ޔުއެފާ ޗެމްޕިއަންސް ލީގުގެ ދެވަނަ ބުރުގައި ރޭ ޖަރުމަނުގެ ބްރޫޝިއާ ޑޯޓްމަންޑާއި ޗެލްސީ ބައްދަލުކުރި ފުރަތަމަ ލެގުގެ މެޗު ޑޯޓްމަންޑުން ކާމިޔާބު ކޮށްފިއެވެ. ޑޯޓްމަންޑްގެ ދަނޑުގައި ރޭ ކުޅުނު މި މެޗު އެ ޓީމުން ޗެލްސީގެ މައްޗަށް ކުރި ހޯދާފައި ވަނީ 1-0 ގެ ނަތީޖާއިންނެވެ.

ރޭގެ މެޗުގެ ފުރަތަމަ ހާފުގައި ގިނަވަގުތު ބޯޅަގެންގުޅެ މެޗު ޑޮމިނޭޓުކުރީ ޑޯޓްމަންޑް އިންނެވެ. ނަމަވެސް މިހާފުގައި ޗެލްސީގެ ޕޯޗުގަލް ފޯވާޑް ޖޮއާއޯ ފެލިކްސްއަށް ވަނީ ލަނޑުޖަހާނެ ރަގަޅު ހުސް ދެ ފުރުސަތު ލިބި ބޭނުންނުކުރެވިފައެވެ. ފުރަތަމަ ހާފުގެ 32 ވަނަ މިނެޓުގައި ޗެލްސީ އިން އުފެއްދި ހަމަލާގައި ފެލިކްސް ފޮނުވާލި ހަމަލާ ޑޯޓްމަންޑްގެ ޑިފެންޑަރުން ބުލޮކްކުރި އިރު 38 ވަނަ މިނެޓުގައި އޭނާ ފޮނުވާލި ބޯޅައިގެ ހުރަހަކަށްވީ ގޯލުގެ ހުރަސް ދަނޑިއެވެ.

ޑޭވިޑް ނެރެސް

މެޗުގެ ދެވަނަ ހާފުގައި ޗެލްސީ އިން ކުޅުން ރަގަޅުކޮށް މެޗުގެ ކޮންޓްރޯލު ހޯދި ނަމަވެސް ހަކަށް އައިސް ލަނޑު ޖެހުމުގައި ޗެލްސީއަށް ދިމާވެފައިވާ މައްސަލަ، އެ ޓީމަށް ވަނީ މި މެޗުގައި ވެސް ކުރިމަތިވެފައެވެ. ނަމަވެސް މި މެޗުގައި އެ ޓީމުން ވަނީ ނުރައްކާތެރި ހަމަލާތަކެއް ޑޯޓްމަންޑްގެ ގޯލަށް އަމާޒުކޮށްފައެވެ. ފެލިކްސްއާއި ރީސް ޖޭމްސްގެ އިތުރުން އެންޒޯ ހެނާންޑޭޒްގެ ހަމަލާތަކުގެ ހުރަހަކަށް ވީ މުޅި މެޗުގައި ވެސް މޮޅު ކުޅުމެއް ދެއްކި ޑޯޓްމަންޑްގެ ކީޕަރެވެ.

މެޗުގައި ފެނިގެންދިޔަ ހަމައެކަނި ލަނޑު 63 ވަނަ މިނެޓުގައި ޑޯޓްމަންޑަށް ކާމިޔާބު ކޮށްދީފައި ވަނީ ކަރީމް އަޑޭމީއެވެ. ޑޯޓްމަންޑުން އުފެއްދި ކައުންޓަ އެޓޭކެއްގައި އަޑޭމީ ވަނީ އަމިއްލަ ހާފުން ބޯޅަ ހިފައިގެން ގޮސް ޗެލްސީގެ ކީޕަރު ކައިރިން ނައްޓާލުމަށް ފަހު ބޯޅަ ގޯލުގެ ތެރެއަށް ފޮނުވާލާފައެވެ.

މި ދެ ޓީމް ބައްދަލުކުރާ ދެވަނަ ލެގުގެ މެޗު ކުޅޭނީ އަންނަ މަހު ހަތްވަނަ ދުވަހު ޗެލްސީގެ ދަނޑުގައެވެ. މި ނަތީއްޖާގެ ސަބަބުން މުބާރާތުގެ ކުއާޓާއިން ޗެލްސީން ޖާގަ ހޯދަން ބޭނުންނަމަ އެ މެޗުން ދެ ލަނޑުގެ ތަފާތަކުން މޮޅުވަން އެޓީމަށް ވަނީ މަޖުބޫރު ވެފައެވެ.

ރޭ ދެވަނަ ބުރުގައި ބެލްޖިއަމްގެ ކުލަބް ބްރޫޖްއާއި ޕޯޗުގަލްގެ ބެންފީކާ ބައްދަލުކުރި މެޗު 2-0 ގެ ނަތީޖާއިން ކާމިޔާބުކޮށް މުބާރާތުގެ ކުއާޓާއާއި ގާތަށް ބެންފީކާ މި ވަނީ ޖެހިލާފައެވެ. އެޓީމުގެ ލަނޑުތައް ކާމިޔާބު ކޮށްދީފައި ވަނީ ޖޯ މާރިއޯއާއި ޑޭވިޑް ނެރެސްއެވެ.