ޤުދުރަތީ ގޮތުން ކުރިމަތިވާ ކާރިސާތަކާއި ދުނިޔޭގެ ޙަޔާތާއި މަރަކީވެސް ދިރިތިބީންނަށް ކުރިމަތިވާ ބޮޑުވެގެންވާ އިމްތިޙާނެއް ކަމަށް މިއަދުގެ ޚުތުބާގައި ބުނެފިއެވެ. 

"ދުންޔަވީ ކާރިސާތަކުން އިބުރަތް ހާސިލްކުރުން" މި މައުޟޫއަށް ހާއްސަކޮށްގެން މިއަދު ދިން ހުތުބާގައި ބުނީ، ބިންހެލުން ފަދަ ކާރިސާތަކަކީ  އިންސާނުންނަށް މާތް الله‎ ކުރިމަތިކުރުވާ އިމްތިހާނުތަކުގެ ތެރޭގައި ހިމެނޭ ކަމެއް ކަމަށެވެ. 

"ޝައިތާނާގެ ފިޔަވަޅުތަކުގެ ފަހަތުންގޮސް މަގު އޮޅިގެންދާ ހިނދު، މިފަދަ ކަންކަން އަހަރެމެންނާ ކުރިމަތި ކުރިމަތިކުރައްވަނީ  ތައާލާ ލައްވާފައިވާ އިންޒާރެއްގެ ގޮތުގަ އެވެ. އެއއީ އަހަރެމެން ތެދުމަގަށް ރުޖޫއަވުމަށްޓަކަ އެވެ،" ހުތުބާގައި ބުނެފައިވެ އެވެ.

Advertisement

ތުރުކިޔޭ އާއި ސީރިޔާއަށް ކުރިމަތިވި ބިންހެލުމުގެ ކާރިސާއަށް އަލި އަޅުވާލައި ޚުތުބާގައި އިތުރަށް ބުނީ، ޤުދުރަތީ ގޮތުން ކުރިމަތިވާ މިފަދަ ކޮންމެ ކަމަކީ، ދިރިތިބީންނަށް ކުރިމަތިވާ ބޮޑުވެގެންވާ އިމްތިޙާނެއް ކަމަށެވެ. ‎

"ޤުދުރަތީ ގޮތުން ކުރިމަތިވާ މިފަދަ ކޮންމެ ކަމަކީ، ދިރިތިބީންނަށް ކުރިމަތިވާ ބޮޑުވެގެންވާ އިމްތިޙާނެކެވެ. ދުނިޔޭގެ ޙަޔާތާއި މަރަކީވެސް އިމްތިޙާނެކެވެ. އެކަން ބަޔާންކުރައްވާ ވަހީ ކުރައްވާފައި ބަސްފުޅެއްގެ މާނާގައިވެއެވެ. “އެކަލާނގެއީ ތިޔަބައިމީހުންކުރެ އެންމެ ޢަމަލު ރަނގަޅި ކާކުތޯ އިމްތިޙާނު ކުރެއްވުމަށްޓަކައި މަރުވުމާއި ދިރިހުރުން އުފެއްދެވި ރަސްކަލާނގެއެވެ. އަދި އެކަލާނގެއީ، ޢަޒީޒުވަންތަ، ގިނަގިނައިން ފާފަފުއްސަވާ ރަސްކަލާނގެއެވެ.” ޚުތުބާގައި ބުނެފައިވެއެވެ.

އެހެންކަމުން، ދިރިބީންގެ މައްޗަށް ވާޖިބުވެގެންވަނީ الله ސުބުހާނަހޫ ވަތަޢާލާ އަހަރެމެންނާ ކުރިމަތިކުރައްވާ މުޞީބާތްތަކާއި، އިމްތިޙާނުތަކަށް ކެތްތެރިވެ، މިފަދަ ކާރިސާތަކުން ޢިބްރަތް ޙާސިލުކޮށް، ޢަމަލުތައް އިސްލާޙުކުރުމެވެ. ޙައްޤު ގޮތުގައި اللهގެ މަގަށް އުޖޫޢަވުން ކަމުގައި ވެސް ޚުތުބާގައި ބުނެފައިވެއެވެ.