ޖުޑިޝަލް ސާވިސް ކޮމިޝަނުން އަނެއްކާވެސް އިތުރު ޤާޒީ އަކު ސަސްޕެންޑް ކޮށްފިއެވެ.

މިފަހަރު ސަސްޕެންޑް ކޮށްފައިވަނީ ޏ ފުވައްމުލަކު މެޖިސްޓްރޭޓް ކޯޓުގެ މެޖިސްޓްރޭޓް އަލްއުސްތާޒް އަހްމަދު އަކްރަމް އެވެ. އަކްރަމް ސަސްޕެންޑު ކޮށްފައިވަނީ ހަތް ދުވަހުގެ މުއްދަތަށެވެ.

ޖޭއެސްސީ އިން މިއަދު ވަނީ އެހެން ގާޒީ އަކުވެސް ސަސްޕެންޑު ކޮށްފައެވެ. ފެމިލީ ކޯޓުގެ ގާޒީ އަލްއުސްތާޒް ހަސަން ސައީދު ވަނީ 14 ދުވަހަށް ސަސްޕެންޑް ކޮށްފައެވެ.

Advertisement

ޖޭއެސްސީ އިން މިއަދު ނެރުނު ބަޔާނެއްގައި ބުނެފައިވަނީ ގާޒީ ހަސަން ސައީދު ސަސްޕެންޑް ކުރަން ނިންމީ ފަނޑިޔާރުންގެ ގާނޫނާއި ފަނޑިޔާރުންގެ ސުލޫކީ މިންގަނޑާ ހިލާފުވެފައިވާތީ، ޖޭއެސްސީގެ ގާނޫނުގެ ދަށުން ކަމަށެވެ. ގާޒީ ހަސަން ސައީދު ސަސްޕެންޑް ކުރިޔަސް، މުސާރަ އާއި އިނާޔަތްތައް ލިބިވަޑައިގަންނާނެ ކަމަށް ބަޔާނުގައި ބުނެފައިވެއެވެ..

ހަސަން ސައީދު ވަނީ ކޯޓުން ބޭރުގައި ކައިވެނިކޮށްދޭ އުސޫލުގެ މަތީން އިންތިޒާމްތައް ހަމަޖައްސައިގެން ކުރިއަށް ގެންދިއުމަށް ފެމިލީ ކޯޓުގެ އިސް ގާޒީގެ ހައިސިއްޔަތުން، ގާޒީ ހަސަން ސައީދު އެ ކޯޓުގެ ކައިވެނީގެ ރަޖިސްޓްރާ އަށް ލަފާ ދީފައެވެ.

ނަމަވެސް ފެމިލީ ކޯޓަށް ހުށަހެޅޭ ކައިވެނިތައް ކޮށްދިނުމާ މެދު ގޮތް ނިންމުމުގައި ގާނޫނީ ހައިސިއްޔަތު އޮންނަ ފަރާތަކީ އެ ކޯޓުގެ ކައިވެނީގެ ރަޖިސްޓްރާ ކަމަށްވާ ހިނދު، ހަސަން ސައީދު ދީފައިވާ ލަފާގެ ސަބަބުން ގާނޫނާއި ގަވާއިދާ އަދި ފެމެލީ ކޯޓުގައި ޢަމަލުކުރާ އުސޫލުތަކާ ހިލާފަށް ކައިވެންޏެއް ކޮށްދިނުމަށް މަގުފަހިވެފައިވާކަން ސާބިތުވާ ކަމަށް ވެސް އެ ބަޔާނުގައިވެއެވެ.