ރާއްޖޭގައި މަޝްރޫއު ހިންގަމުންދާ އިންޑިއާގެ 5 ކުންފުންޏަކަށް އިންކަމް ޓެކްސް މާފުކޮށްދިން ގޮތަށް ހިޔާ ފްލެޓުތަކުގެ ފިނިޝިން ނިންމަން ނެގި ލޯނުތައް މާފުކޮށްދީ، އެ ފްލެޓުތަކަށް ނިކަމެތިން ދައްކަމުންދާ ކުލި މާފުކޮށްދިނުމަށް ބޯހިޔާވަހިކަން ކަށަވަރުކޮށްދިނުމަށް މަސައްކަތް ކުރާ ޖަމުއިއްޔާއެއްކަމަށްވާ އާންމުންގެ އެކުވެރި ޖަމުއިއްޔާއިން ގޮވާލައިފި އެވެ.

އެ ޖަމުއިއްޔާއިން ބުނީ ހިޔާ ފްލެޓުތަކުގެ ފިނިޝިން ނުނިންމާ އާންމުނަށް އެތަންތަން ހަވާލުކުރީ އެކަން ކުރާނެ ފައިސާ ސަރުކާރުގައި ނެތް ކަމަށް ބުނެ ކަމަށެވެ.

ސަރުކާރުގައި ފައިސާ ނެތްކަމަށް ބުނާއިރު، އިންޑިއާގެ ކުންފުނިތަކަކަށް އެއް ބިލިއަނަށްވުރެ ގިނަ ރުފިޔާގެ ޓެކްސް މާފުކޮށްދިނުމުން ފައިސާ ނެތަކަމަށް ބުނާ ވާހަކައަކީ ގަބޫލު ކުރެވޭނެ ވާހަކައެއް ނޫންކަމަށް އެ ޖަމުއިއްޔިން ވަނީ ބުނެފަ އެވެ.

އާންމުންގެ ޖަމުއިއްޔާއިން ބުނި ގޮތުގައި ހިޔާ ފްލެޓުވެރިންގެ ގިނަ ބައެއްގެ އާމްދަނީން ބޮޑުބައި ހަރަދު ކުރަން ޖެހެނީ ފްލެޓުގެ ކުލި ދެއްކުމަށާއި، ތަން ނިންމަން ނެގި ލޯނު އަނބުރާ ދެއްކުމަށެވެ.

ހިޔާ ފްލެޓުތަކުގެ ފިނިޝިން ނިންމަން އެންމެ އަގުބޮޑުކޮށް ސަރުކާރުން ހިސާބު ޖެހުމުންވެސް އައީ 600 މިލިއަން ރުފިޔާ ކަމަށް އެ ޖަމުއިއްޔާއިން ވަނީ ބުނެފައެވެ.

ފައިސާ ނެތްކަމަށް ބުނެ ރައްޔިތުންނަށް ފްލެޓުގެ ފިނިޝިން މަސައްކަތް ނިންމުމަށް ސަރުކާރުން އުޒުރުވެރިވެފައިވާއިރު އިންޑިއާގެ 5 ކުންފުންޏަށް މާދުކޮށްދީފައިވަނީ އެޔަށްވުރެ ދެގުނަ ބޮޑު އަދަދެއްކަން ފާހަގަކޮށް އާންމުންގެ ޖަމުއިއްޔާއިން ވަނީ ކަންބޮޑުވުން ފާޅުކޮށްފަ އެވެ.

އެހެންކަމުން ބޭރުގެ ކުންފުނިތަކަށް ބިލިއަނުން ޓެކްސް މާފުކޮށްދިނުމުގެ ބަދަލުގައި، ހިޔާ ފްލެޓުތައް ނިންމަން އާންމުން ނެގި ލޯނު މާފުކޮށްދިނުމަށް އާންމުންގެ ޖަމުއިއްޔާއިން ވަނީ ގޮވާލާފަ އެވެ. އަދި ފްލެޓުގެ ކުއްޔަށްވާ 8،500ރ. ހޯދަން އާންމުންގެ ފަހަތުން ނުދުވެ، ނިކަމެތިންގެ ކުލި މާފުކޮށްދިނުމަށް ވެސް ގޮވާލާފަ އެވެ.