ޔުއެފާ ޔޫރޮޕާ ލީގު ޕްލޭ އޮފްގެ ފުރަތަމަ ލެގުގައި ސްޕެއިންގެ ބާސެލޯނާ އާއި އިގިރޭސިވިލާތުގެ މެންޗެސްޓަރ ޔުނައިޓެޑު ވާދަކުރި މެޗު 2-2 ގެ ނަތީއްޖާއަކުން އެއްވަރުވެ، މުބާރާތުގެ ގަދަ 16 ޓީމުގެ ތެރޭގައި ހިމެނުމުގެ ފުރުސަތު ޔުނައިޓެޑުން ބޮޑުކޮށްފިއެވެ.

ބާސެލޯނާގެ ދަނޑުގައި މިރޭ ކުޅެވުނު މެޗުގެ ފުރަތަމަ ހާފުގައި ގިނަވަގުތު ބޯޅަގެންގުޅެ މެޗު ޑޮމިނޭޓުކުރީ ބާސާ އިންނެވެ. ނަމަވެސް މިހާފުގައި ލަނޑުޖަހާނެ ރަގަޅު ހުސް ދެ ފުރުސަތެއް ޔުނައިޓެޑައް ލިބި ވަނީ ބޭނުން ނުކުރެވިފައެވެ. ޔުނައިޓެޑުގެ ވޯޓް ވެގްހޯސްޓް އަދި މާކަސް ރަޝްފޯޑް ފޮނުވާލި ހަމަލާތައް ބާސެލޯނާގެ ކީއްޕަރު މާކް-އަންދްރޭ ޓަރ ސްޓެގަން ދިފާއުކުރި އިރު، މިހާފުގައި ބާސެލޯނާ ޓީމުން އެންމެ ހުސް ފުރުސަތެއް ލިބުނީ އެޓީމުގެ ޑިފެންޑަރ ޖޯޑީ އަލްބާ އަށެވެ. މެންޗެސްޓަރ ޕެނަލްޓީ އޭރިއާ ތެރެއިން އަލްބާ ފޮނުވާލި ހަމަލާ ޔުނައިޓެޑުގެ ކީއްޕަރ ވަނީ ދިފާއުކޮއްފައެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ކާމިޔާބުނުކުރެވި ދެ ޓީމު އެއްވަރުވެގެންނެވެ.

ބާސެލޯނާގެ ކުޅުންތެރިން ލަނޑުޖެހުމަށް ފަހު އުފާ ފާޅުކުރަނީ

މެޗުގެ ދެވަނަ ހާފު ފެށިގެން ވަރަށް ކުރީކޮޅު ބާސެލޯނާ އިން މެޗުގެ ލީޑު ނެގިއެވެ. މި ލަނޑު ދެވަނަ ހާފުގެ 50 ވަނަ މިނެޓުގައި ކާމިޔާބުކޮށްދިނި ޑިފެންޑަރ މާކޯސް އަލޮންސޯ އެވެ. މިއީ ބުރެޒިލްގެ ފޯވާޑް ރަފިންހާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކުރި ލަނޑެކެވެ. ބާސެލޯނާއިން ލީޑުނެގިތާ ދެ މިނެޓު ފަހުން ޔުނައިޓެޑުން ލަނޑެއް ކާމިޔާބުކޮށް މެޗުގެ ނަތީއްޖާ އެއްވަރުކުރިއެވެ. މި ލަނޑު ދެވަނަ ހާފުގެ 52 ވަނަ މިނެޓުގައި ކާމިޔާބުކޮށްދިނީ މާކަސް ރަޝްފޯޑްއެވެ. މިއީ ބްރެޒިލްގެ މިޑްފީލްޑަރ ފުރެޑް ތަނަވަސްކޮށްދިން ފުރުސަތެއްގައި ރަޝްފޯޑް ކާމިޔާބުކޮށްދިން ލަނޑެކެވެ.

މި މެޗުގައި ފުރަތަމަ ފަހަރަށް ޔުނައިޓެޑަށް ލީޑު ލިބުނީ ދެވަނަ ހާފުގެ 59 ވަނަ މިނެޓުގައި ބާސާގެ ޑިފެންޑަރ ޖޫލްސް ކޫންޑޭ އަތުން ބައިކޮޅަށް ވަން ގޯލަކުންނެވެ. މި ލަނޑާއި އެކު ޔުނައިޓެޑު މޮޅުވާން ދަނިކޮށް ބާސެލޯނާއަށް މެޗުގެ ނަތީއްޖާ އެއްވަރުކޮށްދިނީ 76 ވަނަ މިނެޓުގައި ބުރެޒިލްގެ ފޯވާޑް ރަފިންހާ އެވެ. އަދި މެޗުގެ ފަހުކޮޅު ދެ ޓީމަށް ވެސް ވަނީ ލަނޑުޖަހާނެ ރަގަޅު ހުސް ފުރުސަތުތަކެއް ލިބި އިތުރު ލަނޑެއް ކާމިޔާބުކުރެވޭގޮތްވަނީ ނުވެފައެވެ. 

މި ދެޓީމުގެ މެދުގައި ކުޅޭ ދެވަނަ ލެގް ފެބުރުއަރީ މަހުގެ 24 ވަނަ ދުވަހު މެންޗެސްޓަރ ޔުނައިޓެޑުގެ ދަނޑުގައި ކުޅޭއިރު، މުބާރާތުގެ ދެވަނަ ބުރުން ފުރުސަތު ލިބޭނީ އެ މެޗުން މޮޅުވާ ޓީމަކަށެވެ.