ވ. އާރަށުގެ ޚިޔާނާތް ސާބިތުވާކަމަށް ކަނޑައަޅާ ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް ކްރިމިނަލް ކޯޓުން ކުރި 11 އަހަރުގެ ޖަލުހުކުމަށްވުރެ ވަކި "ހަލާލު" ހުކުމެއް ތާރީހުގައިވެސް ކޮށްފައި ނުވާކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެ އެވެ.
ރޮޒައިނާ މިފަދައިން ވިދާޅުވެފައިވަނީ ރައީސް ޔާމިންގެ މައްޗަށް އިއްވާފައިވާނީ "ހަރާން ހުކުމެއް" ކަމަށް އެމަނިކުފާނު ސަޕޯޓަރުން ބުނަމުންދާތީ އެކަމަށް ފާޑުވިދާޅުވެ، ރޭ އެމްޑީޕިއިން ބޭއްވި ޖަލްސާގައި ވާހަކަދައްކަވަމުން ނެވެ.
ރޮޒެއިނާގެ ވާހަކަ ފައްޓަވަމުން ވިދާޅުވީ ޖަލަށް ލާން ޖެހެނީ ހަމައެކަނި ރިހާކުރުފުޅި ވަގަށް ނެގި މީހާ ނޫން ކަމަށެވެ. ރައްޔިތުންގެ ފައިސާއިން ވައްކަން ނުކުރާނެކަމަށް ހުވާކޮށްގެން ހުންނެވި ބޭފުޅަކު އެ ހުވަޔާއި ޚިލާފުވުމުން އެންމެ ފުރަތަމަ ޖަލަށް ލާން ޖެހޭނީ އެމީހާކަމަށް ރޮޒެއިނާ ވިދާޅުވިއެވެ.
އެކަމުގައި ޝާމިލުވާ އިތުރު މީހުން ޖަލަށް ލާން ޖެހޭނީ އެންމެ އިސްކޮށް ހުންނަ ފަރާތް ޖަލަށްލުމަށް ފަހުގައިކަމަށް އޭނާ ވިދާޅިވިއެވެ.
އެގޮތުް ބަލާއިރު، ރައީސް ޔާމިންގެ މައްޗަށް ކޮށްފައިވަނީ ހަލާލު ހުކުމެއްކަމަށް ރޮޒޭނާ ވިދާޅުވިއެވެ.
ރައީސް ޔާމީންގެ މައްޗަށް ކޮށްފައިވާ "ހަރާން" ހުމުން ބާތިލުކުރުމަށް ގޮވާލާ އިދިކޮޅުން މުޒާހަރާ ކުރަނީ
"ގައުމުގެ ވެރިޔާ ރައްޔިތުންގެ ފައިސާއަށް ރައްކާތެރިވާނެކަމަށް ހުވާކޮށްގެން ވެރިކަމަށް އަންނަ މީހާ ވައްކަންކުރީމަ އެންމެ ފުރަތަމަ ޖަލަށްލާން ޖެހެނީ ހަމަ އެމީހާ. އޭގެ ފަހުން ދެން ކުދި ވަގުންތައް ހޯދާނީ. ރައީސް ޔާމީންގެ އެކައުންޓުގައި 100 މިލިއަން ރުފިޔާ އޮވެމެ ކޯޓަކުން ވައްކަން ސާބިތުވެގެން ރައީސް ޔާމީން ޖަލަށް ލީމަ، މި ގޮވަނީ ހަރާން ހުކުމެކޭ. ވަޓް އަ ޖޯކް އޭ އަޅުގަނޑަށް ބުނެވޭނީ. ބައްލަވާ މިޔަށްވުރެ ހަލާލު ހުކުމެއް މި ރާއްޖޭގެ ތާރީހުގައިވެސް ނުކުރޭ"
އައްޑޫ މީދޫ ދާއިރާގެ މެމްބަރު ރޮޒައިނާ އާދަމް
ރޮޒޭނާ ވިދާޅުވީ ރައީސް ޔާމީންގެ މައްޗަށް ކުރި ހުކުން ހަރާންވާނެ ގޮތެއް ވިސްނިވަޑައި ނުގަންނަވާކަމަށެވެ.
އޭގެ އިތުރުން ރޮޒޭނާ ވިދާޅުވީ ރައީސް ޔާމީން ޖަލަށް ލުމުން ޕީޕީއެމް-ޕީއެންސީ ކޯލިޝަނުންވެސް ހާސްވެގެން އުޅޭތަން ނުފެންނަކަމަށެވެ. އެމަނިކުފާނު މީގެ ކުރިންވެސް ޖަލަށް ލާފައިވާއިރު، އެމަނިކުފާނު މިނިވަންކުރުމަށް ވަރުގދަ ހަރަކާތްތަކެއް ހިންގާފައި ނުވާކަން އޭނާ ފާހަގަކުރެއްވިއެވެ.
އެއާއެކު ރޮޒައިނާ ވިދާޅުވީ ރައީސް ޔާމީން މިނިވަންކުރުމަށް ގޮވާލާ މިހާރު ޕީޕީއެމުން މަގުމަތީގައި ހަރަކާތްތައް ހިންގަނީ ރިޔާސީ އިންތިޚާބު ކައިރިވެފައި އޮތުމުން ޕާޓީގެ ރޫހު އާލާކޮށްލުމުގެ ބޭނުމުގައި ކަމަށެވެ. އިތުރު އެއްވެސް ސަބަބެއް ނުފެންނަކަމަށް ރޮޒައިނާ ވިދާޅުވިއެވެ.
ރޮޒައިނާ މިފަދައިން ވިދާޅުވެފައިވާއިރު، ރައީސް ޔާމީން މިނިވަންކުރުމަށް ގޮވާލާ އިދިކޮޅުން ގެންދަނީ ސިލްސިލާކޮށް މާލޭގައި މުޒާހަރާކޮށް އަޑުއުފުލަމުންނެވެ. އަދި ކުރިއަށް އޮތް ރިޔާސީ އިންތިޚާބުގައި ޕީޕީއެމްއިން ވާދަކުރާނެ ރިޔާސީ ކެންޑިޑޭޓަކީވެސް ރައީސް ޔާމިންކަމަށް އެ ޕާޓީއިން ވަނީ ކަނޑައަޅާފަ އެވެ.
Advertisement
This content is created and paid for by advertisers and does not involve Voice Journalists
