ހަނގުރާމައިގެ ސަބަބުން ރައްކާތެރިކަން ގެއްލި އަމިއްލަ ވަޒަން ދޫކޮށް ތުރްކިޔޭ އަށް ހިޖުރަ ކުރި ސީރިޔާގެ ރެފިޔުޖީން، ބިންހެލުމަށް ފަހު އަނބުރާ ސީރިޔާއަށް ދަތުރުކުރަން ފަށައިފިއެވެ.

އަމާންކަމާއި ރައްކާތެރިކަން ގެއްލި އަމިއްލަ ހިޔާ ވަހިކަމާއި ގެދޮރު ދޫކޮށް ތުރްކިޔޭ އަށް ހިޖުރަކުރި އެތައް ސަތޭކަ ސީރިޔާ ރައްޔިތެއް ތުރްކިޔޭގައި އާބާދު ކުރި ދިރިއުޅުން  ބިންހެލުގައި ގެއްލުމާއި ގުޅިގެން ދަނީ އަނބުރާ ސީރިޔާއަށް ދަތުރު ކުރަމުންނެވެ. ސީރިޔާގައި ހުރި އެމީހުންގެ ގެތައް ވެސް ހުރީ ހަނގުރާމައިގެ ސަބަބުން ހަލާކުވެފައެވެ.

ތުރްކިޔޭގެ އޮތޯރިޓީ ތަކުން މިހާރު ވަނީ ތުރްކިޔޭ އިން ސީރިޔާ އަށް އެތެރެވެވޭން ހުރި މަގުތައް ހުޅުވާލަދޭނެކަން އިއްލާނުކޮށްފައެވެ.

ސީރިޔާގެ ހަލްފާޔާ އަށް ނިސްބަތްވާ 69 އަހަރުގެ މުހައްމަދު އަލް ސަވާދު ތުރްކިޔޭގެ އިސްކަންދަރުން ސިޓީ ކައިރީގައި އޮންން ހަޓޭޔާ ޕްރޮވިންސްގައި ދިރިއުޅޭތާ 11 އަހަރުވެއްޖެއެވެ. 11 އަހަރުން އާބާދު ކުރި ދިރިއުޅުން ގެއްލި މުހައްމަދު ވެސް ވަނީ ސޫރިޔާއަށް އަނބުރައި ދިއުމަށް ދަތުރުފަށައިފައެވެ.

ބާބް އަލް ހަވާ އިން ބޯޑަރު ހުރަސްކުރުމަށް އޭނާ ގޮސް ހުއްޓައި އޭނާއާއި ވާހަކަ ދެއްކި އަލްޖަޒީރާގެ ރިޕޯޓަރަށް އޭނާ އެދުވަހު ކަންވީގޮތް އޭނާ ކިޔައިދިނެވެ.

"ބިންހެލުން އައި ދުވަހު، ފުރަމަތަ އަހަރެމެން ދިރިއުޅެމުންދިޔަ އިމާރާތް ތެޅުވެންފެށި، ދެން ކެނޑުނީ ކަރަންޓު، ކަރަންޓު ކެނޑި އަނދިރިވީމަ ވަރަށް އުނދަގުލުން އަހަރެމެންނަށް އެޕާޓްމެންޓުން ބޭރަށް ނުކުމެވުނީވެސް" މުހައްމަދު ބުނެފައިވެއެވެ.

ބިންހެލުމުގެ ފަހުން މުހައްމަދާއި އޭނާގެ އާއިލާ ހޭދަކުރީ ފާމްއެއްގައެވެ. ވެހެމުންދިޔަ ވާރެޔާއި ފިނިމޫސުމުގެ ފިންޏާއި އެކު 3 ދުވަސް ހޭދަ ކުރިފަހުން ތުރުކިޔޭގެ ސަރުކާރުން، ބޯހިޔާވަހިކަން ގެއްލުނު

މީހުންނަށް ޚާއްސަ ކުރި ވަގުތީ ހިޔާވަހިކަމަށް ބަދަލު ކުރެވުނެވެ. މުޙައްމަދާއި އެކު އިތުރު3000  އެއްހާ މީހުން އެތަނަށް ބަދަލުކުރެވުނެވެ.

"އަހަރެން މިއަދު ސީރިޔާއަށް މިދަނީ، އަހަންނަށް އަހަރެންގެ ތިމާގެ މީހުންނާއި އެކު ދިރިއުޅެވޭނެ، އާއިލާ މެންބަރުން ގެއްލި ދިޔަ އެކުވެރިންނަށް ހިތްވަރުދޭން ހުރެވޭނެ" މުހައްމަދު ބުންޏެވެ.

1790 އަށްވުރެ ގިނަ މީހުން ތުރްކިޔޭ ދޫކޮށް ސީރިޔާއަށް އަނބުރާ ގޮއްސައިވެއެވެ.

"ބާބް އަލް ހަވާގައި އަހަރެމެން ތުރްކިޔޭ އިން ސީރިޔާއަށް އަންނަ މީހުން މިދަނީ ސީރިޔާއަށް ވަނުމަށް ބޭނުންވާ ލިޔެކިޔުންތައް ބަލައި، އެމީހުން ސީރިޔާ އަށް ވަންނަ ތާރީޚާއި އަނބުރާ ދާނެ ތާރީޚް ޖަހައިދެމުން މިދަނީ" ޑިރެކްޓަރ އޮފް ޕަބްލިކް ރިލޭޝަންސް މާޒިން އަލޮއިޝް ވިދާޅުވިއެވެ.

ބޯޑަރު ހުރަސްކޮށް ސީރިޔާއަށް ވަނުމުގެ ހުއްދަދެނީ ވަގުތީ ރައްކާތެރިކަމުގެ ކާޑު އޮތް މީހުނެވެ. އެއީ ބިންހެލުމުގެ އަސަރުކުރި ތުރްކިޔޭގެ 10 ޕްރޮވިންސްގައި ދިރިއުޅޭމީހުންނެވެ.

މިއީ ފާއިތުވި 2 އަހަރުގެ ތެރޭގައި ސީރިޔާގެ ރެފިޔުޖީންނަށް ބޯޑަރު ހުރަސްކުރުމަށް ބާބް އަލް ހަވާ ރަސްމީކޮށް ހުޅުވައިލެވުނު ފުރަތަމަ ފަހަރު ކަމަށް މާޒިން ވިދާޅުވިއެވެ.

ރަސްމީގޮތުން ބާބް އަލް ހަވާ ހުޅުވާލުމުގެ ކުރިން ރެފިޔުޖީންގެ ތެރެއިން ސީރިޔާއަށް އެތެރެވެވިފައިވަނީ މަރުވެފައި ހުރި ހަށިގަނޑުތަކަށެވެ.