އައްޑޫގެ މަގުތައް ހެދުމަށް އިންޑިއާގެ އެފްކޮންސް ކުންފުންޏާއި ހަވާލު ކުރެވުނީ އިންޑިޔާގެ ލޯނު އެހީގެ ދަށުން ހިންގާ މަޝްރޫއެއް ކަމަށް ވީމާ ކަމަށް ރައީސް އޮފީހުގެ ތަރުޖަމާން މިއުވާން މުހައްމަދު ވިދާާޅުވެއްޖެއެވެ.
މިއުވާން މިހެން ވިދާޅުވެފައިވަނީ މިއަދު ރައީސް އޮފީހުގައި ހަޔާ އެޑިޔުކޭޝަން މިނިސްޓަރ އާއިއެކު ބޭއްވުނު ނޫސްވެރިންގެ ބައްދަލުވުމުގައި "ވޮއިސް" އިން ކުރި ސުވާލަކަށް ޖަވާބު ދެއްވަމުންނެވެ.
އެމްޓީސީސީ ފަދަ ގާބިލް ދިވެހި ކުންފުންޏެއް އޮތް އިރު އިންޑިއާގެ އެފްކޮންސް ކުންފުންޏަށް އައްޑޫ މަގު ހަދަން ހަވާލު ކުރީ ކީއްވެތޯ "ވޮއިސް" އިން ސުވާލު ކުރުމުން މިއުވާން ވަނީ އެމްޓީސީސީ އަކީ ޤާބިލް ކުންފުންޏެއް ކަން ފާހަގަ ކުރައްވާފައެވެ.
އެގޮތުން އެމްޓީސީސީ އަކީ ރާއްޖޭގެ އުތުރުން ދެކުނަށް ސަރުކާރުގެ ވަރަށް ގިނަ ތަރައްޤީގެ މަޝްރޫއުތައް ހިންގާ ކުންފުންޏެއްކަަމަށް ވިދާޅުވި އެވެ.
އަދި އެ ކުންފުނިން ތަރައްޤީގެ މަޝްރޫއުތައް ނިންމަމުންދާ ސްޕީޑުން ކުންފުނީގެ ޤާބިލްކަން ފެނިގެން ދާ ކަމަށް ވެސް މިއުވާން ވިދާޅުވިއެވެ.
ނަމަވެސް އައްޑޫގެ މަގުތައް ހެދުމަށް އިންޑިއާގެ ކުންފުނި އެފްކޮންސް އާއި ހަވާލު ކުރީ އައްޑޫގެ މަގުތައް ތަރައްޤީ ކުރަމުން ދަނީ އިންޑިއާގެ ލައިން އޮފް ކްރެޑިޓްގެ ފެސިލިޓީ ގެ ތެރެއިން ކަމަށްވާތީއެވެ. އެހެންކަމުން އިންޑިއާގެ ކުންފުންޏަކަށް އެ ޕްރޮޖެކްޓް ދަނީ ކަމަށް މިއުވާން ވަނީ ވިދާޅުވެފައެވެ.
އިންޑިޔާގެ އެގްޒިމް ބޭންކުން ދީފައިވާ ލައިން އޮފް ކުރެޑިޓު (ލޯނު)ގެ ދަށުން އައްޑޫގެ މަގުތައް ހެދުމުގެ އަމަލީ މަސައްކަތުގެ އެއްބަސްވުމުގައި ސޮއިކުރީ 2021 ވަނަ އަހަރުގެ ފެބްރުއަރީ 21ގަ އެވެ. އެ މަޝްރޫއު ކުރިއަށް ގެންދާ ގޮތާ މެދު އެ ސިޓީ ރައްޔިތުންގެ ގިނަ ކަންބޮޑުވުންތަކެއް ހުރިކަމަށް ވިދާޅުވެ، މައްސަލަތަށް ހައްލުކޮށް މަސައްކަތް އަވަސްކުރުމަށް ޕްލޭނިން މިނިސްޓަރު މުހައްމަދު އަސްލަމް ވެސް މިދިޔަ ހޮނިހިރު ދުވަހު ވަނީ އައްޑޫއަށް ވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
