ކުޑަކުއްޖަކަށް ޖިންސީގޯނާ ކުރިކަމަށް ތުހުމަތު ކުރެވުނު ބިދޭސީއެއް ޑީޕޯޓް ކޮށްލައިފިއެވެ.
ޖިންސީ ނިޔަތެއްގައި ކުޑަކުއްޖެއްގެ ގައިގައި އަތްލުމުގެ ދައުވާ ކޮށްފައި ވަނީ އިންޑިއާ ރައްޔިތެއް ކަމަށްވާ ރަމޭޝް ސިލްވަމޮނީ ނަމަކަށް ކިޔާ އެ މީހާގެ މައްޗަށެވެ.
އޭނާގެ މައްސަލަ ހައި ކޯޓުގައި އިސްތިއުނާފުކޮށް އެ މައްސަލަ ފެށި އިރު އޭނާ ވަނީ ޑިޕޯޓް ކޮށްލާފައެވެ. އެހެންކަމުން އެ މައްސަަލަ ކޯޓުން ވަނީ ބާތިލު ކޮށްފައެވެ.
އޭނާގެ މައްޗަށް ކުށް ސާބިތު ނުވާކަމަށް ކްރިމިނަލް ކޯޓުން ހުކުމް ކުރީ މިދިޔަ އަހަރުގެ ސެޕްޓެމްބަރު މަހު ތެރޭގައެވެ.
ހައި ކޯޓުގެ ސިޓީއަކަށް ޖަވާބު ދެމުން ޕީޖީ އޮފީހުން ފޮނުވި ސިޓީގައި ވާގޮތުން އޭނާ ޑިޕޯޓުކޮށްލާފައި ވަނީ އެ މައްސަލަ ހައި ކޯޓުގައި އިސްތިއުނާފުކުރި ދުވަހުއެވެ. އެއީ މިދިޔަ އަހަރުގެ ޑިސެމްބަރު މަހުގެ އަށް ވަނަ ދުވަހެވެ.
ހައި ކޯޓުން ރަމޭޝްގެ މައްސަލަ ބޭރުކޮށްލީ، އޭނާ އުޅޭ ތަނެއް ހޯދިއްޖެ ނަމަ އަލުން މައްސަލަ ހައި ކޯޓަށް ހުށަހެޅުމުގެ ފުރުސަތު ލިބޭނެކަން ޕީޖީ އޮފީހަށް އަންގަމުންނެވެ.
Advertisement
This content is created and paid for by advertisers and does not involve Voice Journalists
