އަންނަ ރިޔާސީ އިންތިޚާބު ކާމިޔާބުކޮށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ވެރިކަމުގައި ދެމިއޮވެވޭނީ ޒާތީ ތައައްސުބު އެއްފަރާތްކޮށް އެންމެން ގުޅިގެން މަސައްކަތް ކުރުމުންކަމަށް ޕާޓީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެ އެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް އެމްޑީޕީގެ ރިޔާސީ ޓިކެޓު އެރުވުމަށް ބޭއްވި ޚާއްސަ ޖަލްސާގައި ވާހަކަދައްކަވަމުން ފައްޔާޒު ވިދާޅުވީ، އެމްޑީޕީއަށް އަނބުރާ ވެރިކަމަށް އާދެވުނީ ވަރަށް ބޮޑު ގުރުބާނީއެއް ވެގެން ކަމަށެވެ. އެ މަސައްކަތުގެ ތެރެއިން ވަރަށް ގިނަ ބަޔަކަށް ޖިންސާނީ ގޮތުންނާއި ނަފްސާނީގޮތުން ބޮޑެތި އަނިޔާތަކެއް ލިބިގެންދިޔަކަމަށް އޭނާ ވިދާޅުވިއެވެ.
"ފުރަތަމަ އެކަމަށް ނިކުތް އިރުވެސް އޭރު އެމްޑީޕީގައި އެ މަސައްކަތްކުރެއްވި ބޭފުޅުންނަށް އެނގޭ އެކަމުގައި ހުރި ބިރުވެރިކަމާ އެކަމުގައި ހުރި ނުރައްކާތަކާއި، އެކަމުގައި ހުރި އަސަރު. އޭރު ނިކުތް މީހުންނަށް ބޮޑެތި އަނިޔާތައް ތަހަންމަލު ކުރަން ޖެހުނު. ޖިސްމާނީ އަނިޔާއާއި ޖަލުގެ ތޭރިތަކާއި ކުރިމަތިލާން ޖެހުނު. މުދާތައް ނިގުޅައިގަނެވުނު. އާއިލާތައް ރޫޅި ބިކަވެގެން ދިޔަ"
އެމްޑީޕީގެ ޗެއާޕާސަން ފައްޔާޒު އިސްމާއިލް
ފައްޔާޒު ވިދާޅުވީ ގިނަ ބައެއްގެ ބޮޑު ގުރުބާނީ އާއެކު، އުފެދުނު އެމްޑީޕީގެ ވެރިމަކަކީ ރައްޔިތުން ބޭނުންވިފަދަ ބަދަލެއް ކަމަށެވެ. އެގޮތުން މިއަދު ކުރެވެމުން މިދަނީ ރައްޔިތުން ބޭނުންވާ ރައްޔިތުންގެ ވެރިކަމެއްކަން އޭނާ ފާހަގަކުރެއްވި އެވެ.
އެއާއެކު ފައްޔާޒު ވިދާޅުވީ ރައްޔިތުންގެ ވެރިކަމެއް ދެމެހެއްޓުމަށް އެމްޑީޕީ ވެރިކަމުގައި އޮތުން މުހިންމު ކަމަށެވެ. އެކަން ކުރެވޭނީ ޒާތީ ތައައްސުބު އެއްފަރާތްކޮށް އެންމެން ގުޅިގެން މަސައްކަތް ކުރުމުންކަމަށް ފައްޔާޒު ވިދާޅުވި އެވެ.
"އަލުން އަނބުރާ އެ ދުވަސް އިޔާދަވާކަށް އެމީހުން ބޭނުމެއް ނުވޭ. އެ އަނިޔާވެރިކަމާ ބިރުވެރިކަމާ ނާއިންސާފު ދެކޭކަށް އެމީހުންނެއް، ދިވެހިންނެއް އެއްވެސް ހާލަތެއްގައި ބޭނުމެއް ނުވޭ. އެމީހުން އެދެނީ މި ކުރި މަސައްކަތް ނަތީޖާ، ދާއިމަށް ދެމިގެންދާނެ ގޮތަކަށް މި ޕާޓީގެ ފަރާތުން މަސައްކަތްކޮށް އެކަން ކަށަވަރުކުރަން. އާދެ! ޒާތީ ތައައްސުބުން އެއްކިބާވެތިބެން. އެންމެން އެކައްޗެއް ކިޔައިގެން މިފެށި މަސައްކަތައިގެން ކުރިއަށް ދިއުން"
އެމްޑީޕީގެ ޗެއާޕާސަން ފައްޔާޒު އިސްމާއިލް
އެމްޑީޕީގެ ވެރިކަން ދެމެހެއްޓުމަށް ގުޅިގެން މަސައްކަތް ކުރުމަށް ފައްޔާޒު ގޮވާލައްވާފައި ވާއިރު، އެމްޑީޕީގެ ރިޔާސީ ޕްރައިމަރީ ކާމިޔާބުކުރެއްވި ޕާޓީގެ އެންމެ އިސްލީޑަރަށް ރިޔާސީ ޓިކެޓު ރަސްމީކޮށް ހަވާލުކުރެއްވުމަށް ބޭއްވި ރަސްމިއްޔާތުގައި، ޕްރައިމަރީގައި ރައީސް ޞާލިހާއި ވާދަކުރެއްވި ޕާޓީގެ ރައީސް މުހައްމަދު ނަޝީދު ބައިވެރިވެވަޑައިގެންފައެއް ނުވެއެވެ.
އަނެއްކޮޅުން ނަޝީދުގެ ފަރާތްޕުޅުން ވަނީ އެ އިންތިޚާބު ބާތިލުކުރުމަށް މައްސަލައެއްވެސް ހުށައަޅުއްވާފައެވެ. އެހެން ނަމަވެސް އެ މައްސަލަ ބަލައިނުގަތުމަށް މިހާރު ކޯޓުން ވަނީ ނިންމާފަ އެވެ.
ރިޔާސީ ޕްރައިމަރީގައި ޕާޓީގެ ދެ ރައީސުން ވާދަކުރައްވާފައި ވާއިރު، ޕާޓީޣެ ތެރޭގައި ދެ ފެކްޝަން އުފެދި ބަހުގެ ހަމަލާތަކެއްވެސް ވަނީ ބަދަލުކުރެވިފައެވެ. މިހާތަނަށް ފެ ދެކްޝަންގެ މެދުގައި އުފެދިފައިވާ ނުތަނަސްކަން ހައްލު ކުރެވިފައި ނުވާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
