ޑިފެންސް މިނިސްޓަރ އަލްއުސްތާޒާ މާރިޔާ ދީދީ ޕަބްލިކްގައި ޞަމަދުގެ ކިބައިން މަޢާފަށް އެދެންޖެހޭ ކަމަށް މޯލްޑިވްސް ނެޝެނަލް ޕާޓީގެ ރައީސް މުހައްމަދް ނާޒިމް (ކާނަލް ނާޒިމް) ވިދާޅުވެއްޖެއެވެ.

ނާޒިމް މިހެން ވިދާޅުވީ ރޭ ރައީސް އިބްރާހިމް މުޙައްމަދް ޞާލިޙަށް އެމްޑީޕީގެ ރިޔާސީ ޓީކެޓް ހަވާލު ކުރުމަށް ބޭއްވި ޖަލްސާގައި، ދާދި ފަހަކުން އިންޑިޔާ އަށް ބޭސް ފަރުވާ އަށް ގޮސް ހުއްޓައި ހައްޔަރު ކޮށް ޑިޕޯޓު ކޮށްލި ޕީޕީއެމް ހުޅުމާލެ ދާއިރާގެ ރއީސް އަދި އިންޑިއާ އައުޓް ހަރަކާތުގައި އެކްޓިވިސްޓް އަބްދުއްޞަމަދުގެ މައްސަލައިގައި ޞަމަދުއަށް ރައްދުވާ ގޮތަށް ވާހަކަ ދެއްކެވެމުގައި ހަޖޫޖެއްސެވުމާއި ގުޅިގެންނެވެ.

 މިނިސްޓަރ މާރިޔާގެ ވާހަކަގައި ވިދާޅުވީ ތިޔަބޭފުޅުންނަށް މިދޭތެރެއިން މީޑިއާތަކުގައި އުޅުނު ވަރަށް ބާރަށް ކޮންމެ ރެޔަކު އަޅުގަނޑުމެންގެ އަވައްޓެރި ޤައުމުގެ މިލިޓަރީއާ ދިމާލަށް ގޮންޖައްސަވައި އެކި ގޮތްގޮތަށް ވާހަކަދެއްކެވި ބޭފުޅުންގެ ތެރޭގައިވެސް އެ ފައުޖުގެ ކުރީގައި ދިދަ ހުންނަވާ ބޭފުޅެއް، ތުނބުޅި ބާލައްވައިގެން އާއިލާއާއެކު ވަޑައިގަތީ އިންޑިއާއަށް ކަމަށެވެ. ދެން އެނބުރި ވަޑައިގެންނެވިއިރު ކެމެރާތައް ހުރީ އޭނާއަށް އަމާޒުވެފައި ކަމަށާއި، މޫނުގައި އަތް އަޅުއްވައި ކީރިތިކުރެއްވިހެން ހީވިކަމަށްވެސް މާރިޔާ ވިދާޅުވިއެވެ.

 "ކެމެރާތައް ހުރީ އަޅުވާފައި. [ސަމަދުބެ] ވަޑައިގެން ވާހަކަދައްކަވަމުން އަޅުގަނޑުމެންނަށް ފެނުނީ މިހެން މޫނުގައި އަތް އަޅުއްވައި، އަޅުގަނޑަށް ހީވީ ކުޑަކޮށް ކީރިތިކުރެއްވިހެން،" ސަމަދުއަށް ހަޖޫޖައްސަވަމުން މާރިޔާ ވިދާޅުވިއެވެ.

މާރިޔާގެ މި ވާހަކަތަކާއި ގުޅިގެން ނާޒިމް ވިދާޅުވީ "މާރިޔާގެ އެ ޢަމަލަކީ މިނިސްޓަރެއްގެ ހައިސިއްޔަތުން ކުރެއްވި ވަރަށް ދަށު ދަރަޖައިގެ ޢަމަލެއް ކަމަށް، ޚާއްސަކޮށް ދިފާއި ވަޒީރެއްގެ މަޤާމުގައި ހުންނަވައިގެން، ޕަބްލިކްގައި ހުންނަވައިގެން އާންމު ރައްޔުތަކަށް ދިމާވި މިފަދަ ހާލަތެއްގެ ސަބަބުން ހަޖޫޖެހެން، ޕަބްލިކް ގައި ޞަމަދުގެ ކިބައިން މާރިޔާ މަޢާފަށް އެދެންޖެހޭ، ޞަމަދަށް އިހްތިރާމް ކުޑަވާގޮތައް ދެއްކި ވާހަކަތަކާއި މެދު" ނާޒިމް ވިދާޅުވިއެވެ.

"ގަދަ ފިންނަޏަކީ ވެސް އިންސާނުންނަށް ދެވޭ އަދަބެއް، ލޯޔަރެއްގެ ހައިސިއްޔަތުން އެކަމަނާއަށް މިކަން އެނގެންޖެހޭ" ކާނަލް ނާޒިމް އިތުރަށް ވިދާޅުވިއެވެ.

މާރިޔާގެ މި ވާހަކަތަކަށް އެކި ސިޔާސީ ފިކުރުގެ ވެރިންނާއި އާންމުން ދަނީ ފާޑުކިޔަމުންނެވެ. އަދި މިއީ ރާއްޖޭގެ ޑިފެންސް މިނިސްޓަރެއް ރައްޔިތަކާއި ގުޅުވައި ދައްކަން ނުޖެހޭ ވާހަކަތަކެއް ކަމެއް ބުނެ ގިނަ ބަޔަކު އަންނަނީ މާރިޔާގެ އިސްތިއުފާއަށް ގޮވާލައި ހިޔާލު ފާޅުކުރަމުންނެވެ.