުގައި އާސެނަލްގެ އެޑީ އެންކެޓިއާ އަދި ބުކަޔޯ ސަކާ އަށް ވަނީ ލަނޑުޖަހާނެ ރަގަޅު ދެ ފުރުސަތު ލިބި ބޭނުންނުކުރެވިފައެވެ.

ބުކަޔޯ ސަކާ 

ފުރަތަމަ ހާފުގެ 42 ވަނަ މިނެޓުގައި ސިޓީގެ ޕެނަލްޓީ އޭރިއާ ތެރެއިން އެޓީމުގެ ކީއްޕަރު އާސެނަލްގެ ކުޅުންތެރިއަކަށް ކުރި ފައުލަކަށް ރެފްރީ ވަނީ އާސެނަލްއަށް ޕެނަލްޓީއެއް ދީފައެވެ. މި ޕެނަލްޓީ ކާމިޔާބުކޮށް އާސެނަލްއަށް މެޗުގެ ނަތީއްޖާ އެއްވަރުކޮށްދިނީ އެޓީމުގެ އިގިރޭސި ފޯވާޑް ބުކަޔޯ ސަކާ އެވެ. މިއާއެކު ފުރަތަމަ ހާފުގެ ކުޅުން ނިމިގެން ދިޔައީ 1-1 ގެ ނަތީއްޖާއަކުން ދެޓީމު އެއްވަރުވެފައި އޮވެގެންނެވެ.

ޖެކް ގްރީލިޝް

މެޗުގެ ދެވަނަ ހާފުގައިވެސް ގިނަވަގުތު ބޯޅަ ގެންގުޅެ މެޗު ޑޮމިނޭޓުކުރީ އާސެނަލް އިންނެވެ. ނަމަވެސް މިހާފުގައި ސިޓީގެ އެޓޭކުތައް ފެނުނީ ފުރަތަމަ ހާފަށްވުރެ ވަރުގަދަކޮށެވެ. މި މެޗުގައި ދެވަނަ ފަހަރަށް މެންޗެސްޓަރ ސިޓީ އަށް ލީޑުހޯދައިދިނީ ދެވަނަ ހާފުގެ 72 ވަނަ މިނެޓުގައި އިގިރޭސި މިޑްފީލްޑަރ ޖެކް ގްރީލިޝް އެވެ. މިއީ އެޓީމުގެ ޖަރުމަން މިޑްފީލްޑަރ  ގުންޑޮގަން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މި މެޗުން މެންޗެސްޓަރ ސިޓީއަށް ތިން ޕޮއިންޓް ކަށަވަރުވި ލަނޑު، ދެވަނަ ހާފުގެ 82 ވަނަ މިނެޓުގައި ކާމިޔާބުކޮށްދިނީ މިސީޒަނުގައި ޕްރެމިއާ ލީގުގެ އެންމެ ގިނަ ލަނޑުޖެހި ކުޅުންތެރިއާ އެރްލިންގް ހާލަންޑް އެވެ. މިއީ ކެވިން ޑި ބްރޭނާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކުރި ލަނޑެކެވެ. އަދި މިއީ މިސީޒަނުގައި ލީގުގައި އޭނާ ކާމިޔާބުކުރި 26 ވަނަ ލަނޑެވެ.

މިރޭގެ މެޗުން ލިބުނު ތިން ޕޮއިންޓާއި އެއްމެޗު އިތުރަށް ކުޅެ ވަގުތީގޮތުން މެންޗެސްޓަރ ސިޓީ ވަނީ ތާވަލުގެ އެއްވަނައަށް ކުރިއަށް ޖެހިލާފައެވެ. ލީގުގައި ކުޅުނު 23 މެޗުން 51 ޕޮއިންޓް އެޓީމަށް ލިބިފައިވާއިރު ލީގުގެ އެއްވަނަ އެޓީމަށް ލިބެނީ ލަނޑުގެ ތަފާތުންނެވެ. މިރޭގެ މެޗުން ބަލިވި އަސެނަލް ދެ ވަނަނާގައި އޮތީ 22 މެޗުން ލިބުނު 51 ޕޮއިންޓާއި އެކު ލަނދުގެ ތަފާތުންނެވެ.