ސްޕެނިޝް ލަލީގާފައި މިރޭ އަމިއްލަ ދަނޑުުގައި އެލްޗޭ އާއި ވާދަކުރި މެޗު ފަސޭހަކަމާއި އެކު 4-0 ގެ ނަތީއްޖާއަކުން ކާމިޔާބުކޮށް އެންމެ ފަހުގެ ޗެންޕިއަން ރެއާލް މެޑްރިޑް އެއްވަނާގައި އޮތް ބާސެލޯނާ އާއި ދެމެދުގައިވާ ފަރަގު 8 ޕޮއިންޓަށް ކުޑަކޮށްފިއެވެ.

މިރޭގެ މެޗުގެ ފުރަތަމަ ހާފު ފެށިގެން ވަރަށް ކުރީ ކޮޅު ރެއާލް އިން ލަނޑެއް ކާމިޔާބުކޮށް ލީޑު ނެގިއެވެ. މި ލަނޑު ފުރަތަމަ ހާފގެ 8 ވަނަ މިނެޓުގައި އެޓީމަށް ކާމިޔާބުކޮށްދިނީ މިޑްފީލްޑަރ މާކޯ އަސެންސިއޯ އެވެ.  ފުރަތަމަ ހާފުގައި ރެއާލް މެޑްރިޑުން އިތުރު ދެ ލަނޑު ކާމިޔާބުކުރި އިރު އެ ދެ ލަނޑަކީވެސް އެޓީމަށް ލިބުނު ދެ ޕެނަލްޓީ އިން ބެންޒެމާ ކާމިޔާބުކޮށްދިން ދެ ލަނޑެވެ.

ލޫކާ މޮޑްރިޗް 

ފުރަތަމަ ހާފުގެ 31 ވަނަ މިނެޓުގައި އެލްޗޭގެ ޕެނަލްޓީ އޭރިއާ ތެރެއިން އެޓީމުގެ ކުޅުންތެރިއެއްގެ އަތުގައި ބޯޅަޖެހުމުން ރެފްރީ ރެއާލް އަށް ޕެނަލްޓީއެއް ދިންއިރު އެޓީމަށް ދެވަނަ ޕެނަލްޓީއެއް ލިބުނީ ފުރަތަމަ ހާފުގެ އިތުރު ވަގުތުތެރޭގައި އެލްޗޭ ޕެނަލްޓީ އޭރިއާ ތެރެއިން އެޓީމުގެ ޑިފެންޑަރަކު ރެއާލްގެ ރޮޑްރިގޯއަށް ކުރި ފައުލަކާއި ގުޅިގެންނެވެ. މި ދެ ޕެނަލްޓީވެސް ކާމިޔާބުކޮށްދީ ބެންޒެމާ ވަނީ ރެއާލް އަށް ފުރަތަމަ ހާފުގައި 3-0 ގެ ލީޑެއް ހޯދައިދީފައެވެ.

ދެވަނަ ހާފުގައިވެސް ރެއާލްގެ ފަރާތުން ގިނަ ހަމަލާތަކެއް ފެނިގެން ދިޔަނަމަވެސް މި ހާފުގައި އެޓީމަށް ކާމިޔާބުކުރެވުނީ އެންމެ ލަނޑެކެވެ. ދެވަނަ ހާފުގެ 80 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް  ތަޖުރިބާކާރު މިޑްފީލްޑަރ ލޫކާ މޮޑްރިޗް އެވެ.

މިރޭގެ މެޗުން ލިބުނު ތިން ޕޮއިންޓާއި އެކު 21 މެޗުން ރެއާލް މެޑްރިޑަށް ވަނީ 48 ޕޮއިންޓް ލިބިފައެވެ. އެޓީމު ދެވަނާގައި އޮތް އިރު އެވަނާގައި ބާސެލޯނާ އޮތީ 21 މެޗުން 56 ޕޮއިންޓާއި އެކުގައެވެ. މިރޭގެ މެޗުން ބަލިވި އެލްޗޭ މި ވަގުތު އޮތީ 21 މެޗުން ލިބުނު 9 ޕޮއިންޓާއި އެކު ލީގު ތާވަލުގެ ފުލުގައެވެ.