ތުރްކިޔޭ އާއި ސީރިޔާ އަށް މިދިޔަ ހަފްތާގައި އައި ބާރުގަދަ ބިންހެލުން ތަކަށް 228 ގަޑި އިރު ވީ ފަހުން މަންމަ އަކާއި އޭނާގެ ދެ ކުދިން ސަލާމަތް ކޮށްފިއެވެ.

މި ތިން މައިން ސަލާމަތް ކޮށްފައިވަނީ ތުރްކިޔޭގެ އަންޓާކިޔާގައި ރެސްކިޔު ވޯކަރުން ހިތްވަރު އެލުވާނުލާ ކުރަމުންދާ މަސައްކަތުން ނެވެ.

މި ތިން މައިން ސަލާމަތް ކުރުމަށް މަސައްކަތް ކުރި ރެސްކިޔު ވޯކަރު މެހެމަތް އެރީލްމަޒް ބުނެފައިވަނީ އެދެކުދިން މަންމަ އެލާ ކޮންކްރިޓް ތަކުގެ ދަށުން ނެގުމުން އެންމެ ފުރަތަމަ ސުވާލުކުރީ މިއީ ކޮންދުވަހެއް ތޯ ކަމަށެވެ.

"ފުރަތަމަ އަހަންނަށް އޭނާގެ އަތުގައި ހިފިން، ވާހަކަ ދެއްކިން، އޭނާ ހަމަޖެއްސިން، އަހަރެމެންގެ މަސައްކަތް ކުރިއަށް ގެންދިޔައީ އެއަށްފަހު، އަހަރެމެން މިތިބީ ވަރަށް އުފާވެފަ، މިއީ މިއަދު ސަލާމަތް ކުރެވުނު 5 ވަނަ ފުރާނަ" މެހެމަތް ކިޔައިދިނެވެ.

"އޭނާ އެންމެ ފުރަތަމަ އެދުނީ ފެންފޮދެއް ދިނުމަށް، އެކަމަކު މެޑިކަލް ޓީމުން އައިސް ހާލަތު ބެލުމުގެ ކުރިން އެއްވެސް އެސްޗެއް ނުދެވޭނެތީ އެކަން ކޮށެއް ނުދެވުނު،" އޭނާ އިތުރަށް ބުންޏެވެ.

އެލާ އާއި އޭނާގެ ކުދިންނަށް އަވަސްފަރުވާ ދިން ހެލްތް ވޯކަރ އަލީ ޕަރްލަސް ބުނީ ތިންމައިން ވެސް ތިބީ ޑީހައިޑްރޭޓް ވެފައި ކަމަށާއި، ތިން މައިންގެ ހާލަތު އާންމު ގޮތެއްގައި ރަނގަޅުކަމަށެވެ.

މި ކާރިސާގައި މިހާތަނަށް ދެ ޤައުމުން 42،000 މީހުންވަނީ މަރުވެފައެވެ. ތުރްކިޔޭ އިން މިހާތަނަށް 36،187 މީހުން ވަނީ މަރުވެފައެވެ. އަދި ސީރިޔާ އިން މަރުވެފައިވާ މީހުންގެ ޢަދަދު 5،800 މީހުން ވަނީ ނިޔާވެފައެވެ.

ވޯލްތް ހެލްތް އޮގަނައިޒޭޝަނުން ބުނެފައިވަނީ ސީރިޔާގެ ހުޅަނގު އުތުރަކީ މިހާރު މިވަގުތައް އެންމެ ބޮޑަށް ސަމާލުކަން ދޭންވި ހިސާބުކަމަށެވެ. އެސަރަހައްދުގައި ހާލުގައި ޖެހިފައި ތިބި މީހުން މިހާރު ތިބީ އެހީގެ ގާފިލާތައް އައުން ލަސްވެ އަސާސީ އަދި ޒަރޫރީ ބޭނުންތަކުން މަހްރޫމް ވެފައިވާތީ ރުޅިގަދަވެފައެވެ.

ޔޫއެން އިން މިހާރު ވަނީ ސީރިޔާގައި ހާލުގައި ޖެހިފައިތިބި 5 މިލިއަން މީހުންނަށް ވަގުތީ ބޯހިޔާވަހިކަމާއި، ސިއްހީ އެހީ އަދި ކާބޯތަކެތި ފޯރުކޮށްދިނުމަށް 397 މިލިއަން ޑޮލަރުގެ އެހީ ދިނުމަށް ނިންމާފައެވެ.